1 ዮሃንሳ 3 - ጌሻ ማፃፋ

ፆሳ ናይታ

¹ ኑኒ ፆሳ ናይታ ጌተትድ ፄገታና መላ ፆሳይ ኑና አይ መላ ዶስዳኮ በእተ። ኑኒ ቱማካ ፆሳ ናይታ። ሀ አላመይ ፆሳ ኤሮና ግሾ ኑናካ ኤረና።

² ታ ሲቆ እሻቶ፥ ሀእ ኑኒ ፆሳ ናይታ፤ ኑኒ አይ ሀናኔኮ ቡሮ ኤረትቤና። ሽን ክርስቶስ ቆንጭያ ዎደ ኑኒ እያ ዳናናይሳ ኤሮስ። እ ቱማ ደኤይሳ ኑኒ በአና።

³ ክርስቶሳ በአና ግድ ኡፋይሳን ናግያ ኦንካ፥ ክርስቶስ ጌሽ ግድዳይሳዳ ባና ጌሼስ።

⁴ ናጋር ህገ መን ግድያ ግሾ ናጋራ ኦያ ኡባይ ፆሳ ህገ መንስ።

⁵ ክርስቶስ አሳ ናጋራ ይሳናዉ ቆንጭዳይሳ ህንተ ኤሬታ፤ እያን ናጋር ባዋ።

⁶ ክርስቶሳን ደእያ ኦንካ ናጋራን ዴና። ቃስ ናጋራን ደእያ ኦንካ እያ በእቤና ዎይኮ ኤርቤና።

⁷ ታ ናይቶ፥ ህንተና ኦንካ ባለፎ። ክርስቶስ ፅሎ ግድዳይሳዳ ፅሎ ኦያ ኦንካ ፅሎ።

⁸ ፃላሄይ ኮይሮፐ ናጋራ ኦዳ ግሾ ናጋራ ኡባ ዎደ ኦያ ኦንካ ፃላሄ ዳቦ። ሄሳ ግሾ፥ ፆሳ ናአይ ፃላሄ ኦሶ ይሳናዉ ቆንጭስ።

⁹ ፆሳ ናአ ግድያ ኦንካ ፆሳ አያናይ እያን ደእያ ግሾ፥ እ ኡባ ዎደ ናጋራን ዴና። ፆሳይ እያ አዋ ግድያ ግሾ ናጋራን ዴና።

¹⁰ ፆሳ ናይታ ግዶንነ ፃላሄ ናይታ ግዶን ደእያ ዱማተይ ሄሳን ኤረቴስ፤ ፅሎ ኦና አስ ዎይኮ ባ እሻ ዶሶና አስ ፆሳ ናአ ግደና።

እሶይ እሱዋ ዶስተ

¹¹ ኮይሮፐ ህንተ ስእዳ ኪታይ፥ “እሶይ እሱዋ ዶሳናዉ በሴስ” ግያ ኪታ።

¹² ኑኒ ቃየላ መላ ግዳናዉ በሰና። ቃየላ ፃላሄ ዳቦ ግድድ ባ እሻ ዎስ። እ ባ እሻ አይስ ዎዴ? እያ ኦሶይ ኢታ ግድዳ ግሾነ እያ እሻ ኦሶይ ሎኦ ግድዳ ግሾ ዎስ።

¹³ ታ እሻቶ፥ ሀ አላምያ አሳይ ህንተና እፅኮ ማላለቶፍተ።

¹⁴ ኑኒ ኑ እሻታ ሲቅያ ግሾ፥ ሀይቆፐ ደኦ ፕንዳይሳ ኤሮስ። ባ እሻ ዶሶና ኦንካ ሀይቆ ኩያን ደኤስ።

¹⁵ ባ እሻ እፅያ ኦንካ ሸምፖ ዎስ። ቃስ ሸምፖ ዎያ ኦደስካ መርና ደኦይ ባይናይሳ ህንተ ኤሬታ።

¹⁶ ክርስቶስ ባ ሸምፑዋ ኑ ግሾ አድ እምዳይሳን ሲቆይ አይበኮ ኑኒ ኤርዳ። ኑካ ኑ እሻታ ግሾ ኑ ሸምፑዋ አድ እማናዉ በሴስ።

¹⁷ ሽን ዱረ ግድዳ ኦንካ መቶታንቹዋ በእሸ፥ እያዉ ቃቶና እፅኮ ባ ዎዛናን ፆሳ ሲቆይ ደኤስ ጋናዉ ዋንድ ዳንዳኢ?

¹⁸ ታ ናይቶ፥ ኑኒ ኦሶንነ ቱማተን ኑ ሲቁዋ ቆንጭሳናዉ በሴስፐ አትሽን፥ ጮ ኦዳ ፃላላን ዎይኮ ዶና ፃላላን ሲቀታናዉ በሰና።

¹⁹ ኑኒ እሶይ እሱዋ ሲቅኮ፥ ኑ ቱማ ባጋ ግደይሳ ኤሮስ፤ ሄሳስ ፆሳ ስንን ዬላቶኮ።

²⁰ ኑ ዎዛናይ ኑ ቦላ ፕርድያባ ግድኮ፥ ፆሳይ ኑ ዎዛናፐ ግታ ግደይሳ ኤሮስ፤ እ ኡባባ ኤሬስ።

²¹ ታ ሲቆ እሻቶ፥ ኑ ዎዛናይ ኑ ቦላ ፕርዶናባ ግድኮ ኑኒ ፆሳ ስንን ያዮኮ።

²² ኑኒ እያ ኪታ ናግያ ግሾነ እያ ኡፋይስያባ ኦያ ግሾ ዎስያባ ኡባ እያፐ ኤኮስ።

²³ ክርስቶስ ኑና ኪትዳይሳዳ ፆሳ ናኣ የሱስ ክርስቶሳ ሱንን አማናናዳነ እሶይ እሱዋ ሲቃናዳ ፆሳይ ኑና ኪትስ።

²⁴ ፆሳ ኪታ ናግያ ኦንካ ፆሳን ደኤስ፤ ፆሳይካ እያን ደኤስ። ፆሳይ ኑስ እምዳ ጌሻ አያና ባጋራ እ ኑናን ደኤይሳ ኤሮስ።