1 ቆሮንቶሳ 3 - ጌሻ ማፃፋ

ዎሳ ኬን ደእያ ሻከተ

¹ ታ እሻቶ፥ ህንተ ክርስቶሳን ቡሮ ዮጋነ አማኖና አሳ ደእያ ግሾ፥ ታኒ አያናባ ህንተዉ ኦዳናዉ ዳንዳአብከ።

² ህንተ ምኖ ካ ማናዉ ዳንዳእቦና ግሾ፥ ታኒ ህንተና ማ ፓሀስ፤ ሀእካ ዳንዳእቤከታ።

³ ሀእካ ህንተ አማኖና አሳዳ ደኤታ። ህንተ ግዶን ደእያ ቃናተይነ ኦሽ ህንተ አማኖና አሳዳ ደኤይሳ ኤርሰኔ? ህንተ አማኖና አሳዳ ሀኔታ።

⁴ ህንተፈ እሶይ፥ “ታኒ ጳዉሎሳሳ” ሀራይ ቃስ፥ “ታኒ አጵሎሳሳ” ጊኮ፥ አማኖና አሳ መላ ግደከቲ?

⁵ ያትን፥ አጵሎስ ኦኔ? ጳዉሎስ ኦኔ? ኑኒ ህንተና አማንዳ ፆሳ ኦሳንቾታ። ፆሳይ እሱዋስ እሱዋስ እምዳ እሞታ መላ ኦያ ኦሳንቾታ ግዶኮናዬ?

⁶ ታኒ ቶካስ፤ አጵሎስ ሃ ኡሽስ፥ ሽን ድቸይ ፆሰ።

⁷ ሄሳ ግሾ፥ ድችያ ፆሳፈ አትሽን፥ ቶከይካ ሃ ኡሸይካ አይኮካ ግደና።

⁸ ቶከይነ ሃ ኡሸይ ዎል መላ፥ ሽን እሶይ እሶይ ባ ኦሱዋ መላ ፆሳይ እምያ ዎይቱዋ ኤካና።

⁹ ኑኒ እስፈ ፆሳስ ኦያ እያ ኦሳንቾታ ግድያ ግሾ፥ ህንተ ፆሳ ሾቃ፤ ፆሳ ኬ።

¹⁰ ፆሳይ ታዉ እምዳ አ ኬሀተ መላ ሂላንቾ አናፀዳ ባሶ የጋስ። ሀራ አስ እያ ቦላ ኬፄስ። ሽን እያ ቦላ ኬፅያ ኦንካ ዋትድ ኬፅያኮ፥ ባዉ ናገቶ።

¹¹ እስ ቶሆ የገትዳ ባሶፐ ሀራ ባሶ የጋናዉ ኦንካ ዳንዳኤና። ሄ ባሶይካ የሱስ ክርስቶሳ።

¹² ሽን ሀ ባሱዋ ቦላ ኦንካ ዎርቃን ዎይኮ ብራን ግድን፥ አልኦ ሹቻን ዎይኮ ምን ግድን፥ ማታን ዎይኮ ማቃን ኬፅኮ፥

¹³ እስ እስ አስ ሄ ባሱዋ ቦላ አይብን ኬፅዳኮ ፕርዳ ጋላስ ታማን ፓጨትድ ቆንጫና።

¹⁴ ኦንካ ሄ ባሱዋ ቦላ ኬፅዳ ኬይ ታማን ፁገቶና አትኮ፥ ባ ዎይቱዋ ኤካና።

¹⁵ ሽን ኦደ ኦሶይካ ታማን ፁገትኮ፥ ሄ ኡራስ ዎይቶይ ባዋ። ግዶሽን፥ እ ባ ሁጰን ታማፐ ከስ ኤክዳ አሳዳ አታና።

¹⁶ ህንተ ፆሳ ኬ ግደይሳነ ፆሳ አያን ህንተናን ደኤይሳ ኤረከቲ?

¹⁷ ኦንካ ፆሳ ኬ ላልኮ፥ ፆሲ እያ ላላና። ፆሳ ኬ ጌሽ፤ ሄ ኬይካ ህንተና።

¹⁸ ኦንካ ባና ጭሞፎ። ሀ ሳኣ ጭንጫተን ባና ጭንጫ ኦድ ኤክያ ኦንካ ፆሳ ስንን ጭንጫ ግዳናዉ ኤያ ግዶ።

¹⁹ ሀ ሳአ ጭንጫተይ ፆሳ ስንን ኤያተ። ጌሻ ማፃፋን፥ “ፆሳይ ጭንጫታ ኤንታ ገነ ቆፋን ኦይኬስ” ያጌስ።

²⁰ ቃስ፥ “ጭንጫታ ቆፋይ ማዶናባ ግደይሳ ጎዳይ ኤሬስ” ያጌስ።

²¹ ሄሳ ግሾ፥ ኡባይ ህንተባ ግድያ ግሾ፥ ኦንካ አሳን ጬቀቶፎ።

²² ጳዉሎስ፥ አጵሎስነ ጰፅሮስ፥ ሀ አላመይ፥ ደኦይ፥ ሀይቆይ፥ ሀእ ደኤይ፥ ስንፈ ያናይስ፥ ኡባይ ህንተሳ።

²³ ህንተ ክርስቶሳሳ፤ ክርስቶስ ፆሳሳ።