Yohanna 6 - Nouveau Testament en Guidar

Zezu azəm gitik ɗii uzine sle

¹ Yaŋ dərɓaga aska Zezu ambatək dəgar ki pe'e na Galile, məs adaw yaŋ na pe'e na Tiberiyas.

² Ɗii diiɗa asbanənka, vi ɗii awlanənək sokeneɗ məs agəɗ də wəmbəl git məs gbəgbaɗe.

³ Zezu apeŋgək aka gərəma, asanək adaka, dit gewleɗ nani.

⁴ Paska* wəzləra net Yahudiyenɗe go'oy.

⁵ Zezu aslanək harani, awlek ɗii diiɗa dəzoŋ azani. Apsən Filip na: Səŋga mədawrəh way nalbaah napsit ɗiiyiŋ pak di?

⁶ Anah vas na vi kapprəm an Filip adawzlani, vi asənək an adaɗɗa.

⁷ Filip azlan sənəka: Ko deleɗ na təbəs səkat sula bo almaŋ na ɓa an məŋgələk ko naway pak dərah gən way suɗike ɓa.

⁸ Andre, məlmən Simoŋ Piyer, məs nambet gewleɗ nan apsən na:

⁹ Wiyən maɓɓan tayaŋ dit dupeŋɗe sle gəm kilif sula, amma madawtər sit ɗii diiɗa veŋkiŋ di?

¹⁰ Yaŋ Zezu amna: Mənah sit ɗiiyiŋ pak dəsoŋ. Kevile taya dak diiɗa atəki nani. Asoŋko wəŋɗa net wasoŋ uzine sle zel kaaka'ə.

¹¹ Zezu agimik dupeŋɗe neki, asokonək Maŋgəlva, yaŋ awɗakan sit ɗii veti. Vaski agəɗ dit kilfi bo. Ko naway pak arahək va aŋgələ.

¹² Yaŋ ndəɗaŋ pak abaŋka, Zezu apsit gewleɗ nan na: Məkelet dambirgiti vi adawrayaŋ ɗar ɓa.

¹³ Akeletinik dambirgit dupeŋɗe sle məs ɗii azəmaŋ, aknahaŋgək kekelɗe klaw kiyit sula.

¹⁴ Ɗii awlanənək sokene məs Zezu agəɗə, aɓɗaŋ na: Ɗəffəŋka ndəni məs kleŋ gesiŋ an məs nazan a duniya.

¹⁵ Zezu asənək na go'oŋ wəzoŋ wərmanəni də gagay, kawɗiyən ka məlĩya. Vini ambat aka gərəm əmpa, ndən katər gəni.

Va Zezu adaw aket iŋkile a pe'e

¹⁶ Yaŋ ɗii ameŋgle gurom, gewleɗ na Zezu apirkeŋke ama busgum na pe'e.

¹⁷ Atoŋgoŋgək adəv bəlay kambat a Kafarnahum. Yaŋ dəfəɗ atiri, Zezu dəde azet tagay ɓa.

¹⁸ Iŋkile aɓlaŋgək sawɓa, vi səmnya tayəɓla də sembe.

¹⁹ Yaŋ aɓlanən bəlay gap kilometər sle walla slire, awlanənək Zezu tay zar aza bəlay, tay daw aket iŋkile də təlni, geslne armeke.

²⁰ Amma Zezu apsit na: Kədaw geslne'eŋ ɓa, əntə.

²¹ Aŋglaŋ wəslanən adəv bəlay, amma go ləŋ bəlay aziwik aka dəlva fuŋ atəki məs aŋglaŋ wəmbata.

Ɗii akayanənək Zezu

²² Vit pumpum nani ɗiiyen dəpaŋ dərɓe aɗumonənək na bəlay maɓɓan taya dak ɓa, say taka kaaka'ə, asəŋgənək bo na Zezu dətoŋ adəvən dit gewleɗ nan ɓa, gewleɗ ketirgit dətoŋgoŋ, dəmbataŋ.

²³ Amma bəlayɗe meɓɓet azoŋguk sə Tiberiyas, azoŋguk atəki məs Ɗəfdaya apsit dupeŋɗe neki, dərɓaga agəɗsən soko sən Maŋgəlva, viyit dupeŋɗe.

²⁴ Adan ɗii awlanən Zezu taya dak ɓa, ko gewleɗ nan zlaŋ tahəŋ adak ɓa, atoŋgoŋguk adəv bəlayɗe neki, ambataŋgək a Kafarnahum wədaw kayani.

Zezuwi way napsən wəkoh sən ɗəffa

²⁵ Arəhənək Zezu dəgar ki pe'e, assohonənka: Ɗəfdaya dewe kəde aŋ di?

²⁶ Zezu azlan sitik na: Gesiŋ nədawnah sukum: Kədaw kayawənna vi kəzəmaŋ wayi, kəbaŋgi. Amma kəsənən na sokene mi nəgəɗ di ɓa.

²⁷ Kədawgayaŋ vi way məs naŋgənaŋ ɓa, amma məgay vi way nawsan ha faɗə, napsukum wəkoh ha faɗə. Way məs Wətən Ɗəf* adapsukum, va an məs də sembe məs arah səza Maŋgəlva Affəni.

²⁸ Yaŋ ɗii assohonən na: Mbarmbari mədaɗɗa wəza məs Maŋgəlva aŋgələŋ di?

²⁹ Zezu azlansitike: Məpprəm wəza an Maŋgəlva aŋgəl avokum: Mətaf ɗəf məs aslənə.

³⁰ Assohonənka: Sokene awani kədarban səm vi mətaf ku gən di? Wəza awani kədaɗɗa di?

³¹ Dəhiŋgiɗkum azəmənək manu a muya, va məverin: Apsitik way məs dəde sə disiŋ.

³² Zezu azlansitike: Gesiŋ nədawnah sukum: Moyis dəpsukum way məs dəde sə disiŋ ɓa, amma Affu dəpsukum way məs dəde sə disiŋ.

³³ Way məs Maŋgəlva adapsukuməŋka, məs dəprik sə disiŋgi, ndəni napsən zeŋgille sən dunuya.

³⁴ Yaŋ apsənən na: Mərbə zəga apsum way nan ha faɗ kana.

³⁵ Zezu apsit na: Əntə dupeŋ na zeŋgille. Ko naway dəde azawa, may adana ɗaah ɓa. Ko naway dətafwa meme adanəna ɗaah ɓa.

³⁶ Amma Intatə nahsukum: Kuluwənka də as pak kətafwən ɓa.

³⁷ An məs Affu avay pakə, wade azawa. Ko naway dəde zaw bo nəɓoŋsəna kpak ɓa.

³⁸ Nəprik sə disiŋ vi kaɗɗa an məs nəŋgəl ɓa, amma kaɗɗa əŋgla na ɗəffan də slənwa.

³⁹ Apprəm an məs də slənu aŋgələ: Nədawzan ko taka səmbet ɗiiyen məs avay ɓa, amma wanəsilgit səkəti əmta pakə, an pay nagrak dələv agapka.

⁴⁰ Apprəm an məs Affu aŋgələ: Ko naway dula Wətən Ɗəffa* dətafa, warah zeŋgille ha faɗə, wanəsil gən səkəti əmta pay wəgrak dəlva.

⁴¹ Yahudiyenɗe aɗɗaŋgək wərwər aka Zezu vi anah na: Əntə dupeŋ məs dəde sə disiŋ.

⁴² Aɓɗaŋ na: Zezuwi ɓa sa? Wətən Zozeffi ɓa sa? Məsənək affən dət mani. Mbarmbari adaw nəhna sə disiŋ apriki di?

⁴³ Zezu apsit na: Məppan wərwər awalaŋ zukum.

⁴⁴ Ɗəf tay naɓap wəzzan azaw ɓa, say an Affu məs də slənu dəkiya. Ko naway dəde azawa, wanəsil gən səkəti əmta pay wəgrak dəlva.

⁴⁵ Məs kleŋɗe aver nənka, ndəɗaŋ pakə, Maŋgəlva arbansitike. Ko naway dəpprəm ma Maŋgəlva, atafək wərba nani, wade azawa.

⁴⁶ Amma as bo tay va wənah na, ɗəf awlak Maŋgəlva ɓa, say məs dəde səza Maŋgəlva, ndən katər gən dula Maŋgəlva.

⁴⁷ Gesiŋ nədawnah sukum: Ko naway dətafə, warah zeŋgille ha faɗə.

⁴⁸ Əntə dupeŋ napsən zeŋgille ha faɗə.

⁴⁹ Dəhiŋgiɗkum azəmaŋgək manu a muya, də as pak amtaŋka.

⁵⁰ Amma ko naway dəzəm dupeŋ məs dəde sə disiŋ, amtə na kpak ɓa.

⁵¹ Əntə dupeŋ madarani, məs dəprik sə disiŋ. An ɗəf azəməka, wasan madaran ha faɗə. Dupeŋ məs nədapsukuməŋka gəɓa zuwi. Wanəpsən vi duniya dəsan gən madaran.

⁵² Wəpelis asil gənək wəbay ma aweleŋgit Yahudiyenɗe: Mbarmbari ɗəffəŋ adawɓap wəpsəm gəɓa zən di?

⁵³ Zezu azlansitike: Gesiŋ nədawnah sukum: An ɗəf dəzəm gəɓa zə Wətən Ɗəf* ɓa, an də sə mbel nan ɓa, wəkoh taya zokum ɓa.

⁵⁴ Ɗəf məs dəzəm gəɓa zuwa, məs də sə mbel nawa, arahək zeŋgille ha faɗə, wanəsil gən pay wəgrak dəlva.

⁵⁵ Gəɓa zuwi zəga nawzəm an təstəssə, mbel nawəŋ zigeɗ naw saa an təstəssə.

⁵⁶ Ko naway dəzəm gəɓa zuwa, də sə mbel zuwa wasap də ina, naw bo wanəsap dəndən.

⁵⁷ Affən məs dəpsən wəsso madaran ndəni də slənwa, vi ni nəsaw madarawa. Vi vaski ko naway dəzəm gəɓa zuwa wasan madaran viwa.

⁵⁸ Aski way məs dəprik sə disiŋ. Dəgil va way məs dəhiŋgiɗkum azəmaŋ, yaŋ amtaŋ əmpaŋ ɓa. Ko naway dəzəm wayəŋka, wasan madaran ha faɗə.

⁵⁹ Zezu apel wənnəska, daga adawsan adəv gəla nawpel wənnet Yahudiyenɗe a Kafarnahumyi.

Wəpel napsən zeŋgille sən ɗəf ha faɗə

⁶⁰ Səza apprəmən wəpel na Zezu vaska, ɗii suweleŋgit gewleɗ na Zezu diiɗa aɓɗaŋ na: Wənnəs tuwãhi. Naway naɓap wətafən di?

⁶¹ Zezu asənək na tahəŋ sekeseke aka wən nani, apsit na: Mi dəzlaɓan maɗulokum van di?

⁶² Mbari kan an kulanənək Wətən Ɗəf tay peŋ atəki məs asan far di?

⁶³ Əmpəs na Maŋgəlva wapsən zeŋgille, gəɓa zə ɗəffa aɓap na ko mi diɓa. Wəpel məs nəpel sukuməŋka, ndəni Əmpəs də zeŋgille.

⁶⁴ Amma ɗii meɓɓet tahəŋ awalaŋkum, tahəŋ də wətaf ɓa. (Vi daga wətəŋ nani Zezu asənək na mədəŋgaŋ nawtafnən di, asənək ɗəf nawzəm kini.)

⁶⁵ Anahək əmpa: Vi vaski Intatə nahsukum, ɗəf aɓap na wəzzan azaw ɓa say an Affən apsənək tive.

⁶⁶ Daga dəpaski məzəsbanən diiɗa amilyoŋ dasbani.

⁶⁷ Yaŋ Zezu assohet gewleɗ nan klaw kiyit sula: Nokum bo mokum aka wəmbat sa?

⁶⁸ Simoŋ Piyer azlan sənəka: Ɗəfdaya aŋga mədadam di? Wəpel məs napsən zeŋgille ha faɗə sə moki adaw gilyeni.

⁶⁹ Kakaŋ mətafəka, məsənkuko, əstə Salala* məs dəde səza Maŋgəlva.

⁷⁰ Zezu apsit na: Əntə nəwelkum klaw kikum sula ɓa sa? Amma taka suwalaŋkum Ibilisayi.

⁷¹ Apel vas na aka Zudas wətən Simoŋ Iskariyotti. Vi ko Zudas asan aweleŋgit gewleɗ klaw kiyit sula zlaŋ, wazəm kini.