1 ጰፅሮሳ 2 - ጌሻ ማፃፋ

ደኦ ሹችነ ጌሻ ደረ

¹ ህዛ፥ ኢታተ ኡባ፥ ጭሞ ኡባ፥ ጩቦተ ቃናተነ ዝግርስ ኡባ ህንተፈ ድግተ።

^2-3 ጎዳይ ኬሀ ግደይሳ ህንተ ኤርድ ሜዘትዳይሳዳ ሀእ የለትዳ ጉ ናይታዳ ህንተ አቶተን ድጭሸ ባናዉ ፆሳ ጌሻ ቃላ ማ ኡባ ዎደ አሞትተ።

⁴ አሳን ቦረትድ ፆሳን ዶረትዳ አልኦ ግድዳ ደኦ ሹቻ፥ ጎዳ የሱሳኮ ሺቅተ።

⁵ ህንተ አያና ኬ ኬፀትያ ደኦ ሹቻታ። ህንተ የሱስ ክርስቶሳ ባጋራ ፆሳ ኡፋይስያ አያና ያርሾ ያርሽያ ጌሻ ካህነታ።

⁶ ጌሻ ማፃፋን፥ “ሄኮ፥ ታኒ ፅዮነ ካታማን ጎዳ ፃጱዋ ምንያ፥ ዶረትዳ፥ አልኦ ሹቻ ዎስ፤ እያን አማንያ ኦንካ ዬላተና” ያጌስ።

⁷ ሀ ሹቻይ ህንተዉ አማነይሳታስ አልኦ፥ ሽን አማኖናይሳታስ፥ “ግምበይሳት ካድ እፅዳ ሹቻይ ጎዳ ፃጱዋ ምንያ፥ ኡባፈ አያ ሹቹ ግድስ።”

⁸ ቃስካ፥ “ሀ ሹቻይ አሰ ብያ ሹቻነ አሰ ኩንድስያ ዛላ” ያጌስ። ኤንቲ ሄሳስ ቃደትዳ ግሾ ፆሳ ቃላ ኪተቶና እፅድ በትዶሶና።

⁹ ሽን ፆሳይ ማፐ ማላልስያ ባ ፖኡዋኮ ህንተና ፄግዳይ፥ ህንተ እያ ሎኦተ ሀራታስ ኦዳናዉ ዶረትዳ ኮቸ፥ ካዎ ካህነ፥ ጌሻ ደረነ ፆሳ ዱማ ደረ።

¹⁰ ህንተ ካሰ ፆሳ ደረ ግደከታ፥ ሽን ሀእ ህንተ እያ ደረ። ህንተ ካሰ ማሮተ ደምበከታ፥ ሽን ሀእ ማሮተ ደምደታ።

ፆሳ አሳዳ ደእተ

¹¹ ታ እሻቶ፥ ህንተ ሀ ሳአን እማነ በተ አስ ግድዳይሳዳ ህንተ ሸምፑዋ ኦልያ አሾ አሞፐ ሃካና መላ ታኒ ህንተና ዎሳይስ።

¹² አማኖና አሳይ ህንተና ኢታ ኦያ አሳዳ ዝግርያ ዎደ ፆሳይ ኑና በአናዉ ያ ጋላስ፥ ኤንቲ ህንተ ሎኦ ኦሱዋ በእድ ፆሳ ጋላታና መላ ህንተዉ ሎኦ ደኦይ ደኦ።

¹³ ጎዳ ግሾ ግድ ማታራ ደእያ አሳታስ ሃረትተ፤ ኡባፈ ቦላ ግድያ ግሾ ካዋስካ ሃረትተ።

¹⁴ ኤንቲ ኢታ ኦይሳታ ሴራናዉነ ሎኦ ኦይሳታ ሳባናዉ ካዉዋፐ ኪተትዳ ግሾ ደርያ አይሰይሳታስ ሃረትተ።

¹⁵ ህንተ፥ ህንተ ሎኦ ኦሱዋን ኤሮና ኤያ አሳ ዶና ኦይናይስ ፆሳ ሸነ።

¹⁶ ፆሳ አይለ ግድድ ላአተን ደእተፐ አትሽን፥ ህንተ ላአተ ኢታ ኦሶስ ካማ ኦፍተ።

¹⁷ አሳ ኡባ ቦንችተ፤ አማንያ አሳ ሲቅተ፤ ፆሳ ያይተ፤ ካዎ ቦንችተ።

ክርስቶሳ ዋየ ሌምሶ

¹⁸ አይለቶ ሎኦ ጎዳታስነ ኬሀ ጎዳታ ፃላላስ ግዶናሽን፥ ኢታታስካ ቦንቾን ሃረትተ።

¹⁹ አስ ፆሳ ግሾ ግድ በሶና ዋየ ዋየትኮ ፆሳይ እያ አንጃና።

²⁰ ሽን ህንተ ናጋራ ኦን ህንተና ደችያ ዎደ ህንተ ዳንዳእኮ ህንተዉ አይ ጋላት ደኢ? ሽን ሎኦባ ኦድ ዋየ ዳንዳእኮ ፆሳይ ህንተና ሄሳስ አንጃና።

²¹ ፆሳይ ህንተና ፄግዳይ ሄሳ ግሾሳ፤ ክርስቶስ ህንተዉ ዋየትስ፤ ህንተ እያ ካላና መላ፥ ህንተዉ ሌምሶ ግድስ።

²² እ ናጋራ ኦቤና፤ እያ ዶናን ዎርዶይ በንትቤና።

²³ ኤንቲ እያ ጫይያ ዎደ፥ ዛሪድ ጫይቤና። ሽን ዋየ ኤክሸ ፅሎ ፕርድያ ፆሳስ ባ ፕርዳ አጋግስፐ አትሽን፥ ማንድቤና።

²⁴ ኑኒ ናጋራስ ሀይቅድ ፅሎተስ ዳና መላ ክርስቶስ ባ አሹዋን ኑ ናጋራ ማስቃልያ ቦላ ቶክስ፤ ህንተ እያ ማዱንን ፓፅደታ።

²⁵ ካሰ ህንተ ኦገ ባልድ ይዳ ዶርሳታ መላ፥ ሽን ሀእ ህንተ ሸምፑዋ ሄመይሳኮነ ናገይሳኮ ስምደታ።