1 ተሰሎንቀ 4 - ጌሻ ማፃፋ

ፆሰ ኡፋይስያ ደኦ

¹ ዉርሰን፥ ታ እሻቶ፥ ፆሳ ኡፋይሳናዉ ህንተ ዋንድ ዳናዉ በሲያኮ ኑፐ ታማርደታ። ሄስ ህንተ ኮይሮፐ ደእዳ ደኡዋ፥ ሽን ሀእ ህንተ ካሰይሳፈ አድ ኦናዳ ጎዳ የሱሳ ሱንን ህንተና ዎሶስነ ዞሮስ።

² ኑኒ ጎዳ የሱሳ ማታን ህንተና ኪትዳ ኪታይ አዉሰኮ ኤሬታ።

³ ፆሳይ፥ ህንተ ጌሽ ግዳና መላነ ላይማቶና መላ ኮዬስ።

⁴ ህንተ እሶይ እሶይ፥ ህንተ ማቸታራ ጌሻተንነ ቦንቾን ዳናዉ በሴስ።

⁵ ፆሳ ኤሮናነ አማኖና አሳዳ ላይማተ አሞን ፁገቶፍተ።

⁶ ኑ ካሰ ህንተዉ ኦድዳይሳዳነ ምን ዞርዳይሳዳ ጎዳይ ሄሳ መላባ ኦያ ኡባ ፕርድያ ግሾ፥ ኦንካ ሀይሳታን ባ አማንያ እሻ ናቃናዉነ ጭማናዉ በሰና።

⁷ ፆሳይ ኑና ጌሻተን ዳና መላ ፄግስፐ አትሽን፥ ቱናተን ዳና መላ ፄግቤና።

⁸ ሄሳ ግሾ፥ ሀ ትምርትያ እፅያ ኦንካ ህንተዉ ጌሻ አያና እምያ ፆሳ እፄስፐ አትሽን፥ አሰ ግደና።

⁹ ህንተ እሶይ እሱዋ ዋት ሲቃነኮ ፆሳይ ህንተና ታማርስዳ ግሾ፥ ሀእ ሲቆባ ኑ ህንተዉ ፃፋናዉ ኮሸና።

¹⁰ ቃስ ማቀዶነ ቢታን ደእያ አማንያ እሻታ ኡባ ቱማ ህንተ ዶሴታ። ሽን ኑ እሻቶ፥ ሀእካ ህንተ ኤንታ አድ ዶሳና መላ ህንተና ዎሶስ።

¹¹ ኑኒ ካሰ ህንተዉ ኦድዳይሳዳ ዎፑ ግዳ ደኡዋ ደእተ። ህንተ፥ ህንተ ኦሶ ኦድ ህንተዉ ዱሳስ ኮሽያባ ደምተ።

¹² ሄሳዳ ሀንኮ፥ አማኖናይሳታ ማታን ህንተ ቦንቸታና፤ ቃስ ህንተና ኮሽያባስ ኦናካ አዳሸከታ።

ጎዳይ ያና

¹³ ኑ እሻቶ፥ አማንድ ሀይቅዳ አሳት ሀናናባ ህንተ ኤራና መላ ኑ ኮዮስ። ህንተ ኤንታ ግሾ ኡፋይስ ባይና አሳዳ ካዮቶፍተ።

¹⁴ ኑኒ፥ የሱሲ ሀይቅዳይሳነ ቃስ ሀይቆፐ ደንድዳይሳ አማኖስ። ሄሳዳካ፥ ፆሳይ የሱሳ አማንድ ሀይቅዳይሳታ እያራ ዎላ ኤሀናይሳ አማኖስ።

¹⁵ ጎዳይ ኑስ ኦድዳይሳዳ ጎዳይ ያ ጋላስ እያራ ጋሄታናዉ ኑኒ ፓፃ ደኤይሳት፥ ሀይቅዳይሳታፐ ስንቶኮ።

¹⁶ ጎዳይ ዎልቃማ ኪታራ፥ ኪታንቾታ ሀላቃ ግርሳራ፥ ፆሳ ሞይዘ ፑኖራ፥ ሳሎፐ ዎና። ክርስቶሳ አማንድ ሀይቅዳይሳት ኮይሮትድ ሀይቆፐ ደንዳና።

¹⁷ ሄሳፈ ጉየ፥ ሄ ዎደ ኑኒ ፓፃ ደኤይሳት፥ ጎዳራ ሻራን ጋሄታናዉ ኤንታራ እስፈ ሳሎ ኤከታና። ሄሳፈ ጉየ፥ ኑኒ ጎዳራ እስፈ መርናዉ ዳና።

¹⁸ ሄሳ ግሾ፥ ሀ ቃላን እሶይ እሱዋ ምንተ።