1 ቆሮንቶሳ 8 - ጌሻ ማፃፋ

ኤቃስ ያርሸትዳ ካባ

¹ ኤቃስ ያርሸትያ ካባ ግድኮ ኑ ኡባይ ኤሮስ። ኤራተ ኦቶርሴስ፥ ሽን ሲቆይ ድቼስ።

² ኦንካ ባና ኤራይስ ግድ ቆፕኮ፥ እ ቡሮ ኤራናዉ በሰይሳ ኤርቤና።

³ ሽን ኦንካ ፆሰ ሲቅኮ፥ እ ፆሳ ማታን ኤረትዳይሳ።

⁴ ሄሳ ግሾ፥ ኤቃስ ያርሸትዳ ካ ሙሳባ ግድኮ፥ ሀ አላምያን ጎድ እስ ፆሳፈ አትሽን፥ ሀር ባይና ግሾ፥ ኤቅ ፓናባ ግደይሳ ኑኒ ኤሮስ።

⁵ ፆሰ ግዶናሽን፥ ሳሎንነ ሳአን ፆሰ ጌተትድ ፄገትያ ዳሮ ፆሳትነ ጎዳት ደእኮካ፥

⁶ ኡባባ መዳ፥ ኑ እያባ ግድዳ፥ እስ ፆሲ፥ አው፥ ኑስ ደኤስ። ኡባይ እያ ባጋራ መትዳ፥ ኑካ እያ ባጋራ ደኦ ደምዳ እስ ጎዳይ፥ የሱስ ክርስቶሲ ኑስ ደኤስ።

⁷ ሽን ሀ ኤረይ ኡባ ማታን ዴና። እስ እስ አሳይ ኤቃ ጎይኖራ ሜዘትዳ ግሾ፥ ካ ምያ ዎደ ኤቃስ ያርሸትዳባ ኦድ ኤኮሶና። ሄ ዎደ ኤንታ ካሀይ ዳቡራ ግድያ ግሾ ቱኔስ።

⁸ ሽን ካ ኑና ፆሳራ ዳቦየና። ኑ ሞና አግድ አይኮካ ቆሄቶኮ፤ ቃስ ምድ ዱማ ጎኤቶኮ።

⁹ ሽን ህንተ ኮይዳባ ማናዉ ማት ህንተዉ ደእኮካ ሄስ አማኖን ምኖና አሳታ ቦና መላ ናገትተ።

¹⁰ ኔኒ ነና ኤራንቾ ጋዳ ኤቃስ ያርሸትዳ ካ ማናዉ ኤቃ ኬን ኡትዳሽን፥ አማኖን ምኖና አስ ነና በእኮ፥ ሄስ ኤቃስ ያርሸትዳ ካ እ ማና መላ ደንነዬ?

¹¹ ህዛ፥ ነ ኤራተ ጋሶን ክርስቶስ እያ ግሾ ሀይቅዳ፥ አማኖን ምኖና ነ እሻይ ይስ።

¹² ሄሳዳ ኦድ፥ አማኖን ምኖና ህንተ እሻታ ቆህሸነ ኤንታ ካሀ ማዱንፅስሸ ክርስቶሳ ቆሄታ።

¹³ ሄሳ ግሾ፥ ካ ታ እሻ ብያባ ግድኮ፥ እ በቶና መላ ኡባራካ አሾ ሚከ።