Yohanna 7 - Nouveau Testament en Guidar

Məlmiŋgiɗin Zezu dətafnən ɓa

¹ Yaŋ dərɓagani, Zezu abalək aka dələv na Galile, dəŋgəl wəmbat aka dələv na Zude ɓa, vi Yahudiyenɗe tahəŋ wəkayanən kawbayən.

² Adan wəzləra net Yahudiyenɗe məs adawyaŋ na wəzləra net gizlirkeɗe go'oy.

³ Məlmiŋgiɗin Zezu apsənən na: Asil sahəŋka, dok aka dələv na Zude, vi gewleɗ nok dulanən gən wəzeɗe noko.

⁴ Ɗəf aɗamana zən an aŋgələk ɗii dəsənən gən ɓa. Adan istatəɗɗa zev wəzeɗe vaŋkəŋ na, say aɗɗa keret ɗii pakə.

⁵ Ko milmiŋgiɗin bo, dətafənən ɓa.

⁶ Zezu apsit na: Pay məs də slə su dəde su tagay ɓa. Azokum na pay awani di pak asləka.

⁷ Duniya agəɗ na here nokum ɓa, amma wagəɗ here nawa, vi əntat wərban wəzeɗe nan mogetiŋ ɓa.

⁸ Nokum məduwaŋ a wəzləra vani, naw maw tayaka wəmbat ɓa, vi pay an məs də slə su dəde tagay ɓa.

⁹ Yaŋ anahsiti, nan asanək aka dələv na Galile, dəmbat ɓa.

Zezu a wəzləra net gizlirkeɗe

¹⁰ Adan milmiŋgiɗ Zezu ambataŋ wəzləra, Zezu bo ambatək adaka. Amma dərban zən azet ɗii ɓa. Aɗamanək zəni.

¹¹ Yahudiyenɗe akayanənək aweleŋgit ɗii na wəzləra, assohoŋko: Aŋgay aŋ nak asan di?

¹² Ɗii apelinək wənnan awalaŋ zit də wəseske'e. Ɗii meɓɓet aɓɗaŋ na: Ɗəf mogoni. Ɗii meɓɓet tam aɓɗaŋ na: Awwo, ɗii adaw zeti.

¹³ Amma ɗəf tay dəpel wənnan appaka ɓa, vi geslne armek viyit ɗii gugiriɗ net Yahudiyenɗe.

¹⁴ Yaŋ aka pəɗak na wəzləra atoŋgu, Zezu atoŋguk adəv gəla metiŋ naw zuliya*, atəŋgək wəpel sit ɗiiyi.

¹⁵ Yahudiyenɗe agətaŋka, aɓɗaŋ na: Mbari ɗəffəŋ asən zəga vaŋ di, də yagan zəga ɓaŋ di?

¹⁶ Zezu azlansitike: Məs an nədawpel pak dəde səzaw ɓa, amma səza Maŋgəlva məs də slənu ade.

¹⁷ Ko naway dəŋglu wəɗɗa an məs Maŋgəlva aŋgələ, wasənna wəpel nawəŋ səza Maŋgəlva ade sa, walla də sembe naw nədawpele.

¹⁸ Ko naway dəpel wən sən kini, gakdak adawkaysən zəni. Amma ko naway də kay gakdak sən ɗəf məs də sləna, ɗəf təstəssi, mambray taya makran ɓa.

¹⁹ Moyis dəpsukum ma henziŋ ɓa sa? Amma ɗəf ko taka tay dədarma wənnan ɓa. Vi mi kədawkayaŋ tive nawbayu di?

²⁰ Ɗii azlan sənənka: Dərwa kənani: Naway də koyok nawbay di?

²¹ Zezu azlansitike: Nəgəɗək wəza taka kaaka'ə, munokum pak kəgətaŋka.

²² Moyis aɗi sukumək wənna wəskəl wiyən pay dədopoɗo səza muwani təstəs nan bo Moyis dətəŋ ɓa, amma dəhiŋgiɗkum məs dabəŋ dətəŋ gəni. Vini munokum tatə wəskilin kirtukum ko pay naffete*.

²³ Munokum tatə wəskəlnən ɗəf pay naffete vi kədamzlahaŋki ma henziŋ na Moyis ɓa. An wakəskələn ɗəf pay naffet na mədəray gədufkum adawda akaw vi nəmbəl gən ɗəf pay naffet di?

²⁴ Məppan wətaw kita aka məs kulaŋ də horokum. Amma mətaw kita də goŋga.

Zezuwi Krestu

²⁵ Yaŋ ɗii meɓɓet sə Zerusalem aɓɗaŋ na: Ndəni məs adawkayanən naw bay nak ɓa sa?

²⁶ Yaŋ tay pel appaka, ɗəf tay nawgəɗ sən zəga ɓa. Ya ɗii gugiriɗ nam asəŋgənək na ndəni Krestu sa?

²⁷ Amma an Krestu adeke, ɗəf tay nawsən təki adazan ɓa, amma ɗəffaŋka, məsənək təki ade.

²⁸ Pay nani Zezu tay pel sit ɗii adəv gəla metiŋ naw zuliya, aslanək wəlan dayadaya, amna: Kəsən wənək sa, kəsənənək təki nəde sa? Nəde sən kiyu ɓa, amma ɗəf an məs də slənwəŋka təstəssi. Ndəni məs kəsənən ɓa.

²⁹ Naw nəsənəka, vi səzan nəde, ndən də slənwa.

³⁰ Yaŋ akayanən karmani, amma ɗəf tay dəɓlan ɓa vi pay nan dəɓəl wəgap tagay ɓa.

³¹ Ɗii diiɗa səmbet məs dətafəni, aɓɗaŋ na: An Messiya* adek na wagəɗ sokeneɗ dayki ɗəffəŋ sa?

Asliŋginik məgaŋ gəla metiŋ naw zuliya* akarma Zezu

³² Adan Farisiyenɗe* apprəmən məs ɗii adawpeleŋ aka Zezu də wəseske'e, aslereŋgək dit dayeɗe net məs dəlveŋge asləŋginik məgaŋ gəla metiŋ naw zuliya vi dərmanən gəni.

³³ Zezu Amna: Wanəsaw də munokum suɗike, asna wanəmil aza ɗəf də slənwa.

³⁴ Wakəkayawəni, kərəwənna ɓa, vi kəɓapən na wəmbat atəki nəsaw ɓa.

³⁵ Yahudiyenɗe assohonənək ziti: Aŋga adawmbat məɓapna wərəhən ɓaŋ di? Wambat azet Yahudiyenɗe məs dətərayaŋ aweleŋgit Grekɗe vi karban sit wən sa?

³⁶ Amna: Wakəkayawəni. Amma kərəwənna ɓa, vi kəɓapaŋ na wəgap atəki nəsaw ɓa. Ya mbari aŋgəl wənah də wənnəs di?

Məlpeŋge net iŋkile na zeŋgille

³⁷ Pay wəgrak wəzləra, ndəni payan tekteki. Pay nani Zezu asilke, aziwik awaləŋgit ɗiiyi. Apelik də wəlan daya daya, amna: Ko naway məs meme adawdaŋ dəde zawa, wasə,

³⁸ va wənah na ko naway dətafwa. Məlpeŋge net iŋkile na zeŋgille waymaŋ amakrani va ɗerewel anahə.

³⁹ Zezu apel wən məkpaŋgaska aka Əmpəs məs ɗii dətafaŋ adawrəhaŋ. Pay nani dəɓəl wərəhaŋ Əmpəs tagay ɓa. Vi Zezu dəɓəl wətoŋ adəv gakdak na Maŋgəlva tagay ɓa.

Ɗii agohoŋguk aka wənna Zezu

⁴⁰ Adan ɗii suweleŋgit ɗii məkkelit apprəmən wəpeliska, aɓɗaŋ na: Gesiŋ, ɗəffəŋ məs kleŋgyi.

⁴¹ Ɗii meɓɓet aɓɗaŋ na: Ndəni Messiya. Ɗii meɓɓet əmpa aɓɗaŋ na: Messiya ade na sə Galile ɓa.

⁴² Ɗerewel amna Messiya səza ma əlfa na Davit adawsani, wade sə Betelihem, walaŋ gəla metiŋ məs Davit asani.

⁴³ Ɗii agohoŋguk aka wənna Zezu.

⁴⁴ Ɗii meɓɓet suweleŋgit aŋglaŋ wərmanənni, amma ɗəf tay dərəŋ gən ɓa.

Ɗii gugiriɗ net Yahudiyenɗe dətafnən Zezu ɓa

⁴⁵ Yaŋ məgaŋ gəla metiŋ na zuli nek amilyoŋ azet, dayaɗe net məs dəlveŋge dit Farisiyenɗe, assohotini: Vi mi kəkinən ɓa di?

⁴⁶ Azlanənka: Ɗəf tay naw ɓap wəpel va na ɗəf ndak kpak ɓa.

⁴⁷ Farisiyenɗe assohotinke: Nokum bo kəŋglaŋ wəsban wərak nan sa?

⁴⁸ Ɗəf tay səmbet ɗii gugiriɗ namə, walla suweleŋgit Farisiyenɗe məs dətaf sa?

⁴⁹ Say ɗii ɗiɗerɗe dətafəni, vi dəsənən ma henziŋ ɓa, məray gitiŋ.

⁵⁰ Nikodemus məs naweleŋgit Farisiyenɗe nadaka, an məs dəmbat təl taka aza Zezu, nan apsit na:

⁵¹ Ma henziŋ dəpan tive nawtaw kita aka ɗəf məza wəssohon ɓaɓa, məsən an agəɗ ɓa.

⁵² Azlan sənənka: Nok bo ɗəf na Galile kənan sa? Aŋɗan ɗerewel ɗa, wa kərah məs kleŋ ko taka dəde sə Galile ɓa.

⁵³ [Yas ko naway ambatək eŋgil anan da.