1 ቆሮንቶሳ 4 - ጌሻ ማፃፋ

ክርስቶሳ ሀዋረታ

¹ አሳይ ኑና ክርስቶሳ አይለዳነ ፆሳ ፁራ ቆንጭሳናዉ ሀዳር እመትዳ አሳዳ ኦድ ቆፖ።

² ሀዳራ ኤክዳ አሳት ባንታ ጎዳስ አማነትዳይሳታ ግዳናዉ በሴስ።

³ ሽን ህንተ ዎይኮ ሀር ታና ፕርድኮ፥ ታዉ አይኮካ ግደና። ሀር አቶሽን፥ ታካ ታ ቦላ ፕርድከ።

⁴ ታ ካሀይ ጌሽ፥ ሽን ሄስ ታኒ ፖሎ ፅሎ ግደይሳ በሰና። ታ ቦላ ፕርዳናይ ጎዳ ፃላላ።

⁵ ሄሳ ግሾ፥ ዎደይ ጋኮና፥ ጎዳይ ዮና ኦደ ቦላካ ፕርዶፍተ። እ ማን ጌምዳባ ፖኦን ከሰና፤ አሳ ዎዛናን ቆሰትዳ ቆፋ ቆንጭሳና። ሄ ዎደ፥ እሶይ እሶይ ፆሳፈ ጋላታ ኤካና።

⁶ ታ እሻቶ፥ ህንተ ግሾ፥ ታናነ አጵሎሳ፥ ህንተዉ ሌምሶ ኦዳ ኦዳስ። ሄሳ ታ ኦዳይ፥ “ፃፈትዳይሳፈ አፋ” ግያ ዞርያ ህንተ ኑፐ ታማራና መላሳ። ሄሳ ግሾ፥ ኦንካ እሱዋ ሳብድ ሀንኩዋ ካናዉ በሰና።

⁷ ነ ሀራታፐ አይብን አይ? ኔኒ ኤካቦናባይ አይብ ደኢ? ኔኒ ኤክዳባ ሀራ አሳፐ ኤክዳ ግድኮ፥ ያትን፥ ኤክቦና አሳዳ አይስ ጬቀታይ?

⁸ ሀእ ህንተ ካልደታ። ሀእ ህንተ ዱረትደታ። ኑኒ ባይና ህንተ ፃላላ ካዎትደታ። ህንተ ቱማ ካዎትዳባ ግድያኮ፥ ኑካ ህንተራ ካዎታናሽን።

⁹ ታዉ፥ ፆሳይ ኑና ሀዋረታ፥ ሀይቆስ ፕርደትዳ አሳዳ፥ አሳ ኡባፈ ኑና ጉየ አዳ ዳኔስ። ኑኒ ሀ አላምያስ፥ ኪታንቾታስነ አሳስ ካሳባ ግድዳ።

¹⁰ ኑኒ ክርስቶሳ ግሾ ኤያ ግድዳ፥ ሽን ህንተ ክርስቶሳን ጭንጫታ ግድደታ። ኑኒ ዳቡራንቾ፥ ሽን ህንተ ምኖ ግድደታ። ህንተ ቦንቸትደታ፥ ሽን ኑኒ ቶሸትዳ።

¹¹ ሀእ ጋካናዉ ኑ ኮሻቶስ፥ ሳሞቶስ፥ ካሎቶስ፥ ዋቶስ፤ ዳና ሶ ይድ ቶይላቶስ።

¹² ኑኒ ኑ ኩሸን ኦድ አቆስ። ኑና አስ ባድያ ዎደ አንጆስ፤ ኑና ጎድያ ዎደ ዳንዳኦስ።

¹³ ኑ ቦላ ኢታባ ኦደትያ ዎደ ሎኦ ቃላ ዛሮስ። ኑ ሀእ ጋካናዉ ሀ አላምያ ፕቶነ ዎራ የገትያ ቡረ ግድዳ።

¹⁴ ታኒ ሄሳ ፃፍዳይ፥ ታ ዶስያ ናይታዳ፥ ህንተና ዞራናዉ ፃፋስፐ አትሽን፥ ዬላያናዉ ግደና።

¹⁵ ክርስቶሳን ህንተና ድችያ ታይቦፐ ቦላ ግድዳ ካለይሳት ደእኮካ፥ ህንተዉ ዳሮ አዋት ዶኮና። ታ ህንተና ክርስቶስ የሱሳ ዎንገላን የላስ።

¹⁶ ህዛ፥ ህንተ ታና ሌምሶ ኦድ ካላና መላ ህንተና ዎሳይስ።

¹⁷ ሄሳ ግሾ፥ አማነትዳ፥ ታ ዶስያ፥ ጎዳን ታ ናአ፥ ፅሞትዮሳ ህንተኮ ኪታይስ። እ ዱማ ዱማ በሳን ደእያ ዎሳ ኬን ታኒ ታማርስዳ፥ ክርስቶሳ የሱሳን ደእያ፥ ታ ኦግያ ህንተና ሀሳይሳና።

¹⁸ ታኒ ህንተኮ ዮናባ ዳንን፥ ኦቶርትያ እስ እስ አሳት ደኦሶና።

¹⁹ ሽን ጎዳይ ጊኮ፥ ማታ ዎደ ታኒ ህንተኮ ባና። ሄ ዎደ ኦቶራንቾታ ሃሳያ ፃላላ ግዶናሽን፥ ኤንታ ዎልቃካ ኤራና።

²⁰ ፆሳ ካዎተይ ኦዳ ግዶናሽን፥ ዎልቃ።

²¹ ታኒ ህንተኮ ፃምአራ ቦየ ዎይኮ ሲቆራነ አሽከ አያናራ ቦ? አዉሳ ዶረቲ?