1 ዮሃንሳ 2 - ጌሻ ማፃፋ

ክርስቶስ ኑስ ጋናቴስ

¹ ታ ናይቶ፥ ናጋራ ህንተ ኦና መላ ታኒ ሀይሳ ህንተዉ ፃፋይስ። ሽን ኦንካ ናጋራ ኦኮ አዋ ማታን ኑስ ጋናትያ ፅሎይ፥ የሱስ ክርስቶሲ፥ ደኤስ።

² ኑ ናጋራይ ክርስቶሳ ባጋራ አቶ ጌተቴስ። እ ኑ ናጋራ ፃላላስ ግዶናሽን፥ አሳ ኡባ ናጋራስ ያርሸትስ።

³ ኑኒ ፆሳ ኪታ ናግኮ፥ ስይ ባይናሽን፥ ቱማ ኑ እያ ኤሮስ።

⁴ ኦንካ፥ “ታኒ እያ ኤራይስ” ያግሸ፥ እያ ኪታ ናጎና እፅኮ ሄ ኡራይ ዎርዳንቾ፤ ቱማተ እያን ባዋ።

⁵ ሽን እያ ቃላስ ኑ ኪተትያባ ግድኮ ሄ ኡራይ ፆሳ ሲቅያ ሲቆይ ፖሎ ግዴስ። ኑኒ ፆሳን ደኤይሳስ ሄስ ባዉ ቱማ ማርካ።

⁶ ታኒ፥ “ፆሳን ደአይስ” ግያ ኦንካ ክርስቶስ ደእዳይሳዳ ዳናዉ በሴስ።

ኦራ ኪታ

⁷ ታ ሲቆ እሻቶ፥ ታኒ ህንተዉ ኮይሮፐ ደእያ ጋልአ ኪታ ፃፋይስፐ አትሽን፥ ኦራ ኪታ ፃፍከ። እካ ህንተ ስእዳ ሄ ጋልአ ኪታ።

⁸ ግድኮካ፥ ክርስቶሳንነ ህንተናን ቱማ ግድድ ደእያ፥ ኦራ ኪታ ፃፋይስ። ማይ ክችን፥ ሀእ ቱማ ፖኦይ ፖኤስ።

⁹ “ፖኦን ደአይስ” ግሸ ባ እሻ እፅያ ኦንካ፥ ሀእካ ማን ደኤስ።

¹⁰ ባ እሻ ዶስያ ኦንካ ፖኦን ደኤስ። ሄ ኡራን ሀራ አስ ብያባይ ባዋ።

¹¹ ሽን ባ እሻ እፅያ ኦንካ ማን ደኤስ፤ ማን ሄመቴስ። ማይ እያ አይፍያ ቆቅስዳ ግሾ አዉ ብያኮ ኤረና።

¹² ታ ናይቶ፥ ክርስቶሳ ሱን ባጋራ ህንተ ናጋራይ አቶ ጌተትዳ ግሾ ታኒ ህንተዉ ፃፋይስ።

¹³ አዋቶ፥ ኮይሮፐ ደእያ፥ እያ ህንተ ኤርዳ ግሾ ህንተዉ ፃፋይስ። ያላጋቶ፥ ፃላህያ ህንተ ፆንዳ ግሾ ህንተዉ ፃፋይስ።

¹⁴ ጉ ናይቶ፥ ፆሳ ህንተ ኤርዳ ግሾ ህንተዉ ፃፋይስ። አዋቶ፥ ኮይሮፐ ደእያ እያ ህንተ ኤርዳ ግሾ ህንተዉ ፃፋይስ። ያላጋቶ፥ ህንተ ምኖ ግድያ ግሾ፥ ፆሳ ቃላይ ህንተናን ደእያ ግሾነ ፃላህያ ህንተ ፆንዳ ግሾ ህንተዉ ፃፋይስ።

¹⁵ አላመ ዎይኮ አላመን ደእያባ ዶሶፕተ። አላምያ ዶስያ ኦንካ ፆሳ ዶሰና።

¹⁶ አላመን ደእያ ኡባባይ፥ አሾ አሞተ፥ አይፈን በእድ አሞትያባይነ ሚሸን ጬቀተ አላመባፐ አትሽን፥ ፆሳፈ ግደና።

¹⁷ አላመይነ አላመን አስ አሞትያ ኡባይ አና፥ ሽን ፆሳ ሸነ ፖልያ ኦንካ መርናዉ ዳና።

ክርስቶሳራ ኤቀትያ ሞርክያ

¹⁸ ታ ናይቶ፥ ዎድያ ዉርሰይ ማታትስ። ክርስቶሳ ሞርከይ ስንፈ ያናይሳ ህንተ ስእዳይሳዳ ሀር አቶሽን፥ ሀእካ እያ ሞርከት ዳሮት ደንድዶሶና። ሄሳ ግሾ፥ ዎድያ ዉርሰይ ማታትዳይሳ ኑኒ ሄሳን ኤሮስ።

¹⁹ ሄ ሞርከት ኑ ባጋ ግዶና ግሾ ኑ ግዶፈ ከይዶሶና። ኤንቲ ኑ ባጋ ግድያኮ ኑ ግዶን ደአና፥ ሽን ኤንታፈ ኦንካ ኑ ባጋ ግዶናይስ ኤረታና መላ ኑ ግዶፈ ከይዶሶና።

²⁰ ሽን ክርስቶስ ህንተ ቦላ ጌሻ አያና ጉስስ፤ ቃስ ህንተ ኡባይ ቱማ ኤሬታ።

²¹ ቱማ ህንተ ኤርያ ግሾነ ቱማን አይባ ዎርዶይ ባይናይሳ ህንተ ኤርያ ግሾ፥ ታኒ ህንተዉ ፃፋይስፐ አትሽን፥ ቱማ ህንተ ኤሮና ግሾ ግደና።

²² የሱሲ፥ ፆሳይ ዶርዳይሳ ግደና ግድ ካድያ አሳፐ ሀር ዎርዳንቾይ ኦኔ? ሄሳ መላ አስ ክርስቶሳ ሞርከ። እ ናኣ ካድኮ አዋካ ካዴስ።

²³ ናኣ ካድያ ኦደስካ አዋይ ባዋ፤ ቃስ ናኣስ ማርካትያ ኦደስካ አዋይ ደኤስ።

²⁴ ሄሳ ግሾ፥ ኮይሮ ህንተ ስእዳ ቃላ ህንተ ዎዛናን ምንድ ናግተ። ኮይሮ ስእዳይሳ ህንተ ናግኮ ህንተዉ ናአራነ አዋራ እስፈተ ዳና።

²⁵ ናአይ ኑስ መርና ደኡዋ እማና ግድ ቃላ ገልስ።

²⁶ ህንተና ባለያ አሳ ግሾ ታኒ ሀይሳ ህንተዉ ፃፋስ።

²⁷ ሽን ክርስቶስ ህንተ ቦላ ባ ጌሻ አያና ጉስስ። ጌሻ አያናይ ህንተናን ደእያ ግሾ ኦንካ ህንተና ታማርሶ ኮሸና። እያ ጌሻ አያናይ ህንተና ቱማ ታማርሰስፐ አትሽን፥ ዎርዶ ግደና። ጌሻ አያናይ ህንተና ታማርስዳይሳዳ ክርስቶሳን ደእተ።

²⁸ ህዛ፥ ታ ናይቶ፥ እ ቆንጭያ ዎደ ኑኒ ያሽ ባይናነ እያ ዩሳ ጋላስ እያ ስንን ኑ ዬላን ቆሰቶና መላ እያን ደእተ።

²⁹ ክርስቶስ ፅሎ ግደይሳ ህንተ ኤርኮ ፅሎ ኦያ ኡባይ ፆሳ ናአ ግደይሳ ኤርተ።