Titus 3 - Nouveau Testament en Guidar

Wədaw net kretiyenɗe

¹ Aɗumon siti dəpprəmən gən met məlĩyeŋge dit ɗii məs də sembe na dəlva, say dəɓeŋ sitin gəni, də zaɓanən zit naɗɗa wəza mogon ko awandi pakə.

² Adawpeleŋ mbrayen aka ko naway di ɓa, adawgayaŋ ɓa, dəsoŋ də maɗulet zayə, dərbanən sitin gin ɗii wənna ɓe sit ɗii an mogoni.

³ Vi nam bo lahəŋ na mənam tat zigeɗ dəɗerɗe, mawɓe' sit ɗii ɓa, məray gənən wənna, balemɗe na wəsim zəga temtem mənani, an naneken zə ɗəffa, məs darawɗe mənani məsimeŋ zəga mənani, tahəŋ wəzelmə, mənam tatə zeleti.

⁴ Amma Maŋgəlva məzukohgəmə, arbanək mogon nan də wəŋgla nan azet ɗiiyi.

⁵ Akoh gəməka, vi wəza an məgəɗ təstəssi ɓa, amma vi awləmək sahə, adan mərah baptem, Əmpəs Salala* amamək meleketemə, akpaŋgamək ɗii meleketemə.

⁶ Yaŋ Maŋgəlva azi Əmpəs nan akam diiɗa də Zezu Krestu məzukoh gəmə.

⁷ Vi wənna Krestu məsam salala* də mbəlembəle nani aba Maŋgəlva, məsam gən ɗii nawrəh zeŋgille nasuwa ha faɗə, an məs mədaɗum akani.

⁸ Aŋki wəpel an fəkat van kana. Nəŋgələk kəsok gən də wənnəska, vi ɗii məs dətafən Maŋgəlva də ganən gən wəza mogon va adaɗɗaŋ, wənnəs mogoni, watər wəray azet ɗiiyi.

⁹ Amma wəbay ma net dərweŋge, də wəŋɗan wənna əlfa net dəhiŋgiɗmə, wənna wəgaya, də wəbay ma aka wənna ma henziŋ, məzi zukum azani atərna wəray ɓa wən ɗarri.

¹⁰ Ɗəf məzaɗɗa zəga nawɗeket ɗii, məsəɓ sən təl sula, an dəpprəm ɓa, azar səzani apani.

¹¹ Kəsənka ɗəffan vaska amzlaka apanək tive mogoni tayəɗɗa mambraya, atawək kita aka zənna, azəka.

Dawka vi Titus

¹² Pay nədaw slən suk Artemas, walla Titikus, say kəgəm gən zuko kəde gən wərahu a Nikapolis, vi nəɗumək nasva adaka.

¹³ Abaah sən arkali Zenas, də Apollos, asok zuk əpsit zəga vi dətər sit gən wəray vi malaka neti.

¹⁴ Say ɗii nam bo dəyaganən wəɗɗa wəza mogoni, vi kabaah sit ɗii meɓɓeti, an wəray nan tay, an tay vas ɓana wətaf net atər na wəray ɓa.

¹⁵ Ɗiiyen məs də in pak asɗokunko. Asɗet baynəŋgiɗəm məs də wətafa. Mbəlembəle na Maŋgəlva dəsan də munokum pakə.