1 ተሰሎንቀ 1 - ጌሻ ማፃፋ

¹ ጳዉሎስ ስላሰይነ ፅሞትዮስ ተሰሎንቀ ዎሳ ኬን ደእያ፥ ፆሳ አዋባነ ጎዳ የሱስ ክርስቶሳባ ግድዳ አሳስ ፃፍዳ ኪታ። አ ኬሀተይነ ሳሮይ ህንተዉ ግዶ።

ተሰሎንቀ አሳ ደኦነ አማኖ

² ኑኒ ፆሳ ዎስያ ዎደ ኡባን ህንተና ቆፕሸ ህንተ ግሾ ኡባ ዎደ ፆሳ ጋላቶስ።

³ ፆሳ ኑ አዋ ስንን አማኖን ህንተ ኦዳ ኦሱዋ፥ ሲቆን ህንተ ዳቡርዳ ዳቡራነ የሱስ ክርስቶሳን ደእያ ኡፋይሳ ኤካናዉ ህንተ ምንድ ኤቅዳ ኤቁዋ ኡባ ዎደ ኑኒ ቆፖስ።

⁴ ኑ እሻቶ፥ ፆሳይ ህንተና ዶሰይሳነ ባ አሰ ኦድ ህንተና ዶርዳይሳ ኑኒ ኤሮስ።

⁵ አይስ ጊኮ፥ ኑኒ ዎንገላ ዶና ፃላላን ግዶናሽን፥ ዎልቃን፥ ጌሻ አያናንነ ዎንገላ ቱማ አማኖን ህንተዉ ኤህዳ። ኑኒ ህንተራ ጋምእዳ ዎደ ኡባን ህንተ ግሾ ዋንድ ደእዳኮ ህንተ ኤሬታ።

⁶ ህንተ ዳሮ መቶ ኤክኮካ ጌሻ አያናይ እምያ ኡፋይሳን ኪታ ኤክደታ፤ ኑናነ ጎዳ ዳንደታ።

⁷ ሄሳ ግሾ፥ ማቀዶነነ አካያ ቢታን ደእያ አማንያ ኡባስ ሌምሶ ግድደታ።

⁸ ጎዳ ቃላይ ህንተፈ ከይድ፥ ማቀዶነንነ አካያ ፃላላን ግዶናሽን፥ ፆሳ ህንተ አማነይስ ኡባሶን ስኤትስ። ህዛ፥ ኑኒ ጋናባይ አይኮይካ ባዋ።

⁹ ኑኒ ህንተኮ ብዳ ዎደ ህንተ ኑና ሞክዳ ሞኩዋነ ህንተ፥ ህንተ ኤቃ አግድ ቱማነ ደኦ ፆሳ ሀጋዛናዉ ህንተ ስምዳይሳ ኤንቲ ባንታ ሁጰን ኦዶሶና።

¹⁰ ቃስ ፆሳ ናአይ፥ የሱሲ፥ ፆሳይ ሀይቆፐ ደንዳይስ፥ ስንፈ ያና ፆሳ ሀንቁዋፈ ኑና አሻናይስ፥ ሳሎፐ ያናይሳ ህንተ ናገይሳ ኤንቲ ማርካቶሶና።