1 ፅሞትዮሳ 2 - ጌሻ ማፃፋ

ኡባስ ዎስተ

¹ ኡባፈ ስንታዳ፥ አሳ ኡባስ ፆሳ ኦይቻናዉ፥ ዎሳናዉ፥ ጋናታናዉነ ጋላታናዉ በሰይሳ ታኒ ነና አኬክሳይስ።

² ኑኒ ቱማ አያና ደኦንነ ጌሻተን ፆሳ ጎይንሸ ሳሮተንነ ዎፑ ግዳ ደኦን ዳና መላ ካዎታስነ ሹማታ ኡባስ ዎስተ።

³ ሄሳ መላ ዎሳይ ኑና አሽያ ፆሳ ስንን ሎኦነ ኡፋይስያባ።

⁴ ፆሳይ አስ ኡባይ አታናዳነ ቱማ ኤራናዳ ኮዬስ።

⁵ እስ ፆሲ ደኤስ። ፆሳፈነ አሳፐ ግዶን ግድድ ስገያ እሶይ ደኤስ፤ እካ አሰ ግድዳ ክርስቶስ የሱሳ።

⁶ እ አሳ ኡባ ዎዛናዉ ባና አድ እሚስ። ፆሳይ ባ ዎድያን አሳ ኡባ ዎዛናዉ ኮየይሳ በሲያ ማርካይ ሀይሳ።

⁷ ፆሳይ ታና ዎንገላስ አስታማረነ ሀዋረ ኦድ ዶርዳይ ሄሳሳ። ታኒ ቱማ ኦዳይስ፤ ዎርዶትከ፤ አማኖንነ ቱማን አይሁደ ግዶና አሳስ ማርካታና መላ ፆሳይ ታና ሹምስ።

⁸ ሄሳ ግሾ፥ ኡባ በሳን ደእያ አደት፥ ባንታና ፆሳስ ዱማይድ፥ ሀንቆነ ፓላማ ድግድ፥ ባንታ ኩሽያ ፑደ ደንድ ፆሳ ዎሳና መላ ኮያይስ።

⁹ ሄሳዳ ማጫሳይ ባንታና ሃርዳይሳ ቆንጭስያ፥ ቦንቾይነ ማር ደእያ ማኡዋ ማአናዉ በሴስ። ኤንቲ ማር ባይና ሁጰ ዳን፥ ዎርቃን ዎይኮ እንቆን፥ ዎይኮ አልኦ አፍላን ባንታና አሌቅሶፖ።

¹⁰ ሽን ፆሳስ ጎይናይስ ግያ ማጫሳይ ባንታዉ በሰይሳዳ ሎኦባ ኦና።

¹¹ ማጫስ ኪተተን ስእ ግድ ታማሮ።

¹² ታኒ ማጫሳይ ታማርሳና መላ ዎይኮ አደ ቦላ አዋታና መላ ግዶናሽን፥ ስእ ግድ ዳና መላ ኮያይስ።

¹³ አዳመይ ኮይሮ መትስ፤ ጉየፐ ሄዋና መታሱ።

¹⁴ ቃስ ጭመታዳ ፆሳ ህግያ መንዳይ ማጫስፐ አትሽን፥ አዳመ ግደና።

¹⁵ ሽን ማጫስ አማኖን፥ ሲቆንነ ጌሻተን ባንታና ሃርድ ደእኮ ናይታ የሎን አታና።