Yohanna 16 - Nouveau Testament en Guidar

¹ Nənah sukum vas na vi kədapanən wətaf an kətaf wənni.

² Wagil gukumən sədəv gəla nawpel wənnet Yahudiyenɗe. Asna pay nan wade, an ɗəf abayək ɗəf səmbokum wawlanən na va adaɗɗaŋ wəza na Maŋgəlva.

³ Waɗɗanən vaska vi dəsənən Affu ɓa, dəsən wən ɓa'a bo.

⁴ Yaŋ nənah sukumko. An pay nan adeke, wakəɗumonən an məs nənah sukum. Zezu asbanək wəpel əmpa: Nənah sukum daga wətəŋ nan ɓa, vi əntat də munokum.

Wəza nə Əmpəs Salala*

⁵ Kakaŋ əntatə mbat aza ɗəf an də slənwa, amma ɗəf tay ko taka səmbokum dəssoh na: Aŋga kədodok di sa?

⁶ Amma kakaŋ makrokum azlaka, vini nənah sukum vaska.

⁷ Amma gesiŋ nədawnah sukum: Mogoni azokum an nəmbatka, an nəmbat ɓa məza baah nak ade na azokum ɓa. Amma an nəmbatka, wanəsləna wade azokum.

⁸ Nani, an adeke, warbansən duniya tayə zaŋ dəwəɗum neti aka wənna mambray aka wənna goŋga də kita na Maŋgəlva.

⁹ Tahəŋ wəzaŋ aka wənna mambraya, vi də tafwən ɓa.

¹⁰ Tahəŋ wəzlaɓaŋ aka wənna goŋga, vi nədadaw aza Affuwa, kuluwənna ɗaah ɓa.

¹¹ Tahəŋ wəzlaɓaŋ aka wənna kita vi məlĩ na duniya mətawi kita akan səkay.

¹² Zigeɗ diiɗa dəpaŋ suwən naw nah sukum, amma wadayki wəpprəm nokum tagay.

¹³ Amma an Əmpəs Salala adeke, warban sukum wəpprəm an də goŋga pakə. Apel na aka sembe nan ɓa, amma wanah an məs apprəmə, də an məs dədazan pakə.

¹⁴ Wanah sukum an məs apprəm səmawa. Vaski adarban gakdak nawa.

¹⁵ Zəga na Affu pak nawi. Vini nənah na: Əmpəs wanah sukum an məs apprəm səmawa.

Wəsahan zə ɗəf wakpaŋ wənneken zə ɗəffa

¹⁶ Zezu apsit na: Abe suɗike kuluwənna ɓa, dərɓagan suɗike əmpa wakuluwəni.

¹⁷ Gewleɗ assohonənək ziti: Va wənah mbari kan vaskəs di? Abe suɗike kuluwənna ɓa, dərɓagan suɗike əmpa wakuluwəni. Yaŋ kəmpa na: Wanəmbat aza Affən, mbari di?

¹⁸ Mbarmbari adaŋgla wənah də abe suɗike di? Məsəna an məs adaŋgla wənah ɓa.

¹⁹ Zezu asənəka aŋglaŋgək wəssohoni, apsit na: Mənziyayi səza nənah sukum tagay ɓa: Abe suɗike kuluwənna ɓa, dərɓagan suɗike akuluwən əmpa. Aka wənnani kədassohonən zukum sa?

²⁰ Gesiŋ nədawnah sukum: Wakəhəmmaŋ wakənzlaŋ vamvəlla, amma duniya waneken zəni. Wakəsahanən zukum amma wəssahan zukuməs wakpaŋ wənneken zukum.

²¹ An guluk dədaway gu'otə aza uwa, watəssahan zəta vi pay nawzəm saha nat agapka. Amma an tuwəka, watəsgət ki bonoy nani vi wənneken zəta, vi tuwək ɗəf a duniya.

²² Vaski nokum tamə bo wakəssahanən zukum kakaŋka, amma wanulukum əmpa. Asna makrokum wasan neki, ha ɗəf tay nawɓap wəmoh nenek nan ɓa.

²³ An pay nan adeke, kəssohoŋ wənna ko mi ɓa. Gesiŋ nədawnah sukum: Ko mi kəssohoŋ ava Affu də iya naw pak wapsukum.

²⁴ Ha gap dəpaŋka kəssohoŋ ko mi də iya naw ɓa. Məŋgələ, wakərəhaŋ an məs kəŋglaŋ, vi wənneken zukum deknah gəni.

Zezuwi dədayki duniya

²⁵ Zezu asbanək wəpel əmpa: Wənnəs pak də wən məkpaŋga nənah sukum. Pay maɓɓan wade asna nəpel sukum na ɗaah də wən məkpaŋga ɓa, amma wanənah sukum wənna Affən kotakə.

²⁶ An pay nan adeke, wakəkamanən Affən də iya nawa. Nənah sukum na, wa nəkaman Affu vikum ɓa.

²⁷ Affən aŋglukumko, vi kəŋgluwənka kətafwənək na səza Affu nəde.

²⁸ Səza Affən nəde, nədek a duniya. Kakaŋ əntatə pan duniya wa nəmndaw aza Affuwa.

²⁹ Gewleɗ nan aɓɗaŋ na: Awla, kakaŋ na istatə pel kotakə məza də wən məkpaŋa ɓa.

³⁰ Kakaŋ məsənəka kəsənək zəga pakə. Daga ɗəf dəɓəl wəssohok ɓa, kəsənək an aŋgəl wəssoho. Vini mətafəka səza Maŋgəlva kəde.

³¹ Zezu apsit na: Kakaŋ kətafaŋgək sa?

³² Pay nan wade, ko kakaŋ bo agəɗək səkay, munokum pak wakətərayaŋ, ko naway pak eŋgil annanda, wakəppawən katərguwa. Amma nəsaw makatərgu gesiŋ ɓa, vi Affu tay də ina.

³³ Nənah sukum pak vasna vi kərəhaŋ gən wəsuwa zam də ina də wəsler də ina. Wakəsaŋ bonoy a duniya, amma məsok mokrokum, nədayək ki duniya.