Yohanna 8 - Nouveau Testament en Guidar

Guluk məgəɗ mana'a

¹ Amma Zezu ambatək aka gərəm na hereme.

² Də mompum pum amilik adəv gəla metiŋ naw zuliya*, ɗii azoŋguk azani. Atəŋgək wəpelsiti.

³ Yaŋ məsənaŋ zəga na ma henziŋ dit Farisiyenɗe* akiyaŋ sənənək guluk məs armaŋ daɗɗa mana'a. Aziw gətənək abet ɗii pakə,

⁴ Apsənən Zezu na: Mərbə zəga, gulukəŋ daɗɗa mana'a mərəmta.

⁵ Moyis aɗi səmək wənnan adəv ma henziŋ məskət gən guluk zemvit vakəs dit kuneŋge. Ya nok mbar kənah di?

⁶ Anahəŋ vas na vi kaw rakani, dərəhaŋ gən tive na wəliyən akani. Amma Zezu aɓeke, averik afuŋ dəppərəm vani.

⁷ Yaŋ asbanən də wəssohoni, Zezu asilke, apsit na: Ɗəf səmbokum məs dəgəɗ ɗaah mambray ɓa dəskət dabəŋ də gərma.

⁸ Yaŋ aɓe əmpa, averik afuŋ dəppərəm vani.

⁹ Adan apprəmən wənəska, ambataŋgək taka taka pakə, ɗii gugiriɗ dədoŋ dabəŋ. Say Zezu dəpəl katər gəni, gəm ndət ziwe abani.

¹⁰ Yaŋ Zezu aslan kini assohu: Ngahəŋ ɗii nek di ɗakə? Ɗəf tay dəslbuk də kita ɓa sa?

¹¹ Guluk təzlanəka: Ɗəf tay dəslbu də kita ko taka ɓa mərbə zəga. Zezu amna: Naw bo, nətaw na kita akok ɓa. Doko, amma kədaɗɗa ɗaah mambray ɓa.]

Zezuwi təki babara

¹² Zezu apel sitik ɗii əmpa, amna: Əntə təki babar na duniya. Ko naway dəsbawa warah təki babar vi zeŋgilleni, ambat na ara guzli ɓa.

¹³ Farisiyenɗe apsənən na: Istatəɗɗa saydawa aka zuko, an məs kəpel tay də sləman ɓa.

¹⁴ Zezu azlansitike: Ko əntatəɗɗa saydawa aka zuwa, saydawa naw goŋgayi, vi nəsənək təki nəde, nəsənək təki məs nədawmbata.

¹⁵ Nokum munokum tatəɗɗaŋ kita də kuket net ɗiiyi, naw na nətaw na kita aka ko naway ɓa.

¹⁶ Ko an nətawək kita aka ɗəf bo kita nan goŋgayi, vi nətaw na katərgu ɓa, amma Affu məs də slənu tay də ina.

¹⁷ Məverni adəv ma henziŋ nokum: An ɗii sula aɗɗaŋgək saydawa taka, saydawa nan gesiŋgi.

¹⁸ Intatəɗɗa saydawa aka zuwa, Affu məs də slənu tayəɗɗa saydawa akawa.

¹⁹ Assohonənka: Aŋgay Affuk van asan di? Zezu azlansitike: Kəsən wən ɓa kəsənən na Affu ɓa'a. Va kəsən wənka, wakəsənən Affa'a.

²⁰ Zezu apel wənnəs na pay adawpel sit ɗii adəv gəla metiŋ naw zuliyi, atəki akoti net ɗeleɗ məs adapsənən Maŋgəlva asəni. Ɗəf tay dətak ɓa, vi pay nan dəɓəl wəzzan tagay ɓa.

Kəɓapəna wəmbataŋ atəki nədadaw ɓa

²¹ Yaŋ Zezu anah əmpa: Wanəmbatə, wakəkayawənni, amma wakəmtaŋ adəv mambray nokum. Kəɓapaŋ na wəgap atəki nədadaw ɓa.

²² Yahudiyenɗe assohonənək ziti: Wambat wəbay zən sa? Vi amna: Kəɓapaŋ na wəgap atəki nədadaw ɓa.

²³ Zezu azlansitike: Nokum sə fuŋ kəzoŋ, naw sə disiŋ nəde. Nokum sə duniya kəzoŋ, amma naw ɗəf na duniya nan ɓa.

²⁴ Vini nənah sukum: Wakəmtaŋ adəv mambray nokum. Ya an kətafwən na əntə nəsaw ina ɓana wakəmtaŋ adəv mambray nokum.

²⁵ Assohonənka: Nawa kənan di? Zezu apsit na: Intatə nahsukum daga wətəŋ nani.

²⁶ Gesiŋ, wən tay diiɗa nawnah sukum, məs nawtaw kita akokum. Amma ɗəf məs də slənu də goŋgayi adawnaha, əntatərban sən duniya an məs nəpprəm səman kaaka'ə.

²⁷ Dəpprəmanən na wənna Affən adawpel siti ɓa.

²⁸ Yaŋ Zezu apsit na: An kətələnək Wətən Ɗəffa*, wakəsəŋgən na əntə məs nəsaw ina, wakəsəŋgən na nəgəɗ na ko mi də an məs nəɗisən kiyu ɓa, amma an məs Affu arbə suwa anan nədawpele.

²⁹ Ɗəf məs də slənu tay də ina, appaw na katərgu ɓa, vi pay pak əntatəɗɗa an məs aŋgələ.

³⁰ Adan Zezu apel vaska ɗii diiɗa atafənənka.

Ɗii məmeti dit balemɗe

³¹ Yaŋ Zezu apsit Yahudiyenɗe məs dətafnən na: An munokum tatəsban an nədawnah sukum asna wakəkpaŋgaŋ gewleɗ naw gesiŋ.

³² Wakəsəŋgən goŋga, goŋga tam wamokum səka balam nokum.

³³ Azlan sənənka: Nam kirtin Abraham mənani məsam ɗaah balemɗe na ɗəf ɓa. Mbari kənah səm gən na. Wakəkpaŋgaŋ məza balemɗe ɓa di?

³⁴ Zezu apsit na: Gesiŋ nədawnah sukum. Məgəɗ mambray pak balam na mambrayi.

³⁵ Balam asana wətən affən gəla ɓa, amma wətəni wasan adəv gəla nan ha faɗə.

³⁶ An Wətən amokuməka, asna məmokumi gesiŋ.

³⁷ Nəsənka munokumtə kirtin Abraham. Amma munokumtatə kayawən kawbaywa. Vi kətafən wəpel naw ɓa.

³⁸ An məs Affu arbə su nədawpele, amma nokum munokum tatəɗɗa an məs affukum dənah sukum ɓa.

³⁹ Apsənən na Abraham mi affəmə. Zezu apsit na: Va kirtin Abraham kənanaŋ gesiŋ, wakəɗɗanən wəza an məs agəɗə.

⁴⁰ Naw əntatəka wəpel sukum goŋga an məs nəpprəm səmma Maŋgəlva. Də as pak munokum tatə kayawən kawbaywa. Aski məs Abraham dəgəɗ ɗaah ɓa.

⁴¹ Munokum tatəɗɗanən wəza na affukum. Azlan sənənka: Nam sulomɗe mənan ɓa, nam Affəm tay taka, ndəni Maŋgəlva.

⁴² Zezu azlansitike: Va Maŋgəlvayi Affukum gesiŋ na, wakəŋgluwəni, vi səza Maŋgəlva nəde, nədek azokum, nəde də an nəɗi sən kiyu ɓa, amma ndən də slənwa.

⁴³ Vi mi kapprəmanən məs nədawnah sukum ɓa di? Vi wəpak sləmokum ambra wəpel naw tuwãhyi azokum.

⁴⁴ Ibilisayi affukum, mokum aka wəɗɗa an məs affukum aŋgələ. Ndəni məbay gəbaya daga wətəŋ nani, dənah ɗaah goŋga ɓa, goŋga taya makran ɓa. An munokum tatə peleŋ hĩnyaw, zəga nan kəgəmaŋ, vi məwə hĩnyawi vi affən hĩnyawyi.

⁴⁵ Amma naw əntatə pel goŋga, vi ni kaŋglaŋ wənnaw ɓaŋka.

⁴⁶ Naway səmbokum məs naɗɗa saydawa akaw vi nəgəɗ mbrayen di? Amma ya an goŋga nədawnaha, vi mi kawtafwən ɓa di?

⁴⁷ Ɗəf na Maŋgəlva wapprəm wəpel na Maŋgəlva. Amma nokum ɗii na Maŋgəlva kənanaŋ ɓa, vi kapprəmən wəpel nan ɓa.

Zezu də Abraham

⁴⁸ Yahudiyenɗe anah sənən Zezu na: Goŋga mənah ɓa sa? Mə Samariya kənani, mitemuk kənani.

⁴⁹ Zezu azlansitike: Mitemu nan ɓa. Amma Affu nəda gakdakani, nokum bo munokum tatəzelewəni.

⁵⁰ Nəkay na gakdak sən kiyu ɓa. Ɗəf tay taka məs dədawkay su gakdaka, ndəni mətaw kita.

⁵¹ Gesiŋ nədawnah sukum: Ko naway dəsban wəpel nawa, amtə na ɓa.

⁵² Yahudiyenɗe apsənən na: Kakaŋ məsənək kana mitemuk kənani. Abraham amtəka, məs kleŋɗe bo amtaŋka, nok kənah gən na: Məs dəsban wənnaw na amtə na ɓana,

⁵³ Abraham dəhəməŋ amtəka, azok na kədayək kiyən də gakdak sa? Məs kleŋɗe bo amtaŋka, nok kan ka nawa kədawla zuk di?

⁵⁴ Zezu azlanka: An nəgakdakanək zuwa gakdak naw tay də sləman ɓa. Ɗəf na gakdakaw tay Affuwa, məs kənahaŋ na Maŋgəlva nokumi.

⁵⁵ Amma kəsənən ɓa, naw nəsənka. An nənahək na nəsən ɓa, nəŋgələ kpaŋ məs hinyaw va munokum. Amma nəsənka, əntat wəsban wənnani.

⁵⁶ Abraham dəhəkum zən anekək nawla pay nazaawa, awlaka anekenək zəni.

⁵⁷ Yahudiyenɗe apsənən na: Kəɓəl wəgap wəsva kaklaw sle tagay ɓa, yaŋ kəmna kulak Abraham?

⁵⁸ Zezu azlansitike: Gesiŋ nədawnah sukum: Daga məwani Abraham ɓa, əntatə.

⁵⁹ Yaŋ andenin kuneŋge vi kaskani. Amma Zezu aɗamanək zəni, agilik sədəv gəla metiŋ naw zuliya*.