1 ጰፅሮሳ 5 - ጌሻ ማፃፋ

ጭማታስነ ናአተታስ እመትዳ ዞረ

¹ ህዛ፥ ዎሳ ኬ ጭማታራ ጭማ ግድዳይስ፥ ክርስቶሳ ዋይያ ማርካተይስነ ቆንጫናዉ ደእያ ቦንቹዋ ሻከታናዉ ደእያ ታኒ፥ ህንተ ግዶን ደእያ ጭማታ ዞራይስ።

² ህንተ አዋተፈ ጋርሳን ደእያ ፆሳ ዉድያ ሄምተ። ፆሳይ ኮየይሳዳ ዶሳናፐ አትሽን፥ ኡንኤትድ ሄሞፍተ። ቃስ ሚሸ ኮሻን ግዶናሽን፥ ሀጋዛናዉ ደእያ ሎኦ ቆፋን ሄምተ።

³ ህንተ አዋተፈ ጋርሳን ደእያ ዉድያስ ሌምሶ ግድተፐ አትሽን፥ ጎዳቶፕተ።

⁴ ሄመይሳታ ሀላቃይ ቆንጭያ ዎደ ቆለቶና ቦንቾ ካላቻ ህንተ ኤካና።

⁵ ሄሳዳካ፥ ያላጋቶ፥ ጭማታስ ሃረትተ። ህንተ እሶይ እሱዋስ አሽከ ግድተ። ጌሻ ማፃፋን፥ “ፆሳይ ኦቶራንቾታ እፄስ፥ ሽን አሽከታስ አ ኬሀተ እሜስ” ያጌስ።

⁶ ፆሳይ ባ ዎደ ህንተና ቦንቻና መላ ዎልቃማ ፆሳ ኩሽያፐ ጋርሳን ህንተና ካዉሽተ።

⁷ እ ህንተዉ ቆፕያ ግሾ ህንተና ህርግስያ ኡባ እያ ቦላ የግተ።

⁸ ህንተ ሞርከይ ፃላሄይ፥ ምትያባ ኮይድ፥ ጋሞዳ ጉድሸ ህንተ ማታራ ዩይያ ግሾ ህንተና ሃርተነ ባርክተ።

⁹ አላመን ደእያ ህንተ እሻት ሄሳዳ ዋየ ኤከይሳ ኤርድ፥ አማኖን ምንድ፥ ፃላህያራ ኤቀትተ።

¹⁰ ባ መርና ቦንቹዋስ ክርስቶስ የሱሳ ባጋራ ህንተና ፄግዳ አ ኬሀተ ኡባ ፆሳይ፥ ጉ ዎደስ ህንተ ዋየትዳፐ ጉየ፥ እ ባ ሁጰን ህንተና ሺሻና፥ ካትሳና፥ ምንድ ኤሳና፥ ፃልሳና።

¹¹ መርናፐ መርና ጋካናዉ ፆሳይ ካዎቶ። አምንእ።

ሳሮ

¹² አማነትዳ እሻ ጋዳ ታ ኤክያ ስላሰ ባጋራ ሀ ዳብዳብያ ህንተዉ ቃንን ፃፋስ። ታ ሄሳ ህንተዉ ፃፍዳይ፥ ህንተና ዞራናዉነ ፆሳ አ ኬሀተይ ቱማ ግደይሳ ማርካታናሳ። ሄ አ ኬሀተን ምንድ ኤቅተ።

¹³ ህንተራ እስፈ ዶረትዳ ባብሎነን ደእያ ዎሳ ኬ አሳይነ ታ ናኣ ማርቆስ ህንተና፥ “ሳሮ ሳሮ” ያጌስ።

¹⁴ ሲቆ ዬረተ ዬረትሸ፥ እሶይ እሱዋ ሳሮተ። ክርስቶሳን ደእያ ህንተ ኡባስ ሳሮይ ግዶ። አምንእ።