1 ቆሮንቶሳ 13 - ጌሻ ማፃፋ

ቱማ ሲቆ

¹ ታኒ አሳ ቃላነ ኪታንቾ ቃላ ኦደታናዉ ዳንዳእኮካ፥ ታዉ ሲቆይ ይኮ፥ ጮ ጊርያ ዳላ መላ።

² ትንብተ ኦድያ እሞት ታዉ ደእኮካ፥ ፁራ ኡባ ኤርኮካ፥ ኤራተ ኡባይ ደእኮካ፥ ቃስ ደርያ ደንድ ሀራሶ ኤፍያ አማኖይ ታዉ ደእኮካ፥ ሲቆይ ይኮ፥ ታ አይኮካ ግድከ።

³ ታዉ ደእያባ ኡባ ማንቆታስ እምኮካ፥ ሀር አቶሽን፥ ታና ታማስ አ እምኮካ፥ ሲቆይ ይኮ ታና አይኮካ ማደና።

⁴ ሲቆይ ዳንዳአንቾ። ሲቆይ ኬሀ። ሲቆይ ቃናተና። ሲቆይ ጬቀተና። ሲቆይ ኦቶረና።

⁵ ሲቆይ በሶናባ ኦና። ሲቆይ ኡዘተና። ሲቆይ ይሎተና። ሲቆይ ባ ቆሆ ፓይደና።

⁶ ሲቆይ ቱማን ኡፋይተስፐ አትሽን፥ ዎርዶን ኡፋይተና።

⁷ ሲቆይ ኡባ ዳንዳኤስ፤ ኡባ አማኔስ፤ ሎኦባይ ሀናና ግድ፥ ኡፋይሳን ናጌስ፤ ኡባ ገንጬስ።

⁸ ሲቆይ ዉርሰ ጋካናዉ የና። ሽን ትንብተይ አታና፤ ዱማ ዱማ ዶናን ኦደተይስ አታና፤ ኤራተካ አና።

⁹ ኑ ኤራተፈ ጉ ኤሮስ፤ ትንብተፐ ባጋ ኦዶስ።

¹⁰ ሽን ፖሎ ግድዳይስ ያ ዎደ ፖሎ ግዶናይስ አታና።

¹¹ ታኒ ናአ ደእያ ዎደ ናአዳ ሃሳይስ፤ ናአዳ ቆፓይስ፤ ናአዳ አኬካይስ። ታ ካሃምዳ ዎደ ናአተ ሀኑዋ አጋስ።

¹² ሀእ ፖኦይ ባይና ሶን ማስቶተን በኤይሳዳ በኦስ፥ ሽን ሄ ዎደ ኑ ቆንጨን በአና። ሀእ ኑ ኤራተፈ ጉ ኤሮስ፥ ሽን ሄ ዎደ ፆሳይ ኑና ኤረይሳዳ ፖሎ ኤራና።

¹³ ህዛ፥ አማኖይ፥ ኡፋይስነ ሲቆይ፥ ሀ ሄት ኤቅድ ዳና። ሽን ሀይሳታፐ አይ ሲቆ።