Yohanna 19 - Nouveau Testament en Guidar

¹ Yaŋ Pilatu aɗi wənan dəkanən gən Zezu, dərganən gəni.

² Sozeɗ aturoɗoŋguk gedirge va mətər kiya, aɗəppənək aka Zezu, aklakaŋ sənənək zəga va lukut peppreŋge.

³ Azaraŋgək azani, aɓɗaŋ na: Usɗoko məlĩ net Yahudiyenɗe. Averenek atapaslayən.

⁴ Pilatu agilik əmpa, apel sitik ɗiiyi amna: Naw wanəgil gən sukum, vi kəsənən gən na nərah wən gala nawtaw kita akan ɓa.

⁵ Yaŋ Zezu agili, mətər kiya na gedirge taya kani, zəga va lukut nak peppreŋ naka taya zan kəlakka. Pilatu apsit na: Ndən yaŋka.

⁶ Amma adan məs dəlveŋge dit məzu gaŋ awlanəni, anzlaŋgək vamvəlla, aɓɗaŋ na: Məlawa aka wəlaŋga məzliwrihe. Məlawa. Pilatu apsit na: Məgəmma, məlawa, naw vi nərah wən məs gala nawtaw kita akan ɓa.

⁷ Yahudiyenɗe aɓɗaŋ na: Mənam tat də ma henziŋ. Va an ma henziŋ nan aɗi na, say dəmtə gəni, vi aɗiyək zən za Wətən Maŋgəlva*.

⁸ Adan Pilatu apprəm wənəska, geslne aməsək wərmani.

⁹ Atoŋguk eŋgil əmpa, assohonək Zezu: Səŋga kəde di? Amma Zezu dəzlansən ɓa.

¹⁰ Pilatu anah sənək əmpa na: Kəzlan su na ɓa sa? Kəsəna əntat də sembe nappoko, də sembe na lawuk aka wəlaŋga məzliwrihe ɓa sa?

¹¹ Zezu azlan sənəka: Istat də sembe akaw ko suɗike ɓa, say an Maŋgəlva dəpsuko. Vi vaski ɗəffan dəkiyu aboko mambray nan day kiko.

¹² Daga də Paska* Pilatu akay kuket napan Zezu. Amma Yahudiyenɗe anzlaŋgək vamvəlla, aɓɗaŋ na: An kəppanəka, asna kəsok na bayna məlĩ na Roma ɓa. Ko naway dəɗi zən va məlĩya, məzu zel na məlĩ na Romayi.

¹³ Adan Pilatu apprəm wənnəska, agil gənək Zezu əmpa, asanək aka mazaŋga na kita, atəki məs adawyaŋ də ma Ibrahiŋkore na Gabbata, va wənah na məkəɗən dit kuneŋge.

¹⁴ Pay nani, ndəni dabəŋ ki wəzləra na Paska, gap pay ziwi. Pilatu apsit Yahudiyenɗe na: Məlĩ nokum yaŋka.

¹⁵ Anzlaŋgək vamvəlla, aɓɗaŋ na: Dəmtə, dəmtə, məlaw aka wəlaŋga məzliwrihe. Pilatu apsit na: Ya asna nəlaw gən məlĩ nokum kan sa? Dayaɗe net məs dəlveŋge azlanənka: Məlĩ nam tay maɓɓan ɓa say məlĩ na Roma.

¹⁶ Yaŋ Pilatu apsit Zezu dəlawən gən aka wəlaŋga məzliwrihe. Yaŋ sozeɗ agəmən Zezu.

Məlawni Zezu aka wəlaŋga məzliwrihe

¹⁷ Zezu agilik ama poho na walaŋ gəla metiŋ, tay slan wəlaŋga məzliwrihe nani, ha gap atəki məs adawyaŋ də ma Ibrahiŋkore na Golgota, va wənah na bəbər kiya.

¹⁸ Adakki sozeɗ alawən Zezu aka wəlaŋga məzliwrihe. Pay nani alawaŋgək ɗii sula aza Zezu, taka aka van dəzəŋ, taka aka van zlaɓay, Zezu adak kətiya.

¹⁹ Pilatu arbanək wənna kita na Zezu də verni, aɗisitik wənnan də dəkpa'ən gən wənnan aka wəlaŋga məzliwrihe. An məs aver na: Zezu na Nazaret, məlĩ net Yahudiyenɗe.

²⁰ Yahudiyenɗe diiɗa aŋɗanənək məs məverin vi kəti nan tay faraɗa də walaŋ gəla ɓa. Wərba nan də ma Ibrahiŋkore məverin gəm də ma Girek gəm də ma Roma.

²¹ Amma dayaɗe net məs dəlveŋge apsənən Pilatu na: Kədawverin na: Məlĩ net Yahudiyenɗe ɓa, amma aver na: Ndən dənah na məlĩ net Yahudiyenɗe nani.

²² Pilatu azlan sitike: An məs nəveri kaɓlani ɓa, wasan vaska.

²³ Adan sozeɗ agrakən wəlaw Zezu aka wəlaŋga məzliwrihe, agəmənək lukut nani, awɗakanənək gəlan poɗo, ko soze pak dərah gən haran nani. Agəmənək lukut nan məza wərma azan ɓa, məs məhon vaska daga sə disiŋ ha afuŋ.

²⁴ Yaŋ apeleŋ awalaŋ ziti: Mədawngaran ɓa, məska səm saasa akani mula gən ɗəffan dədawrəhən. Agəɗ vas na vi an məverin dəsan gən gesiŋ amna: Awɗakanənək lukut naw aweleŋti. Askaŋgək saasa aka lukut nawa. Aski məs sozeɗ aɗɗaŋ.

²⁵ Ma Zezu təziwik amaŋgava məzliwrihe nani, dət mamsawani, gəm Mari guluk na Kolopas, gəm Mari sə Makdalla.

²⁶ Adan Zezu awlət mani, gəm gawla an məs aŋgələ tay ziwe, apsət man na: Gulku wətuk yaska.

²⁷ Yaŋ apsən gawla nak na: Mok yakəskə. Daga dəpas ləŋ gawla nan agəmət eŋgil ananda.

Wəmta na Zezu

²⁸ Dərɓaga Zezu asəna, zəga pak agrakək kakaŋka, yaŋ apel vi kagrak an məs ɗerewel anahə: Meme tahəŋ wəduwəni.

²⁹ Hinzu taya dak məknahən dit moɗokrayɗe ɓaɓlekɗe. Yaŋ sozeɗ ayopən gizlete aret moɗokrayɗe neki yaŋ asləkən ama ngava, atələn ama Zezu.

³⁰ Adan Zezu aneti amna: Zəga pak agraka. Yaŋ aɓegən kini amtə.

Məmpani Zezu aka təkzləmən

³¹ Pay nan dabəŋki pay naffeti*, Yahudiyenɗe dəŋglaŋ gəbay nan dəsan gən aka məzliwrihe ha gap pay naffet ɓa, vi pay an təstəssi, naw gakdakani. Assohonənək Pilatu kanzlu tilit ɗii məkpati, dəzlərəɓin gini.

³² Yaŋ sozeɗ azoŋ, anzluwənək təl an dabəŋ, gəm ma sula'ən ɗii məs məkpa'it də Zezu pay taka.

³³ Yaŋ azoŋ aza Zezu awlanen na amtəka dərəhaŋ va naŋzlu tələn ɓa.

³⁴ Amma yaŋ ɗəf taka səmbet sozeɗ aska aka təkzləmən də tulho, gu ləŋ yaŋ mbel dit iŋkile agulyoŋ.

³⁵ Ɗəf məs dəpel wənnani awlak wənnani, an məs anahə goŋgayi. Asənək məs adawnaha goŋgayi, vi nokum bo kətafən gəni.

³⁶ Yaŋ as agəɗ vasna vi an məverin dəsan gən gesiŋ: Dənzlaŋ sleŋsleŋ nan ko taka ɓa.

³⁷ Yaŋ atəki maɓɓan bo amna: Wawlanən ɗəffan məmpani.

Va andəkən Zezu

³⁸ Dərɓaga aska, Zozef məs sə Arimatiya, gawla na Zezu məɗama vi geslne sit Yahudiyenɗe, assohonək gəbay na Zezu. Pilatu apsənək tive nani, yaŋ ade, agəm gəbay na Zezu.

³⁹ Yaŋ Nikodemus məs dəde aza Zezu dabəŋ dəfəɗ nak ade. Yaŋ aki tursan məslahan də gaŋgilya gəm wəleŋɗe məs məŋginit mogoni gap kilo kaklaw hoku.

⁴⁰ Sula git pak agəmənək gəbay na Zezu, atərənək də boɗoko gəm tursan va Yahudiyenɗe asərəkaŋ wəndək ɗəffa.

⁴¹ Akəti məkpa Zezu vanəŋka guli taya daka, adəv guli nani magamas taya dak meleketeni, məndəki ɗaah ɗəf adəvən ɓa.

⁴² Adak məndək Zezu vi Yahudiyenɗe tahəŋ wəzaɓanən ziti vi pay naffete* gəm vi magamas van go'oy.