1 ጰፅሮሳ 3 - ጌሻ ማፃፋ

አዝናባነ ማችባ

^1-2 ሄሳዳካ፥ ማቸቶ፥ ህንተ አዝናታፐ ፆሳ ቃላስ ኪተቶናይሳት ደእኮካ አይኮካ ኦደቶናሽን፥ ህንተ ያሻተነ ህንተ ጌሻ ደኡዋ በእድ አማናና መላ ኤንታዉ ሃረትተ።

³ ህንተ፥ ህንተ ሁጰ ፕፆንነ ዎርቃ አሌቆን ዎይኮ ሎኦ ማኦን ህንተ ቦላ አሳተ ሎይሶን ግዶፖ።

⁴ ሽን ህንተ ዎዛና ግዶን ደእያ የገልሳተይ ፆሳ ስንን ህንተዉ ዳሮ አልኦ ግድድ ዮና፥ አሽከነ ዎፑ ግዳ አያና ግዶ።

⁵ ፆሳይ እማና ግዳይሳ አማንዳ ጌሻ ማጫሳት በን ዎደ ባንታ አዝናታስ ሃረትድ፥ ባንታና ሄሳዳ ዳሮ ሎይዶሶና።

⁶ ሄሳዳ ሳራ አብራሃመ፥ “ታ ጎዳዉ” ያጋዳ ፄጋሸ፥ እያዉ ኪተታሱ፤ ህንተካ አይኮካ ያዮና ሎኦባ ኦኮ እ ናይታ።

⁷ አዝናቶ፥ ህንተ ማቸት ህንተፈ ዳቡራንቾ መታ ግደይሳ ኤርድ፥ ኤንታና ቦንችተ፤ ህንተ ዎሳ ቦና መላ ፆሳይ እምዳ ደኡዋ ኤንቲ ህንተራ እስፈ ላትያ ግሾ ኤንታ ቦንችተ።

ሎኦ ኦድ መቶ ኤኮ

⁸ ዉርሰን፥ ኡባይ እስ ቆፋን ደእተ። እሶይ እሱዋስ ቃትሸ፥ እሻዳ ሲቀትተ፤ ቃስ እሶይ እሱዋስ ኬሀታነ አሽከታ ግድተ።

⁹ ኢታ ግሾ ኢታ ዎይኮ ጫሻ ግሾ ጫይድ ዛሮፕተ፤ ሄሳ አግድ፥ ፆሳይ ህንተዉ አንጁዋ እማናዉ ህንተና ፄግዳ ግሾ አንጅተ።

¹⁰ አይስ ጊኮ፥ ጌሻ ማፃፋይ፥ “ደኦ ዶሰይነ ሎኦ ዎደ በአናዉ ኮየይ ኦና ግድኮካ ባ እንፃርሳን ኢታባነ ዎርዶ ኦደተይሳ አጎ።

¹¹ ኢታባ ኦይሳ አግድ ሎኦባ ኦ፤ ሳሮተካ ኬህ ኮዮነ ካሎ።

¹² ጎዳ አይፈይ ፅሎታኮ ፄሌስ፤ ቃስ እ ኡባ ዎደ ኤንታ ዎሳ ሀይዜስ። ሽን ጎዳይ ኢታባ ኦይሳታ ባ ሀንቆ ሶምኡዋን ፄሌስ” ያጌስ።

¹³ ህንተ ሎኦባ ኦናዉ አሞትኮ ህንተና ቆሀናይ ኦኔ?

¹⁴ ሀር አቶሽን፥ ፅሎተ ግሾ ህንተ ዋየትኮ አንጀትዳይሳታ። አሳስ ያዮፍተነ ህርጎፍተ።

¹⁵ ክርስቶሳ ህንተ ዎዛናን ቦንችተነ ጎዳይተ። ፆሳይ ህንተዉ እምዳ ኡፋይሳስ ጋሶ ኦይችያ ኦደስካ ዛሮ እማናዉ ኡባ ዎደ ጊግድ ኡትተ፥ ሽን ሄሳ አሽከተንነ ያሻን ኦተ።

¹⁶ ቃስ ክርስቶሳን ህንተ ደእያ ሎኦ ደኡዋ ኢታባ ኦዳባዳ፥ ህንተና ጫይያ አሳይ ዝግርያባን ዬላታና መላ ህንተ ካሀይ ጌሽ ግዶ።

¹⁷ ፆሳይ ግዳባ ግድኮ ኢታባ ኦዳ ግሾ ዋየ ኤከይሳፈ ሎኦባ ኦዳ ግሾ ዋየ ኤከይስ ሎኦ።

¹⁸ ክርስቶስ ኑና ፆሳኮ ሺሻናዉ ባዉ ፅሎ ግድድ ደእሸ፥ ናጋራንቾታ ግሾ እስ ቶሆ ናጋራ ኡባስ ሀይቅስ፤ እ ባ አሳተን ሀይቅስ፥ ሽን አያናን ፓፅስ።

¹⁹ ቃስ ሄ አያናን እ ብድ ቃሾን ደእያ ሸምፖታስ ቃላ ኦድስ።

²⁰ ኖሄይ ማርካብያ ኬፅያ ዎደ ሄ ሸምፖት ፆሳስ ኪተቶና እፅዶሶና፥ ሽን ፆሳይ ኤንታና ዳንዳእ ጋምእስ። ሆስፑን አሳ ፃላል ማርካብያን ገልድ፥ ዮ ሃፈ አትዶሶና።

²¹ ሄ ዮ ሃይ ሀእ ህንተና አሽያ ፅንቃተ ሌምሶ ግድስ። ሀ ፅንቃተይ ቦላ ቅታ ሜጮ ግዶናሽን፥ ሎኦ ካሀ ፆሳፈ ኤካናዉ እያ ዎስያ ኦገ ግድድ፥ ክርስቶሳ ደንዱዋ ባጋራ ህንተና አሼስ።

²² እ ሳሎ ብድ ፆሳ ኡሻቻን ኡትድ፥ ኪታንቾታ፥ ማታ አዋታነ ዎልቃማታ ሃሬስ።