1 ቆሮንቶሳ 6 - ጌሻ ማፃፋአሳ ግዶን ደእያ ሞቶ 1 ህንተ ግዶፈ እሶይ እሱዋራ ሞቶይ ደእኮ፥ ሄሳ አማንያ አሳ ስንን ፕርደታናይሳ አግድ፥ አማኖና አሳ ስንን ፕርደታናዉ ዋንድ ቢ? 2 አማንያ አሳይ አላመ ቦላ ፕርዳናይሳ ህንተ ኤረከቲ? ያትን፥ ህንተ አላመ ቦላ ፕርድያባ ግድኮ፥ ሀይሳ መላ ጉባ ፕርዳናዉ ዋንድ ዳንዳኤከቲ? 3 ኑኒ ኪታንቾታ ቦላ ፕርዳናይሳ ኤረከቲ? ያትን፥ ሀ ሳአ ዱሳባ ቦላ ፕርዳናይስ ህንተና ዋንድ ፆኒ? 4 ያትን፥ ሄሳ መላ መቶይ ህንተ ግዶን መትኮ፥ ዎሳ ኬ አይፈን ካትዳ አሳ ስንን ፕርደታናዉ ዋትድ ኤፌቲ? 5 ታኒ ህንተና ዬላያናዉ ሄሳ ጋይስ። ህንተ ግዶን ካጨትዳ እሻታ ስገናዉ ዳንዳእያ አኬካ አስ ባዌ? 6 ያትን፥ እስ አማንያ እሻይ ሀንኮ አማንያ እሻ ፕርዳ ኬን አማኖና አሳ ስንን ሞታናዉ በሲ? 7 ህዛ፥ ህንተ እሶይ እሱዋ ሞትያባ ግድኮ ሄስ ህንተ ኩንደ በሴስ። ሄሳፈ ህንተ ቆሄትኮ ኬሄኔ? ህንተ ጭመትኮ ሎኤኔ? 8 ሽን ህንተ ዎል ግዶን አማነይሳት፥ እሶይ እሱዋ ቆሄታነ ጭሜታ። 9 ጌላት ፆሳ ካዎተ ላቶናይሳ ህንተ ኤረከቲ? ህንተና ጭሞፍተ፤ ላይማተይሳት ዎይኮ ኤቃ ጎይነይሳት ዎይኮ ላመይሳት ዎይኮ አደራ አደራ ጋሄተይሳት፥ 10 ዎይኮ ካይሶት ዎይኮ ኡዘት ዎይኮ ማተይሳት ዎይኮ ጫየይሳት ዎይኮ ቦንቀይሳት ፆሳ ካዎተ ላቶኮና። 11 ህንተፈ እስ እስ አሳት ካሰ ሄሳ መላ። ሽን ሀእ፥ ህንተ ጎዳ የሱስ ክርስቶሳ ሱንንነ ፆሳ አያናን ሜጨትደታ፤ ጌይደታ፤ ፅልደታ። ህንተ አሳተን ፆሰ ቦንችተ 12 ህንተ፥ “ኑ ኮይዳባ ኦናዉ ዳንዳኦስ” ያጌታ። ሽን ኡባይ ማደና። “ታኒ ኮይዳባ ኡባ ኦናዉ ዳንዳአይስ” ያጌታ። ሽን አይብካ ታና ሃረና። 13 ህንተ፥ “ካ ኡሎሳ፤ ኡሎይካ ካሳ” ያጌታ። ሽን ፆሲ ኡሎካ ካካ ይሳናይሳ ታ ህንተዉ ኦዳይስ። ኑ አሳተይ ጎዳሳፈ አትሽን፥ ላይማተስ ግደና። ጎዳይካ ኑ አሳተሳ። 14 ፆሳይ ጎዳ ሀይቆፐ ደንዳይሳዳ፥ ኑናካ ሀይቆፐ ባ ዎልቃን ደንና። 15 ህንተ አሳተይ ክርስቶሳ አሳተፈ እስ ባጋ ግደይሳ ኤረከቲ? ያትን፥ ታኒ ክርስቶሳ አሳተፈ እስ ባጋ ኤፋዳ ላይማተ አሳተ ግዳና መላ ኦ? ሀነና! 16 ላይማትያ አደይ፥ እ ጋሄትያ ማጫሴራ እስ አሳተ ግደይሳ ኤረከቲ? ጌሻ ማፃፋን፥ “ኤንቲ ናምአይ እስ አሳተ ግዳና” ጌተትድ ፃፈትስ። 17 ሽን ጎዳራ እስፍያ አስ እያራ አያናን እስኖ ግዴስ። 18 ላይማተፈ ሃክተ። እስ አስ ኦያ ሀራ ናጋር እያ አሳተፈ ካረራ ኦሰቴስ፥ ሽን ላይማትያ አስ ባ አሳተ ቦላ ናጋራ ኦስ። 19 ህንተ አሳተይ፥ ፆሳይ ህንተዉ እምዳ ህንተናን ደእያ ጌሻ አያና ኬ ግደይሳ ኤረከቲ? ህንተ ህንተባ ግደከታ። 20 ፆሳይ ህንተና ጋተን ሻምስ። ሄሳ ግሾ፥ ህንተ አሳተን ፆሰ ቦንችተ። |
The Word for the World International and The Word for the World Ethiopia