1 ተሰሎንቀ 5 - ጌሻ ማፃፋ

¹ ታ እሻቶ፥ ሀ ሀኖት ሀናና ዎድያነ አጌና ህንተዉ ፃፋናዉ ኮሸና።

² ጎዳ ጋላሳይ ካይሶይ ቃማ የይሳዳ ያናይሳ ህንተ ሎይ ኤሬታ።

³ አሳይ፥ “ሳእ ሳሮ፥ አይኮይካ ሀነና” ያግሽን፥ ማጫስ እቀ ኦይከይሳዳ ዮይ ኤንቲ ቆፖና ኤንታ ቦላ ያና። ኤንቲ አይ ኦገንካ ከስ ኤኮኮና።

⁴ ሽን ኑ እሻቶ፥ ሄ ጋላሳይ ህንተዉ ካይሶይ የይሳዳ ያናዉ ህንተ ማን ደኤከታ።

⁵ ህንተ ኡባይ ፖኦ አስነ ጋላሳን ደእያ አስ፤ ኑኒ ቃማ አስ ዎይኮ ማ አስ ግዶኮ።

⁶ ሄሳ ግሾ፥ ኑኒ ሀራት ስከይሳዳ ስካናዉ በሰና፤ ኑኒ ባርካናዉነ ጊግድ ዳናዉ በሴስ።

⁷ ስከይሳት ቃማ ስኮሶና፤ ማተይሳት ቃማ ማቶሶና።

⁸ ሽን ኑኒ ጋላሳ አስ ግድያ ግሾ ጊግድ ዳናዉ በሴስ። አማኖነ ሲቆ ፁሩረዳ ትራን ማእድ፥ አቶተ ኡፋይሳ ሁጰን ዎያ ኦላ ብራታ ባርኔፃዳ ዎድ ዳናዉ በሴስ።

⁹ ፆሳይ ኑና ኑ ጎዳ የሱስ ክርስቶሳ ባጋራ ኩመ አቶተ ኤካና መላ ዶርስፐ አትሽን፥ ሀንቆስ ዶርቤና።

¹⁰ ኑኒ ፓፃ ደእን ዎይኮ ሀይቅን፥ ክርስቶስ ያ ዎደ እያራ እስፈ ዳና መላ ክርስቶስ ኑ ግሾ ሀይቅስ።

¹¹ ሄሳ ግሾ፥ ህንተ ካሰ ኦይሳዳ፥ እሶይ እሱዋ ምንተነ ድችተ።

ዞረነ ሳሮ

¹² ኑ እሻቶ፥ ህንተ ግዶን ኦይሳታ፥ ህንተና ካለና መላነ ዞራና መላ ጎዳይ ዶርዳይሳታ ቦንቻና መላ ህንተና ዎሶስ።

¹³ ኤንቲ ኦያ ኦሱዋ ግሾ፥ ኤንታ ዳሮ ቦንችተነ ሲቅተ። እሶይ እሱዋራ ሳሮተን ደእተ።

¹⁴ ኑ እሻቶ፥ ኑኒ ህንተና ዞሮስ። ቦዛታ ሀንቅተ፤ ባበይሳታ ምንተ፤ ዳቡራንቾታ ማድተ፤ አሰ ኡባ ዳንዳእተ።

¹⁵ ኦንካ ኢታ ግሾ ኢታ ዛሮና መላ ናገትተ። ህንተ ዎልስነ አሳ ኡባስ ሎኦባ ኦናዉ ምንተ።

¹⁶ ኡባ ዎደ ኡፋይትተ።

¹⁷ ኡባ ዎደ ፆሳ ዎስተ።

¹⁸ ኡባባን ጋላትተ። ክርስቶስ የሱሳ ባጋራ ፆሳይ ህንተፈ ኮየይ ሄሳ።

¹⁹ ጌሻ አያና ኦሱዋ ቶይሶፕተ።

²⁰ ትንብተ ቃላ ካፕተ።

²¹ ኡባባ ፓጭተ፤ ሎኦባ ኤክተ።

²² ኢታ ኦሶ ኡባፈ ሃክተ።

²³ ሳሮ እምያ ፆሳይ ባ ሁጰን ህንተና ፖሎ ጌሾ። ኑ ጎዳይ የሱስ ክርስቶሲ ያና ጋላሳስ፥ ፆሳይ ህንተ አያና፥ ህንተ ሸምፑዋነ ህንተ ኩመ አሳተ ቦረይ ባይና ናጎ።

²⁴ ህንተና ፄገይስ አማነትዳይሳ ግድያ ግሾ፥ ሄሳ እ ፖላና።

²⁵ ኑ እሻቶ፥ ኑስ ፆሳ ዎስተ።

²⁶ አማንያ አሳ ኡባ ጌሻ ዬረተን ሳሮተ።

²⁷ ህንተ ሀ ኪታ አማንያ አሳ ኡባስ ናባባናዳ ጎዳ ሱንን ህንተና ዎሳይስ።

²⁸ ኑ ጎዳ የሱስ ክርስቶሳ አ ኬሀተይ ህንተራ እስፈ ግዶ። አምንእ።