Yohanna 2 - Nouveau Testament en Guidar

Wəɓel akana

¹ Yaŋ pay sula dərɓaga wənnani wəɓel taya Kana, aka dələv na Galile. Ma Zezu tata daka.

² Məyani Zezu dit gewleɗ nan adaka.

³ Yaŋ mbazla net wəleŋɗe agrak səzeti, ma Zezu təpsəna: Mbazla net wəleŋɗe agrakək səzeti.

⁴ Zezu azlanək na: Ɗakə əstə kədawnah su an nədaɗɗa sa? Pay naw dəɓəl wəzzan tagay ɓa.

⁵ Yaŋ man tənah sit məɗɗaŋ wəza na: An məs anah sukum naɗɗa pak kəɗɗanən gəni.

⁶ Adak na, təlbiɗe na gərəm tahəŋ sləre, Yahudiyenɗe adawɗiyaŋ naskoɓ tilti va an adasbanəni adəv wəsba neti, təlbiɗe net taka nan pak iŋkile tahəŋ wəmbataŋ adəvən litər səkatə.

⁷ Zezu apsit məɗɗaŋ wəza na: Məknih təlbiɗeŋ dit iŋkile.

⁸ Yaŋ Zezu amna: Kakaŋ na məmbaɗ kana, məke sən daya na affən wəɓele. Aɗɗanənək va aɗi sit wənani.

⁹ Daya nawɓel anetike, arihik akpaŋgaŋgək mbazla net wəleŋɗe. Amma dəsənən na səŋga ade di ɓa, say məɗɗaŋ wəza məs də mbeɗini net asənənka. Ayak zilit waŋ məɓelta,

¹⁰ apsən na: Ko naway an ayek ɗiiyi wapsit mbazla an mogon dabəŋ. An ɗii asanənək diiɗa kana, wapsit an məs tay gənɗət diiɗa ɓa. Amma nok kəzaɓanək mbazla an mogon ha kakaŋka.

¹¹ Ndəni sokene an Zezu agəɗ dabəŋ a Kana aka dələv na Galile. Arbanək gakdak nani, gewleɗ nan atafənənka.

¹² Dərɓagani, ambatək a Kafarnahum dət mani gəm milmiŋgiɗin dit gewleɗ nani, asoŋgək adak pay suɗike.

Zezu adəv gəla metiŋ naw zuliya*

¹³ Yaŋ wəzləra na Paska* net Yahudiyenɗe go'oy, Zezu ambatək a Zerusalem.

¹⁴ Arihik məvəllaŋ wasliɗe dit timeŋgiɗi gəm mukuɗuŋgileɗ na maha adəv gəla metiŋ naw zuliya, arihik mədəɗaŋ deleɗ tahəŋ adaka, tahəŋ aka tabəl adaka.

¹⁵ Zezu armak helege va ɗoŋgroŋ arɓehetik timeŋgiɗ neti dit wasliɗe net pak sədəv gəla metiŋ naw zuliya. Aslaŋganək tabəl net mədəɗaŋ deleɗ pak atərayaŋka.

¹⁶ Apsit məvəllaŋ mukuɗuŋgileɗ na: Məzar sahəŋka kədaw manən gəla na Affu gəla naɗɗa terere ɓa.

¹⁷ Gewleɗ nan aɗumonənək an məverin adəv ɗerewel: Wəŋgla na gəla noko, aw Maŋgəlva, tay zləw amakraw va offo.

¹⁸ Amma Yahudiyenɗe assohonənka: Sokene awani kədaɗɗa məsən gən na gesiŋ istat də sembe naɗɗa zəga vaska di?

¹⁹ Zezu azlan sitik na: Məɓzlu gəla metiŋ na zuliyəŋka, wanə məs wərkan aka pay hoku.

²⁰ Yaŋ Yahudiyenɗe apsənən na: Mərka gəla metiŋ na zuliyəŋ wəsva kaklaw poɗo kiyən sləre mərkani. Yaŋ nok kəmna wakərka aka wəvoŋ hoku?

²¹ Amma nan aslak zən də gəla metiŋ naw zuliya.

²² Adan Zezu asil sətəki əmta, gewleɗ nan aɗumonənək an məs məverin adəv ɗerewel də wəpel məs anahsiti.

Zezu asənək ko naway

²³ Zezu asanək a Zerusalem ha gap pay na zləra na Paska pakə, ɗii diiɗa atafənka vi sokeneɗ məs agəɗə.

²⁴ Amma Zezu dətaf wənnet ɓa, vi asənək wəɗum net pakə.

²⁵ Wəray tay ɗəf dənah sən gən wənnet ɗii ɓa, vi asənək ana mekret pakə.