1 ቆሮንቶሳ 11 - ጌሻ ማፃፋ

¹ ታኒ ክርስቶሳ ሌምሱዋ ካለይሳዳ፥ ህንተካ ታና ካልተ።

ጎይኖ ማራ

² ህንተ ኡባባን ታና ቆፕያ ግሾነ ታኒ ታማርስዳ ትምርትያ ምንድ ናግዳ ግሾ ታኒ ህንተና ጋላታይስ።

³ ሽን ክርስቶስ አደ ኡባስ ሁጰ፥ አደይ ማጫሳስ ሁጰ፥ ቃስ ፆሲ ክርስቶሳስ ሁጰ ግደይሳ ህንተ ኤራና መላ ኮያይስ።

⁴ ባ ሁጵያ ጉሉንትድ ፆሰ ዎስያ ዎይኮ ትንብተ ኦድያ አደይ ኡባይ ሁጰ ግድዳ ክርስቶሳ ቶቼስ።

⁵ ባ ሁጵያ ቃጮና ፆሰ ዎስያ ዎይኮ ትንብተ ኦድያ ማጫስያ ሁጰ ግድዳ ባ አዝና ቶቻዉሱ። ባ ሁጵያ ቃጮና ማጫስያ ባ ሁጵያ ሜደትዳ ማጫሳ መላ።

⁶ ማጫስ ባ ሁጰ ካሞና እፅኮ፥ ባ ሁጵያ ቃንፀቶ። ሽን እዉ ሁጰ ቃንፆይ ዎይኮ ሜዶይ ቦርሶ ግድኮ፥ ባ ሁጵያ ቃጮ።

⁷ አደይ ፆሳ ሌምሶነ ፆሳ ቦንቾ ግድያ ግሾ፥ ባ ሁጵያ ካማናዉ በሰና፥ ሽን ማጫስ አደስ ቦንቾ።

⁸ ማጫስ አደፈ መታሱፐ አትሽን፥ አደይ ማጫሳፐ መትቤና።

⁹ ማጫስ አደስ መትስፐ አትሽን፥ አደይ ማጫሳስ መትቤና።

¹⁰ ሀይሳ ግሾነ ኪታንቾታ ግሾ ማጫስ ባዉ ማት ደኤይሳ በሲያ ማላ ባ ሁጰን ቃጫናዉ በሴስ።

¹¹ ሽን ጎዳ ቆፋን ማጫስ አደይ ባይና ዴና፤ አደይካ ማጫስ ባይና ዴና።

¹² ማጫስ አደፈ መትዳይሳዳ አደይካ ማጫሳፐ የለትስ። ሽን ኡባይካ ፆሳፈ መትስ።

¹³ አነ ህንተ ፕርድተ፤ ማጫስ ባ ሁጰ ካሞና ፆሳ ዎሳናዉ በሲ?

¹⁴ አደይ ባ ሁጵያ ድችኮ እያዉ ቦርሶ ግደይሳ ሀር አቶሽን መተ ህንተና ታማርሰኔ?

¹⁵ ሽን ማጫስ ባ ሁጰ ድችኮ እዉ ቦንቾ ግደኔ? ማጫሳስ ሁጰይ እመትዳይ እያ ባና ካማና መላሳ።

¹⁶ ሽን ሀይሳ ቦላ ፓላማናዉ ኮያ አስ ደእኮ፥ ኑስ ግድን ዎይኮ ፆሳ ዎሳ ኬታስ ግድን ሀይሳፈ ሀራ ዎግ ባዋ።

ጎዳ ካሆ ኤኮ ማራ

¹⁷ ህንተ እስፈ ሺቀይ ጎአስ ግዶናሽን ቆሆስ ግድያ ግሾ፥ ሀእ ታኒ እምያ ኪታን ህንተና ናሽከ።

¹⁸ ታኒ ኮይሮ ስእዳይ፥ ዎሳ ኬን ሺቅያ ዎደ ህንተ ግዶን ሻከተ ደኤይሳ። ሀ ታ ስእዳይስ ቱማ ግደይሳ አማናይስ።

¹⁹ ህንተ ግዶፈ ቱም ደኤይሳት ኦናንተኮ ኤረታና መላ ህንተ ግዶን ሻሆይ ዳናይስ አተና።

²⁰ ህንተ እስፈ ሺቅያ ዎደ ህንተ ሺቀይ ጎዳ ካሁዋ ማናሳ ግደና።

²¹ ህንተ ካ ምያ ዎደ እሶይ እሱዋ ናጎና ባይሳ ባይሳ ምያ ግሾ፥ እሶይ ኮሻቴስ ሀንኮይ ቃስ ማቴስ።

²² ቱማ ህንተ ማናዉነ ኡያናዉ ህንተዉ ኬ ባዌ? ዎይኮ ፆሳ ዎሳ ኬ ካቲ? አይኮይ ባይና ማንቆታ ዬላየቲ? ታ ህንተና ዎይጎ? ሀይሳስ ታ ህንተና ናሾዬ? ናሽከ።

²³ ታኒ ህንተዉ እምዳ ትምርትያ ጎዳፐ ኤካስ። ጎዳይ የሱሲ አድ እመትያ ቃማ ኡይ ኤክድ፥

²⁴ ፆሳ ጋላትስ። ኡይ ባድ “ሄእተ፤ ሚተ። ሀይስ ህንተዉ እመትያ ታ አሹዋ። ሀይሳ ምሸ ታና ሀሳይተ” ያግስ።

²⁵ ሄሳዳካ፥ ካሁዋ ምድ ስምን፥ ፁኣ ኤክድ፥ “ሀይስ ፁአይ ታ ሱን ኤቅያ ኦራ ጫቁዋ። ህንተ እያፐ ኡያ ዎደ ኡባን ታና ሀሳይተ” ያግስ።

²⁶ ህንተ ሀ ኡይ ምያ ዎደነ ሀ ፁአ ኡያ ዎደ ኡባን ጎዳይ ያና ጋካናዉ እያ ሀይቁዋ ኦዴታ።

²⁷ ሄሳ ግሾ፥ በሶና ኦገን ጎዳ ኡይ ምያ ዎይኮ ጎዳ ፁአ ኡያ ኦንካ እያ አሹዋነ ሱ ቶችዳ ግሾ ባ ናጋራን ኦይሸቴስ።

²⁸ ሽን አስ ባና ፓጮ። ያትድ ኡይ ሞ፤ ፁአፐ ኡዮ።

²⁹ ጎዳ አሹዋባ ሻክድ ኤሮና፥ ኡይ መይነ ፁአፐ ኡየይ፥ ባ ቦላ ፕርዳ ሜስነ ኡዬስ።

³⁰ ሄሳ ግሾ፥ ህንተ ግዶፈ ዳሮት ዳቡርዶሶና፤ ሀርግዶሶና፤ ቃስ ኡንደና አሳት ሀይቅዶሶና።

³¹ ሽን ኑኒ ኑና ፓጭድ በእዳባ ግድያኮ፥ ኑ ቦላ ፕርደታናሽን።

³² አላመይ ፕርደትያ ዎደ ኑኒ አላምያራ ፕርደቶና መላ ሀእ ጎዳይ ኑና ሴሬስ።

³³ ሄሳ ግሾ፥ ታ እሻቶ፥ ጎዳ ካሁዋ ኤካናዉ ህንተ ሺቅያ ዎደ እሶይ እሱዋ ናግድ ኤክተ።

³⁴ ህንተ ሺቆይ ፕርዳስ ግዶና መላ ኮሻትዳ ኦንካ ደእኮ፥ ባ ሶን ሞ። አትዳባ ታኒ ያ ባዳ ህንተዉ ኦዳና።