1 ቆሮንቶሳ 14 - ጌሻ ማፃፋ

ትንብተነ ዱማ ዱማ ዶና

¹ ሲቆ ካልተ። አያና እሞታታ ምንድ ኮይተ፤ ኡባፈ አድ፥ ትንብተ እሞታ ምንድ ኮይተ።

² ዱማ ዱማ ዶናን ኦደትያ አስ ፆሳስ ኦዴስፐ አትሽን፥ አሳስ ኦደና። ሽን አሳስ ቆንጭቦና ፁራ አያና ዎልቃን ኦደትያ ግሾ፥ ኦንካ እ ኦደተይሳ አኬከና።

³ ሽን ትንብተ ኦደይሳት አሰ ድቻናዉ፥ ምንናዉነ ምንናዉ አሳስ ኦዴስ።

⁴ ዱማ ዱማ ዶናን ኦድያ አስ ባና ድቼስ። ሽን ትንብተ ኦድያ አስ ዎሳ ኬ ድቼስ።

⁵ ህንተ ኡባይ ዱማ ዱማ ዶናን ኦደትያኮ ታ ዶሳይስ፥ ሽን ትንብተ ኦዳናይሳ አዳ ዶሳይስ። ዱማ ዱማ ዶናን ኦደተይሳ ዎሳ ኬ ድቻናዉ ብርሽያ አስ ይኮ፥ ዱማ ዱማ ዶና ኦደተይሳፈ ትንብተ ኦደይስ አስ።

⁶ ሽን ታ እሻቶ፥ ታኒ ህንተኮ ባዳ፥ ቆንጨን ዎይኮ ኤራተን ዎይኮ ትንብተ ኦዶን ዎይኮ ትምርተን ግዶናሽን፥ ዱማ ዱማ ዶናን ኦደትኮ ህንተና አይ ማዳኔ?

⁷ ዱማ ዱማ የ ሚሸታስ እስ ቆሞ ግርስ ደእኮ፥ ሱሱልኤ ግርስነ ዲ ግርስ ዋትድ ሻክ ኤራኔ?

⁸ ቃስ ሞይዘ ፑኖይ ጌይድ ኤረቶና እፅኮ ኦላስ ጊገተይ ኦኔ?

⁹ ሄሳዳካ፥ ዱማ ዱማ ዶናን ህንተ ኦደተይስ ቆንጨ ግዶና እፅኮ ህንተ ኦደይሳ ኦን ኤራኔ? ሄስ ጫርኮስ ኦድያ መላ።

¹⁰ ሀ አላምያን ዳሮ ዶናት ደኦሶና፤ ሄ ኡባስ ብርሸ ደኤስ።

¹¹ ሽን እስ አስ ኦደትያ ዶና ታኒ ኤሮና እፅኮ እ ታዉ እማ ግዴስ፤ ታካ እያዉ እማ ግዳይስ።

¹² ሄሳዳካ፥ ጌሻ አያና እሞታ ህንተ ኤካናዉ ምንድ ኮይኮ፥ ዎሳ ኬ ድቻናዉ ኡባፈ አያ እሞታ ኮይተ።

¹³ ዱማ ዱማ ዶናን ኦደትያ አስ ባ ኦዳ ብርሻናዉ ብርሸ እሞታይ እመታና መላ ፆሳ ዎሶ።

¹⁴ ታኒ ዱማ ዱማ ዶናን ፆሳ ዎስኮ፥ ታ አያናይ ዎሴስ፥ ሽን ታ ዎዛናይ አይኮካ ጎኤተና።

¹⁵ ያትን፥ ታ አይ ኦናዉ ኮሺ? ታኒ ታ አያናን ዎሳይስ፤ ታ ዎዛናንካ ዎሳይስ። ታኒ ታ አያናን የፃይስ፤ ታ ዎዛናንካ የፃይስ።

¹⁶ ሄሳ ግዶና እፅኮ ኔኒ ነ አያናን ፆሳ ጋላትያ ዎደ ሄ በሳን ኔኒ ገይሳ ኤሮና አስ ነ ጋላተይሳ ዎይግድ፥ “አምንእ” ጋኔ?

¹⁷ ኔኒ ፆሳ ጋላተይስ ሎኦ፥ ሽን ሀራ አስ ማደና።

¹⁸ ታ ህንተ ኡባፈ አዳ ዱማ ዱማ ዶናን ኦደትያ ግሾ ፆሳ ጋላታይስ።

¹⁹ ሽን ታኒ ዎሳ ኬን ሀራታ ታማርሳናዉ ዱማ ዱማ ዶናን ታሙ ሙኩሉ ቃላ ኦደታናፐ እቻሹ ቃላ ኤረትያ ዶናን ኦደታናዉ ዶሳይስ።

²⁰ ታ እሻቶ፥ ህንተ ቆፋን ናይታዳ ሀኖፕተ። ህንተ ኢታባስ ናይታዳ ሀንተፐ አትሽን፥ ህንተ ቆፋን ካሃማታ ግድተ።

²¹ ጎዳይ፥ ጌሻ ማፃፋን፥ “ታኒ ሀ አሳስ፥ ዱማ ዱማ ዶናን ኦደትያ አሳንነ እማ እንፃርሳን ኦደትያ አሳን ኦዳና። ሽን ሄስ ሀንንካ ታና ስኦኮና” ያጌስ።

²² ህዛ፥ ዱማ ዱማ ዶናን ሃሳዮይ፥ አማኖና አሳስ ማላ ግዴስፐ አትሽን፥ አማንያ አሳሳ ግደና። ትንብተይ አማንያ አሳስ ማላ ግዴስፐ አትሽን፥ አማኖና አሳሳ ግደና።

²³ ዎሳ ኬ አሳይ እስፈ ሺቅያ ዎደ፥ ኡባይ ዱማ ዱማ ዶናን ኦደትኮ ኤሮና ዎይኮ አማኖና አሳይ ህንተ ሺቁዋ ይድ፥ “ሀይሳቲ ጎዮሶና” ጎኮናዬ?

²⁴ ሽን ኤሮና ዎይኮ አማኖና አሳይ ዎሳ ኬ ያ ዎደ አሳይ ትንብተ ኦድሽን፥ ስእኮ ባ ናጋራ አኬካና፤ ቃስ እ ስእዳ ቃላን ፕርደታና።

²⁵ ኤንቲ እያ ዎዛናን ጌምዳ ቆፋ ቆንጭሳና። ሄሳዳካ፥ “ቱማ ፆሳይ ህንተ ግዶን ደኤስ” ያግድ ማርካትድ፥ ጉፋንድ ፆሳስ ጎይናና።

ጎይኖ ማራ

²⁶ ታ እሻቶ፥ ኑ ዎይግኖ? ህንተ እስፈ ሺቅያ ዎደ እሱዋስ ማዝሙረይ ደኤስ፤ እሱዋስ ታማርሶ እሞት ደኤስ፤ እሱዋስ ቆንጨ ደኤስ፤ እሱዋስ ዱማ ዱማ ዶናን ሃሳዮይ ደኤስ፤ እሱዋስ ብርሸ እሞት ደኤስ። ሄ ኡባይ ዎሳ ኬ ድችያባ ግዳናዉ በሴስ።

²⁷ ዱማ ዱማ ዶናን ኦደትያ አሳት ደእኮ፥ ናምአ ዎይኮ ዳርኮ ሄ ግድድ ማራን ማራን ኦደታናዉ በሴስ። ኤንቲ ኦደተይሳ ሀራ አስ ብርሾ።

²⁸ ሽን ብርሽያ አስ ይኮ፥ ዱማ ዱማ ዶናን ኦደተይስ ዎሳ ኬን ስእ ጎ። ባዉነ ባ ፆሳስ ኦዶ።

²⁹ ትንብተ ኦደይሳት ናምአ ዎይኮ ሄ ግድድ ኦዶ። ቃስ ሀራት ኤንቲ ግያባ ፕርዶና።

³⁰ ሄ ሺቁዋን ደእያ ሀራ አሳስ እስባይ ቆንጭኮ ካሰ ኦደተይስ ስእ ጎ።

³¹ ኡባይ ታማራና መላነ ኡባይ ምናና መላ ማራን ማራን ትንብተ ኦዳናዉ ዳንዳኤታ።

³² ናበታ አያናይ ናበታስ ኪተቴስ።

³³ ጌሻታ ዎሳ ኬ ኡባይ ሜዘትዳይሳዳ ፆሳይ ሳሮተ ፆሳፈ አትሽን፥ ቡቀ መያ ፆሲ ግደና።

³⁴ ማጫስ ዎሳ ኬን ስእ ጎ። ሙሰ ህገይ ገይሳዳ ኤንቲ ሃረቶፈ አትሽን፥ ዎሳ ኬን ኦዳናዉ ኤንታዉ ማት ባዋ።

³⁵ ማጫስ ዎሳ ኬን ሃሳዮይ ቦርሶ ግድያ ግሾ እስባ ኤራናዉ ኮይኮ ሶን ባንታ አዝናታ ኦይቾና።

³⁶ ፆሳ ቃላ ኮይሮ ህንተ ኤህደቲ? ዎይኮ ፆሳ ቃላይ ህንተ ፃላላኮ ይዴ?

³⁷ ኦንካ ባና ናበ ዎይኮ ባና ፆሳ አስ ግድ ቆፕኮ፥ ታኒ ህንተዉ ፃፈይስ ጎዳ ኪታ ግደይሳ አኬኮ።

³⁸ ሽን ኦንካ አኬኮና እፅኮ እካ አኬከቶፎ።

³⁹ ሄሳ ግሾ፥ ታ እሻቶ፥ ትንብተ ኦዳናዉ ምንድ አሞትተ፤ ቃስ ዱማ ዱማ ዶናን ኦደተይሳካ ድጎፍተ።

⁴⁰ ሽን ኡባይካ ዎጋንነ ማራን ግዶ።