Roma 9 - Nouveau Testament en Guidar

Maŋgəlva dit ɗii nan məs aweli

¹ An nədawnah kakaŋkəŋ na, gesiŋgi. Na Krestu nani, tepelke nədawa ɓa. Əmpəs Salala* tay zəm məlĩ aka wəɗum na makrawa, ndəni məzaw ku abe nəwə na tepelke ɓa.

^2-3 Gərəŋ nan sawɓa, makraw tay troh troh pay pak vi wənnet milmiŋgiɗu dit əlfiŋgiɗwa. Va mbaguwi kəta na, anəŋglu Maŋgəlva dəray guwə gəni, də uɗakaw də Krestu vi wənneti.

⁴ Net kpak əlfa net Israyelɗeŋ, ɗii məs Maŋgəlva aweləŋ. Maŋgəlva akpaŋgetik ka kirtini, arban sitik gakdak nani. Aynanək wənnan dənɗaŋ, apsitik ma henziŋ də wəsban Maŋgəlva an də goŋga, də mogon məs anah napsit diiɗa,

⁵ ndəɗaŋgəŋ dəhiŋgiɗəm madabəŋ. Ko Krestu, səza əlfa neti. Usoko sən Maŋgəlva məs dəsan metiŋ aka zəga pakə, ha faɗə. Amin.

⁶ Nənah na əpel na Maŋgəlva zəga ɗar mekeleŋgi ɓa. Amma Maŋgəlva də wel ɗii na Israyel pak ka ɗii nan ɓa.

⁷ Ma əlfa na Abrahammi pak kirtin Abraham məŋ də goŋga ɓa. Maŋgəlva anah sən Abraham na: Say səza Isakki adaŋɗanən ma əlfa noko.

⁸ Va wənah na, ɗii məs muwet va ɗii pak adawaŋ na, ndəɗaŋgəŋ kirtin Maŋgəlva ɓa, say məs muwet də wəpel na Maŋgəlva ndəɗaŋgəŋ adaŋɗetin ka kirtini.

⁹ Va Maŋgəlva anah na: An pay va nəɗum sən agapka, anəde, wanərəhət Saratu tuwək wina.

¹⁰ Wənnəski kaaka ɓa. Amma əŋga mula wənnet kirtit Rebekka suleŋ ɗa. Affit takay, ndəni dəhəm Isak.

^11-12 Amma məs Maŋgəlva awel na, aziw gənək aka wəɗum nani. Ndəni anah sət Rebekka na: An daya wagəɗ wəza aba an sawã. Maŋgəlva anəh wənnan na, məɓəlli uwet tagay ɓa, walla dəɗaŋ gən wəza mogoni walla mbrayen ɓa. Maŋgəlva duwel aza ula wəza net ɓa, wənnan tayərban na Maŋgəlvayi də wel də əŋgla nan katər gəni.

¹³ Va məverin adəv ɗerewel məsvani: Zakubu nəŋgələ, Isuwa nəzeli!

¹⁴ An vaski na, mbari mədawnah di? Ya an məs dəslə ɓay Maŋgəlva adaɗɗa sa? Tay vas ɓa!

¹⁵ Apsən Moyis na: Wanəwəl saha aka ɗəf məs duwəl səsahən, wa nəmba ɗəf məzu mba'ən.

¹⁶ Vasna wənnan pak tay vi əŋgla na ɗəf ɓa, walla aka gurom na ɗəf ɓa, say də ula saha na Maŋgəlva kaaka'ə.

¹⁷ Maŋgəlva anah sənək məlĩ Firawna adəv ɗerewel məsvan na: Nəɗikuk məlĩya vi wən taka kaaka'ə, vi nərban gən sembe na məlĩ naw akoko, vi iya naw də tray gən aka dəlva fuŋ pakə.

¹⁸ Va wənah na, vaski Maŋgəlva adawla saha aka ɗəffan aŋgələ, vaski adaɗɗa ɗəf maɓɓan kiyən ɓəllə.

Wəda gədəv na Maŋgəlva də ula saha nani

¹⁹ Kuzuŋ akənah suwənna: Ya an vaski na, vi mi Maŋgəlva adawnah səm na kəray gənənka di? Naway naɓap ətak an aŋgəl di?

²⁰ Midi haya! Mədəŋga mənan məbay gən ma də Maŋgəlva di? Ya zəga məɗɗan wanah sən ɗəf məs dəɗɗa na: Vi mi kəɗu vaŋ di sa?

²¹ Mərkaŋ tat də sembe aka dələv narka ɓa sa? Də dələv məs takaŋka wa təɓap wərka mesteɓeɗ sula, aŋka mesteɓe na sləma, aŋ tamə ɗarə.

²² Vaski kan va wəza na Maŋgəlva asani. Azet ɗii meɓɓet na, aŋgəl ərban əda gədəv nan də sembe nani. Aslək dəzaŋ gəni, amma aɓəs sitike də əŋgla nan diiɗa.

²³ Azet ɗii meɓɓet bo, aŋgələk ərban gakdak nan diiɗa, awlak səsahti, azaɓan sitik daga far laŋka vi dərəhən gən gakdak nani.

²⁴ Anamiyi ayə, suweleŋgit Yahudiyenɗe kaaka ɓa, amma gəm suweleŋgit ɗii məs Yahudiyenɗeŋ ɓa pakə.

²⁵ Va Oze anah adəv ɗerewel məsvan na: Ɗiiyen məs dəsoŋ ɗii nawəŋ lahəŋ ɓa, wanəkpaŋget ka ɗii nawa. Ɗii məs nəŋgliw lahəŋ ɓa, nəkpaŋgetik ka ɗii məs nəŋgələ.

²⁶ Akəti məs mənah lahəŋ na: Ɗii naw kənanaŋ ɓa. Adakki mənah sit na: Kirtin Maŋgəlva madaran kənanaŋ.

²⁷ Məs kleŋ Ezay bo apelik aka wənnet Israyelɗe. Amna: Ko an Israyelɗe anzləraŋgək va hoyoŋko aməlpa, ɗii məs nawkohoŋ suweleŋgit asoŋ na diiɗa ɓa.

²⁸ Ɗəfdaya wagrak an aɗum səka dəlva, wagrak go'u.

²⁹ Va Ezay anah laŋka amna: Va Ɗəfdaya məs dəsan məlĩ aka zəga pakə, dəpəl səm zemvəm kəta ɓana, məkpaŋgək va Sodoma, kəta waməslə, də Gomorra.

Krestu dit Israyelɗe

³⁰ Mbar mədawnah kakaŋ kandi? Ɗiiyen Yahudiyenɗeŋ ɓa, dəkayaŋ tive nasuwa təstəs aba Maŋgəlva ɓa, də as pak arəhənək əsuwa təstəs abani, Maŋgəlva aɗiyik ka ɗii təstəssə, vi atafən Krestu.

³¹ Israyelɗe agayaŋgək əsban ma henziŋ, vi dəsoŋ gən təstəs aba Maŋgəlva, amma dərəhən ɓa.

³² Vi midi? Vi agayaŋgək əɗɗa mogon sən Maŋgəlva də wəza neti. Məza də ətaf ɓa. Ndəni amgbayaŋ aza gərəm məs adawyaŋ na, gərəm namgbaya.

³³ Va məver wənnan lahəŋ na: A Siyonayi nədawɗi gərəm namgbay git ɗiiyi, də məlɓe nazlbeti. Amma ko naway dətafa kita armana ɓa.