Titus 2 - Nouveau Testament en Guidar

Wəsən an təstəssə

¹ Amma noko apel an məs dəslə də wəsən an təstəssə,

² vaski bo mezeɗi dəziyən ziti, də ɓatɓatə, də waɓe'eŋ də wərma zit sədəv mambraya, dəsoŋ ɓəlɓəl də wətafa də wəŋgla də wəɓəsən.

³ Vaski bo anah sit məduwileɗi dədawaŋ va an dəslə dənɗaŋ mogoni məza məs tepelkeɗ ɓa, məza balemɗe na mbazla ɓa, dəsoŋ məsənaŋ mogoni.

⁴ Dərbanən sitin gil en kirni wənna wəŋgliw zilŋgiti dit kirtiti.

⁵ Dəsoŋ gən də maɗuleti, də wərma ziti, məɗɗaŋ wəza eŋgil enet da, mogoni, məpprəmən met zilŋgiti, vi adaw wəpel mbrayen aka wənna Maŋgəlva ɓa.

⁶ Vaski anah sit gewleɗi dəsoŋ gən də maɗuleti.

⁷ Nok bo atak zuk səza wəza mambray pakə, vi kəsok gən va ɗəf narban wəza mogoni, asok də goŋga aza zəga narba noko, asok ɓatɓat də wəsən noko.

⁸ Aɗi wəpel an təstəssə, an məs ɗii azelenən na ɓa, vi məzuzeleŋ nok wil dədenən gəni, vi arəhaŋ na wənnawpel mbrayen akam ɓa.

⁹ Aɗi wənnan sit balemɗe dəpprəmən met ɗii neti, dəsoŋ də wəsa' wənnet aza zəga pakə adaw ɓoŋgoŋ sitin ɓa.

¹⁰ Adaw halaŋ sitin ɓa, amma dərbanən zit na məɗɗaŋ mogonəŋ də wəga zit təstəssə, də ɗiiyən gən ki zəga narba pak na, Maŋgəlvayi məzukoh gəmə.

¹¹ Yaŋ Maŋgəlva akos ki mbəlembəle nani, vi kawkoh git ɗii pakə.

¹² Yaŋkan adarban səm va mədawtak zəm aza mambray də wəsim zigeɗ naka dəlvəŋka, məsam gən də maɗula, də təstəssə də geslne nə Maŋgəlva adəv wənziya egge an kakaŋka.

¹³ Mənam tatə ga an mədaɗum akani, tay də nenek akan də wərban akdak na, Maŋgəlva metiŋgini, də məzukohgəm Zezu kertu.

¹⁴ Nan apanək kiyən vimə, vi kamam səka mambray nam pakə, də wəɗɗəm ɗii nan məs akpaŋget salala*, tay də kotorok na wəza mogoni.

¹⁵ Wən aski kan kədarbani, asəɓsiti, ahayẽti də sembe nok grakə. Kədapan ɗəf səmbet wəzelok ɓa.