Yohanna 14 - Nouveau Testament en Guidar

Zezuwi tive nambat aza Maŋgəlva

¹ Zezu apsit gewleɗ nan na, mokrokum adazlaɓ ɓa. Mətaf Maŋgəlva, mətafuwa.

² Gəleɗe tahəŋ diiɗa eŋgil ana Affu da, wanəmbatə, wanəzaɓan sukum təkiya. Va gesiŋgi ɓana nənah sukum na vas ɓa.

³ An nəzaɓan sukumək təkiya, wanəmil azokum, wanəkukum atəki nawa, vi təki məs nədadawa adak kədosoŋ.

⁴ Kəsənənək tive nawmbat atəki məs nədadawa.

⁵ Tomas apsən na: Ɗəfdaya məsən təki kədodok ɓa, mbari mədawsən tive nan di?

⁶ Zezu azlansən na: Əntə tive an də goŋga də zeŋgille. Ɗəf tay nawrəh wəmbat aza Affu də tive maɓɓan ɓa say də ina.

⁷ An kəsən wənka, wakəsənən Affuwa. Daga kakaŋka kəsənənka, kulanənka.

⁸ Filip apsən na: Ɗəfdaya, arban səm Affən wasan mək azamə.

⁹ Zezu apsən na: Filip nənziyək də munokum diiɗa, yaŋ kəmna kəsənu ɓa? Ko naway duluwa, awlak Affuwa. Vi mi kənah na arban səm Affuko di?

¹⁰ Kətaf na əntatə adəv Affuwa, Affu bo taya dəvwa ɓa sa? Wəpel məs nədawpel sukum pakəŋ, səmawi ɓa. Affu məs ana dəvwa, ndəni dədaɗɗa wəza nani.

¹¹ Mətaf an məs nədawnah sukum pakə: Affu taya dəvwa, naw bo əntata dəvən. An kətafən wəpel naw ɓa, mətaf vi wəzeɗeŋ kan day day ɗa.

¹² Gesiŋ nədawnah sukum: Ko naway dətaf wəzeɗe məs nəgəɗə, wagəɗ wəza metiŋgin dayki aska, vi əntatə mbat aza Affən.

¹³ Ko mi kəssohoŋ də iya nawa, wanəɗa, vi Wətən dərban gən gakdak na Affən.

¹⁴ An kəssohowənək ko mi də iya nawa, wanəɗa.

Zezu amna wanəslən Əmpəs Salala*

¹⁵ Zezu aməsək wənaha: An kəŋgluwənka, wakərmanən wən məs nəɗiyə.

¹⁶ Wanəkaman Affu waslən sukum məzəbaah temme, ndəni Əmpəs Salala, vi wasan də munokum ha faɗə.

¹⁷ Duniya aɓap na wərahən ɓa, vi aɓap na ulan ɓa, aɓap na wəsənən ɓa bo. Amma nokum wakəsənəni, vi wasan də munokum, wasan amokrokum.

¹⁸ Nəpokum na katər gukum va mətuɗeŋge ɓa, amma wanəmil azokum.

¹⁹ Abe aŋ suɗike, duniya awlu na ɓa, amma nokum wakuluwənni. Vi əntatə saw madarawa, vi ni nokum bo wakəsoŋ madorokum.

²⁰ An pay nan adeke, wakəsənən na ina də Affu taka mənani, nokum bo taka kənanaŋ də ina.

²¹ Ko naway dərma an məs nəɗi naɗɗa, aɓe sənəka, ndəni dəŋgluwa. Affən waŋglu ɗəffan dəŋgəluwa, naw bo wanəŋgluwa, wanərban zu azani.

²² Ɗəf maɓɓan tay Zuda, mbək sa Zuda Iskariyot, apsən Zezu na: Ɗəfdaya, mbari kədarban zuk azamdi, amma kərbana zuk aza duniya ɓa di?

²³ Zezu azlan sənəka: Ko naway dəŋgəluwa, aɓe sənək wəpel nawa, Affu waŋgluwa. Affuwa ina, waməde waməsam dəndən.

²⁴ Ko naway dəŋgəlu ɓa aɓe səna wəpel naw ɓa. An məs adapprəm səmawa, dəde sə makraw ɓa, amma səza Affu məs də slənwa.

²⁵ Intatə nahsukum adan əntat də munokum tagay.

²⁶ Ɗəf məs na baah sukum, ndəni Əmpəs Salala məs Affu adawslən sukum də iya nawa, nan warban sukum zəga pakə, waɗumon sukum an məs nəpel sukum pakə.

²⁷ Intatə pokum də zamə, əntatə pan sukum zam nawa. An məs nədapsukum, tay va an duniya adapsən ɓa. Makrokum adazlab ɓa, kədaw geslne'eŋ ɓa.

²⁸ Kəpprəmənək nənah sukum na wanəmbatə, amma wanəmil azokum. An kəŋgəluwənka məneken zukum vi əntatə mbat aza Affən, vi Affən day kiyu də metiŋ.

²⁹ Nənah sukumək wənnan səkay kakaŋka daga dəɓəl wəɗɗa ɓa, vi kətafən gəni an agəɗka.

³⁰ Nəsbana wəpel də munokum diiɗa əmpa ɓa, vi məlĩ na duniya tayə zani. Tay də sembe akaw ko suɗike ɓa.

³¹ Amma vi duniya dəsən gən na nəŋgluwək Affən, vini nədaɗɗa an Affən aɗi su naɗɗa. Məsili, mədamə.