1 ፅሞትዮሳ 1 - ጌሻ ማፃፋ

¹ ኑና አሽያ ፆሳንነ ኑ ኡፋይሳን ናግያ የሱስ ክርስቶሳን ኪተትዳ፥ የሱስ ክርስቶሳ ሀዋረ ግድዳ፥ ጳዉሎሳፐ፥

² አማኖን ታዉ ቱማ ናአ ግድዳ ፅሞትዮሳስ። ፆሳ ኑ አዋ፥ ኑ ጎዳ ክርስቶሳ አ ኬሀተይ፥ ማሮተይነ ሳሮተይ ነዉ ግዶ።

ዎርዶ ትምርተፈ ናገተ

³ ታኒ ማቀዶነ ባሸ ነና ሀዳርዳይሳዳ፥ እስ እስ አሳት ዎርዶ ትምርትያ ታማርሰይሳ ድጋናዉ ነ ኤፈሶናን ጋምአና መላ ኮያይስ።

⁴ ኤንቲ ጎእ ባይና ሀይሰ ኦዳነ ባንታ ኮቻ ታይቡዋ አጋናዳ ኦዳ። ሄሳ መላባይ ፓላማ ካለስፐ አትሽን፥ አማኖን ኦሰትያ ፆሳ ኦሱዋስ ማደና።

⁵ ሀ ኪታ ሁጰ ቆፋይ ጌሻ ዎዛናፐ፥ ሎኦ ካሀፐነ ቱማ አማኑዋፐ በንትያ ሲቁዋ ደንናሳ።

⁶ እስ እስ አሳት ሀይሳ አግድ፥ ፓና ኦዳኮ ስምዶሶና።

⁷ ኤንቲ ፆሳ ህግያ አስታማረ ግዳናዉ ኮዮሶና። ሽን ኤንቲ አይ ኦድያኮ ዎይኮ ቱማ ኦድ ኦደይስ እ አይበኮ ኤሮኮና።

⁸ አስ በሰይሳዳ ህግያን ጎኤትኮ ህገይ ሎኦ ግደይሳ ኤሮስ።

⁹ እስባ አኬካናዉ ኮሼስ። ህገይ ሎኦ አሳስ መትቤና። ሽን ህገይ፥ ህገ መንይሳታ፥ ዎራንታ፥ ፆሰ ያዮናይሳታ፥ ሸምፖ ዎይሳታ፥ ናጋራንቾታ፥ ጌሻተ ባይናይሳታ፥ ቱናታ፥ ሀር አቶሽን ባንታ አይዉ ዎይኮ አዋ ዎይሳታ፥

¹⁰ ላመይሳታ፥ አደይ አደራ ላይማተይሳታ፥ አሰ ባይዘይሳታ፥ ዎርዳንቾታ፥ ዎርዶን ጫቀይሳታ፥ ዎይኮ ቱማ ትምርትያራ ጋሄቶና አይ ኦሶ ኦይሳታ ሴራናዉ ከይስ።

¹¹ ሄ ትምርተይ ቦንቾነ አንጀትዳ ፆሳይ ታኒ አዋጃና መላ ታዉ ሀዳራ እምዳ ዎንገላ ግዶን ደኤስ።

ፆሳ ማሮተስ ጋላታ

¹² ታኒ ኦያ ኦሱዋን ታዉ ዎልቃ እምዳ ኑ ጎዳ ክርስቶስ የሱሳ ጋላታይስ። ታና ባ ኦሱዋስ ሹምድ ሄ ኦሱዋስ በሰይሳ ግድ ታይብዳ ግሾ እያ ጋላታይስ።

¹³ ታኒ ሀይሳፈ ካሰ እያ ጫየይሳ፥ እያ የደይሳነ መቶይሳ ግድኮካ ታኒ ሄሳ ኤሮናነ አማኖና ኦዳ ግሾ ፆሳይ ታና ማርስ።

¹⁴ ኑ ጎዳይ ባ አ ኬሀተ ታ ቦላ ጉስድ፥ ሄ አ ኬሀተራ አማኖነ ሲቆ ክርስቶስ የሱሳ ባጋራ ታዉ እሚስ።

¹⁵ “ክርስቶስ የሱሲ ናጋራንቾታ አሻናዉ ሀ አላምያ ይስ” ግያ ቃላይ አማንይሳነ አሳ ኡባይ ኤካናዉ በሰይሳ። ኡባፈ አዳ ናጋራንቾይ ታና።

¹⁶ ሽን መርና ደኡዋ ኤካናዉ እያ አማንያ አሳስ ታኒ ሌምሶ ግዳና መላ የሱስ ክርስቶሲ ዳሮ ዳንዳእስ። ታዉ ኡባፈ አዳ ናጋራንቹዋስ ፆሳይ ባ ማሮታ ዳርስስ።

¹⁷ አይፈን በንቶናይሳስ፥ እስ ፆሳስ፥ ሀይቆናይሳስ፥ መርና ካዋስ፥ መርናፐ መርና ጋካናዉ ጋላታይነ ቦንቾይ ግዶ። አምንእ።

¹⁸ ፅሞትዮሳ፥ ታ ናአዉ፥ ካሰ ነባ ናበት ኦድዳ ቃላ ቦላ ኤቃዳ ሀ ኪታ ሀዳራ ነዉ እማይስ። ነ ሄ ቃላ ካልኮ ሎኦ ኦላ ኦለታና።

¹⁹ አማኖይነ ሎኦ ካህ ነዉ ደኦ። እሶት እሶት ካሀ ይድ ማርካበይ ሆበን የይሳዳ ባንታ አማኑዋ ይስዶሶና።

²⁰ ሄሳ ሀንዳይሳታ ግዶን ሄመነዮስነ እስክንድረይ ደኦሶና። ኤንቲ ታማርድ ፆሳ ጫየይሳ አጋና መላ ታኒ ፃላሄስ ኤንታና አ እማስ።