1 ፅሞትዮሳ 3 - ጌሻ ማፃፋ

ዎሳ ኬ ጭማታ

¹ ኦንካ፥ “ዎሳ ኬ ካለያ አስ ግዳናዉ ኮይኮ ሎኦባ አሞቴስ” ግያ ኦዳይ ቱማ።

² ዎሳ ኬ ካለያ አስ ቦረቶናይሳ፥ እስ ማቸ ፃላል ደኤይሳ፥ ማራን ደኤይሳ፥ ባና ሃረይሳ፥ በሰይሳዳ ኦይሳ፥ እማ ሞከይሳ፥ ታማርሳናዉ ዳንዳኤይሳ፥

³ ማቶናይሳ፥ ኦየቶናይሳ፥ ፓላሞናይሳ፥ ሚሸ ሲቆናይሳ፥

⁴ እያ ናይት እያዉ ኪተተይሳነ ቦንቸይሳ፥ ባ ኬ አይሳናዉ ዳንዳኤይሳ ግዳናዉ በሴስ።

⁵ እስ አስ ባ ኬ አይሳናዉ ዳንዳኦና እፅኮ፥ ፆሳ ዎሳ ኬ ዋት አይሳናዉ ዳንዳኢ?

⁶ ኦቶሮን ሱገትድ፥ ፃላሄይ ፆሳ ፕርዳን ኩንድዳይሳዳ ኩንዶና መላ፥ ኦራ አማንዳ አስ ግዳናዉ በሰና።

⁷ ቦረንነ ፃላሄ ፅሄን ገሎና መላ ሄ ኡራይ አማኖና አሳ ማታን ናሸተይሳ ግዳናዉ በሴስ።

ዎሳ ኬ ዳቆነታ

⁸ ሄሳዳ ቃስ ዎሳ ኬ ዳቆነት ቦንቸትዳይሳታ፥ ናምኡ ዶና ኦደቶናይሳታ፥ ዳሮ ዎይነ ኡሹ ኡዮናይሳታ፥ ሚሸ ያረቶናይሳታ፥

⁹ አማኑዋ ፁራ ጌሻ ካሀን ናገይሳታ ግዳናዉ በሴስ።

¹⁰ ኤንቲ ኮይሮትድ ፓጨታናዉ ኮሼስ፤ ኤንታ ቦላ ቦረይ ባይና እፅኮ፥ ዎሳ ኬ ዳቆነ ግድድ ኦ።

¹¹ ሄሳዳካ፥ ኤንታ ማጫሳት ቦንቸትዳይሳታ፥ ዝግሮናይሳታ፥ ማራን ደኤይሳታ፥ ኡባባን አማነተይሳታ ግዳናዉ በሴስ።

¹² ዎሳ ኬ ዳቆነት እስ ማች ፃላል ደኤይሳ ግዶ። ባ ናይታነ ባ ኬ ሎይ አይሰይሳ ግዳናዉ በሴስ።

¹³ ዎሳ ኬ ዳቆነ ግድድ፥ ሎኦ ኦሶ ኦይሳት፥ ኤንታዉ ግታ ቦንቾ ቃስ ክርስቶስ የሱሳን ባንታዉ ደእያ አማኑዋባ ኦዳናዉ ዳሮ ምኖተ ደማና።

አማኖ ግታ ፁራ

¹⁴ ታኒ ሀ ኪታ ነዉ ፃፋሸ፥ ኤለሳዳ ኔኮ ባና ጋዳ ኡፋይስ ዎይስ።

¹⁵ ሽን ታኒ ቦና ጋምእኮ፥ ፆሳ ኬን አሳይ ዋንድ ዳናዉ በሲያኮ ኤራና መላ ሀይሳ ነዉ ፃፋይስ። ደኦ ፆሳ ኬይ ቱማተስ ቱስነ ባሶ።

¹⁶ ኑ አማኑዋ ፁራይ ስይ ባይና ግታ። ክርስቶስ አሾ ማእድ ቆንጭስ፤ እያ ቱማተ ጌሻ አያናይ ማርካትስ። ኪታንቾታስ በንትስ፤ እ ካዎተ ኡባስ ሳባከትስ። አላመን ደእያ አሳን አማነትስ፤ ቦንቾን ሳሎ ኤከትስ።