1 ቆሮንቶሳ 10 - ጌሻ ማፃፋ

ኤቃ ጎይኖፍተ

¹ ታ እሻቶ፥ ታኒ ህንተ ሀይሳ አኬካና መላ ኮያይስ። ኑ ማይዛት ኡባይ ሻራፐ ጋርሳራ ሄመትዶሶና፤ ኡባይ አባ ፕንዶሶና።

² ኤንቲ ሙሰራ እስፋናዉ ሻራንነ አባን ፃማቀትዶሶና።

³ ኤንቲ ኡባይ እስ አያና ካ ምዶሶና።

⁴ ቃስ ኡባይ እስ አያና ኡሻ ኡይዶሶና። ኤንቲ ባንታና ካልያ አያና ዛላፈ ፑልትዳ ኡሻ ኡይዶሶና፤ ሄ ዛላይካ ክርስቶሳ።

⁵ ሽን ፆሳይ ኤንታፈ ዳሮታን ኡፋይትቦና ግሾ፥ ኤንታ አሀይ መላ ቢታን ዎድ አትስ።

⁶ ኤንቲ ኢታባ አሞትዳይሳዳ፥ ኑካ ኢታባ አሞቶና መላ ሄ ኡባይ ኑስ ሌምሶ ግድስ።

⁷ ጌሻ ማፃፋን፥ “አሳይ ማናዉነ ኡያናዉ ኡትዶሶና፤ ቃስ የፃናዉ ደንድዶሶና” ጌተትዳይሳዳ ኤንታፈ እሶት እሶት ኤቃ ጎይንዳይሳ መላ ህንተ ኤቃ ጎይኖፍተ።

⁸ ኤንታፈ እሶት እሶት ላይማትዳይሳዳ ኑ ላይማታናዉ በሰና። ሄሳ ጋሶን ኤንታፈ እስ ጋላስ ላታማነ ሄ ሙኩላይ ሀይቅስ።

⁹ ኤንታፈ እሶት እሶት ጎዳ ፓጭድ ሾሻን ዱከትድ ሀይቅዳይሳዳ ኑ ጎዳ ፓጫናዉ በሰና።

¹⁰ ኤንታፈ እሶት እሶት ዙዙምድ ሀይቆ ኤህያ ኪታንቹዋን ይዳይሳዳ ህንተካ ዙዙሞፍተ።

¹¹ ሀ ኤንታ ቦላ ጋክዳ ኡባይ ኑ ናገታና መላ ኑስ ሌምሶ ግድስ። ቃስ ዎደ ዉርሰ ቦላ ደእያ ኑስ ትምርተ ግዳና መላ ሀ ኡባይ ፃፈትስ።

¹² ሄሳ ግሾ፥ ታ ኤቃስ ግያ ኦንካ ኩንዶና መላ ባና ናጎ።

¹³ አሰ ኡባ ጋክያ ፓጨፐ አትሽን፥ ዱማ ፓጨይ ህንተና ጋክቤና። ህንተ ዎልቃይ ዳንዳኤይሳፈ አያ ፓጨን ህንተ ፓጨቶና መላ አድ እሞና ፆሳይ አማነትዳይሳ። ህንተና ፓጨይ ጋክያ ዎደ ሄ ፓጭያ እ ህንተና ዳንዳእሳና። ቃስ ሄ ፓጭያፐ ህንተ ከያና ኦግያ እ ጊግሳና።

¹⁴ ህዛ፥ ታ አልኦ እሻቶ፥ ኤቃ ጎይኖፈ ሃክተ።

¹⁵ ህንተ ዎዛናማ አስ ግድዳ ግሾ ታ ሀይሳ ኦዳይስ። ታኒ ገይስ ቱማ ግደይሳ ህንተ ህንተ ሁጰን ፕርድተ።

¹⁶ ኑኒ ፆሳ ጋላትድ ሻከትያ አንጆ ፁአይ ክርስቶሳ ሱራ እስፈተ ደኤይሳ ግደነዬ? ቃስ ኑኒ ባያ ኡይይ ክርስቶሳ አሹዋራ እስፈተ ደኤይሳ ግደነዬ?

¹⁷ ኑኒ ዳሮ ግድኮካ ኡይይ እስኖ፥ ኑ ሄ እስ ኡይ ሻከትያ ግሾ እስ አሳተ።

¹⁸ አነ እስራኤለ አሳይ ኦዳይሳ አኬክተ። ያርሸትዳ ያርሹዋ መይሳት ያርሾ በሳራ እስፈተ ባወዬ?

¹⁹ ታኒ አይ ጋናዉ ኮያዳ ጋይና? ኤቃስ ያርሸትዳ ካይ ዎይኮ ኤቃይ ፓያባ ጉሰዬ?

²⁰ ግደና፥ ኤንቲ ያርሸይ ፆሳስ ግዶናሽን፥ ቱና አያናታሳ። ሄሳ ግሾ፥ ህንተዉ ቱና አያናታራ እስፈተ ዳና መላ ኮይከ።

²¹ ህንተ ጎዳ ፁአፐ ኡይሸ፥ ቃስ ቱና አያናታ ፁአፐ ኡያናዉ ዳንዳኤከታ። ጎዳ ጋይታፐ ምሸ ቃስ ቱና አያናታ ጋይታፐ ማናዉ ዳንዳኤከታ።

²² ኑኒ ሄሳ ኦድ ጎዳ ይሎይኖ? ኑኒ እያፐ አያ ምኖዬ?

²³ ህንተ፥ “ኡባባ ኦና መላ ድግያባይ ባዋ” ጌታ፥ ሽን ኡባይ ማደና። ህንተ፥ “ኡባባ ኦና መላ ድግያባይ ባዋ” ጌታ፥ ሽን ኡባይ ድቸና።

²⁴ እስ እስ አስ፥ ሀራ አስ ማድያባ ቆፓናዉ በሴስፐ አትሽን፥ ባና ማድያባ ፃላላ ቆፖፎ።

²⁵ ህንተ ካሀ ስን ገልስያ ኦይሻ ደንና ግያን ባይዘትያ አሹዋ ጮ ሚተ።

²⁶ አይስ ጊኮ፥ ሳእነ ሳአን ደእያ ኡባይ ጎዳባ።

²⁷ እስ አማኖና አስ ህንተና እማታናዉ ኮይድ ፄግኮ ባናዉ ኮይኮ ቢተ። ህንተ ካሀን መትያ ኦይሻን ስና ህንተ ስን አያባ ኡባ ሚተ።

²⁸ ሽን እስ አስ፥ “ሀይስ ኤቃስ ያርሸትዳባ” ጊኮ፥ ሄ ህንተዉ ኦድዳ አድያ ግሾነ ካሀ ግሾ ሄ ካ ሞፕተ።

²⁹ ታኒ፥ ካሀ ግሾ ገይ፥ ሄ ህንተዉ ኦድዳ ኡራ ካሀ ጉሱፈ አትሽን፥ ህንተ ካሀ ግደና። ሀራ አሳ ካሀ ግሾ ጋዳ ታኒ ታ ላአተ ቦላ አይስ ፕርዶ?

³⁰ ታኒ ምያ ካ ፆሳ ጋላታዳ ሚኮ ባልዳዳ አይስ ቦረትያና?

³¹ ህዛ፥ ህንተ አይ ሚኮ አይ ኡይኮ፥ ዎይኮ አይ ኦኮካ ኡባባ ፆሳ ቦንቾስ ኦተ።

³² አይሁደታ ግድን ግርከታ ግድን ዎይኮ ፆሳ ዎሳ ኬ ግድን ኦደስካ በ ግዶፕተ።

³³ ታኒ ኡባ ዎደ ዳሮታ አሻናዉ ኤንቲ ማደትያ ኦገ ኮያይስፐ አትሽን ታና ማድያ ኦገ ኮይከ።