Yohanna 17 - Nouveau Testament en Guidar

Zezu azuliyək viyit gewleɗ nani

¹ Yaŋ adan Zezu agrak wənnəs pakə. Aslanək haran a disiŋ, amna: Aw Əbba, pay naw agapka. Arban gakdak na Wətuko, vi Wətən bo dərban gən gakdak noko.

² Kəpsənək sembe aket ɗii pakə, vi dəpsiti gən zeŋgille nasuwa ha faɗ sit ɗii məs kəpsənəŋki.

³ Aŋki zeŋgille məza agrak ɓa, asənkunko istə Maŋgəlva taka təstəssə, asənənək Zezu Krestuwi masləŋ noko.

⁴ Nərbanək gakdak nok adəv dəlva, nəgrakanək wəza məs kəvayə.

⁵ Kakaŋ kana. Əbba, avay gakdak aboko, gadak məs naw məsvan nəsaw dəndən də isi, daga məɓəli wəɗɗa dəlva fuŋ ɓa.

⁶ Nərbokuk azet ɗii məs kəgil git sədəv duniya vi kepsiwe. Nokuŋgə, kipsiwike, asbanənək wəpel noko.

⁷ Kakaŋ asənənək ko mi kəvay səzok ade.

⁸ Nərban sitik halabara məs kəvayəŋka, atafənka. Asənənək gesiŋ səzok nəde, atafənək na əstə kəslənwa.

⁹ Intatə komoko viti. Nəkomok na vi duniya ɓa, amma əntatə komok viyit ɗii məs kəvayə, vi ɗii nokkuŋ.

¹⁰ Zəga naw pak noki, zəga nok pak tamə nawi, gakdak naw tayərbanzən azeti.

¹¹ Nəsaw na a duniya ɓa, amma neti tahəŋ wəsoŋ a duniya. Kakaŋ əntat wəmbat azoko. Aw Affən salala*, kərban suwək sembe na iya noko, age də sembe nani, vi dəsoŋ gən taka, va in də isi məsam takaŋka.

¹² Daga nədaw saw dənɗaŋ, nəgek də sembe na iya noko sembe məs kərbə suwiŋki. Ɗəf tay dəzə suweleŋgit ko taka ɓa, say an məs dəzan zəni vi ɗerewel an məverin dəsan gən gesiŋ.

¹³ Kakaŋka əntatə mbat azoko, əntatə pelin pak daga əntatə a duniya tagay, vi wənnek naw dəkna gən amekreti.

¹⁴ Nərban sitik halabara noko. Duniya azelike, vi ɗii na duniyaŋ ɓa, va naw bo ɗəf na duniya nan ɓa.

¹⁵ Nəkomok na vi kəgil giti gən sə duniyayi ɓa, amma vi kəkoh giti gən səva ɗəf mbrayenəŋka.

¹⁶ Tahəŋ va ɗii na duniya ɓa, va ina əntat va ɗəf na duniya ɓa.

¹⁷ Wəpel noki goŋga. Yaŋ azeɓetik ka ɗii noko də goŋga naka.

¹⁸ Intatə slinit a duniya va kəslənu a duniya.

¹⁹ Wanəpan zeŋgillewa viti vi dəsoŋ gən ɗii nok gesiŋ.

²⁰ Nəkomok na viyit kaka ɓa, amma əntatə komok viyit ɗii məs naw tafwən aka wənnarba net pakə.

²¹ Intatə komoko vi ndəɗaŋ pak dəsoŋ gən taka. Aw Affuwa, dəsoŋ gən məslerit də mənamə, va nok kəsler də ina, naw bo nəsler də isi. Dəsoŋ gən taka, vi duniya dətaf gən na əstə kəslənwa.

²² Nəpsitik gakdak məs kəvayəŋka, vi dəsoŋ gən taka, va isi də ina məsam taka.

²³ Intatəɗɗa wəza amekreti, nok tamə istatəɗɗa wəza a makrawa, vi vaski adasoŋ taka gesiŋ. Ndəni duniya adawsənən na, is kəslənwa, kəŋgluwik va kəŋgluwa.

²⁴ Aw Affuwa kipsiwik ɗiiyiŋki. Nəŋgəl dəsoŋ gən də in atəki nəsawa, vi dulanən gən gakdak nawa. Kəpsu gakdak nan na vi kəŋgəluwək daga məɓəlli wəɗɗa duniya ɓa.

²⁵ Aw Affuwa, məs təstəssə, duniya dəsunuk ɓa, amma naw nəsənkuko, net tamə asənənək na əstə kəslənwa.

²⁶ Nərbokuk siti, wanəsban wərboksiti, vi wəŋgla məs kəŋgəluwəŋ dəknah gən amekreti, naw bo nəknah gən amekreti.