1 ቆሮንቶሳ 2 - ጌሻ ማፃፋ

¹ ታ እሻቶ፥ ታኒ ኮይሮ ፆሳ ቃላ ህንተዉ ኦዳሸ ይዳ ዎደ፥ ዶና ብላተንነ ጭንጫተን ያቢከ።

² ታኒ ህንተራ ደእያ ዎደ ማስቃልያ ቦላ ካቀትዳ የሱስ ክርስቶሳፐ አትሽን፥ ሀራባ ኤራናዉ ኮይከ ጋዳ ታ ቆፋ ቃቻስ።

³ ታ ህንተራ ደእያ ዎደ ዳቡራን፥ ያሻንነ ዳሮ ኮኮርሳን ደአስ።

⁴ ታ ኪታይነ ታ ትምርተይ ዶና ብላተንነ ጭንጫተን ግዶናሽን፥ ጌሻ አያና ዎልቃ ቆንጭሰና።

⁵ ሄስካ፥ ህንተ አማኖይ ፆሳ ዎልቃናፐ አትሽን፥ አሳ ጭንጫተን ዘምፖና መላሳ።

ፆሳ ጭንጫተ

⁶ አያና ደኦን ድጭዳይሳታስ ኑኒ ጭንጫተ ቃላን ኦዶስ። ሽን ሄ ጭንጫተይ፥ ሀ ሳአ ጭንጫተ ዎይኮ ያናዉ ደእያ ሀ ሳአ ሃረይሳታ ጭንጫተ ግደና።

⁷ ሽን ኑኒ ኦድያ ጭንጨተይ፥ ዳሮ ዎደፐ ስን ፆሳይ ኑ ቦንቹዋስ ጊግስዳይሳነ ጌምድ ደእያ ፁራ ጭንጫተ።

⁸ ሀ ሳኣ ሃረይሳታፐ ኦንካ ሀ ጭንጫተ ኤርቦኮና። ኤንቲ ኤርዳባ ግድያኮ፥ ቦንቾ ጎዳ ማስቃልያ ቦላ ካቆኮና።

⁹ ሽን ጌሻ ማፃፋን፥ “አይፈይ በእቦናባ፥ ሀይ ስእቦናባ፥ ዎዛን ቆፕቦናባ፥ ፆሳይ ባና ዶሰይሳታስ ጊግስስ” ያጌስ።

¹⁰ ፆሳይ ባ ፁራ ባ አያና ባጋራ ኑስ ቆንጭስስ። ጌሻ አያናይ ሀር አቶሽን፥ ጌምዳ ፆሳ ፁራ ኡባ ፕልጌስ።

¹¹ አሳን ደእያ አሳ አያናፐ አትሽን፥ አሳባ ኦንካ ኤረና። ሄሳዳካ፥ ፆሳባ፥ ፆሳ አያናፐ አትሽን፥ ኦንካ ኤረና።

¹² ፆሳይ ኑስ ጮ እምዳባ ኑ ኤራና መላ ፆሳ አያና ኤክዳፐ አትሽን፥ ሀ ሳአ አያና ኤክቦኮ።

¹³ ኑኒ አያናባ፥ አያና አሳታስ አሳ ጭንጫተን ግዶናሽን፥ ፆሳ አያናይ እምያ ጭንጫተን ታማርሶስ።

¹⁴ ጌሻ አያን ባይና አስ ፆሳ አያና እሞታታ ኤከና። ሄስ እያዉ ኤያተ፤ ኡባይ ጌሻ አያናን ፕልገትያ ግሾ፥ እ ኤራናዉ ዳንዳኤና።

¹⁵ ጌሻ አያን ደእያ አስ ኡባባ ፕልጌስ፥ ሽን እያ ኦንካ ፕልገና።

¹⁶ ጌሻ ማፃፋን፥ “ጎዳ ዎዛና ኤረይ ኦኔ? እያ ዞራናዉ ዳንዳኤይ ኦኔ?” ጌተትድ ፃፈትዳይሳ መላ። ሽን ኑስ ክርስቶሳ ዎዛን ደኤስ።