Roma 8 - Nouveau Testament en Guidar

Zeŋgille an meleketeni

¹ Vini kana, an ɗəf asapək də Zezu Krestu na, Maŋgəlva ataw na kita akan ɓa.

² Tayəsban dawka na Əmpəs məs məzapsən zeŋgille də tive nasap də Zezu Krestu, dawka nan akoh gənək səza dawka na mambray də an namta pakə.

³ Maŋgəlva sən kiyən aɓapək wəɗɗa an ma henziŋ dəɓap wəɗɗan ɓa, vi mədakəm mənani. Aslənək Wətən də gəba zən va ɗəffa, məs dənan wərak na mambray vanet ɗii pakə. Adəv gəɓa zə ɗəffi ataw kita aka mambraya. Də vaski kan adayki mambraya.

⁴ Kakaŋ na waməɓap wəɗɗa goŋga an məs ma henziŋ ada sohon azamə, vi nam ma Əmpəs na Maŋgəlva mədapprəma, ana gəɓa zəm mədapprəm ɓa.

⁵ An ɗəf asbanək əŋgla na zəni, asna əŋgla nan wadayki maɗulan kana. Amma an Əmpəs na Maŋgəlva asanək amakrani, asna Əmpəs nan wazəm məlĩ aka maɗulani.

⁶ Ɗəf məs dəsban əŋgla na zəni, wamtə, amma ɗəf məs dəsban Əmpəs na Maŋgəlva, nan warah zeŋgille nasuwa ha faɗ də zamə.

⁷ Ɗəf məzasban əŋgla na gəɓa zəni, nan məzu seɓ na Maŋgəlvayi. Asbanna dawka na Maŋgəlva ɓa, gesiŋ asbanna dawka nan ɓa.

⁸ Ɗəf məzasban əŋgla na gəba zəni, ɗəf nan tay lew ara Maŋgəlva ɓa.

⁹ Amma nokum na, əŋgla na gəɓa zukum aday na kikum ɓa. Munokum tatəpprəmən ma Əmpəs na Maŋgəlva, an vaski gesiŋ na Əmpəs nan tay san amakrokum, ɗəf məs dərah Əmpəs məs Krestu adapsən ɗəf ɓa, nan ɗəf nani ɓa.

¹⁰ An Krestu tayəɗɗa wəza amakrokum, asna gəɓa zukum wamtə vi wənna mambraya, amma Əmpəs na Maŋgəlva wapsukum zeŋgille vi təstəs kənanaŋ aba Maŋgəlva.

¹¹ Maŋgəlva asil gənək Krestu səkəti əmta. An Əmpəs nan taya makrokum, asna wandəf gən sukum gəɓa zukum məs dəmtə də Əmpəs nani.

¹² Milmiŋgiɗwa, vi wənnəski ɗəf tay nagəɗ səm dewle nasban əŋgla na gəɓa zəm ɓa, dewle nan agraka.

¹³ An kəsbanənək əŋgla na gəɓa zukum, wakəmtaŋ. Amma an kəpprəmənək ma Əmpəs na Maŋgəlva ka dəbay gən əŋgla na gəɓa zukum, asna wakəsoŋ madarokum.

¹⁴ Məzəpprəmən ma Əmpəs na Maŋgəlva pakə, ndəɗaŋgəŋ dədakpaŋgaŋ kiritn Maŋgəlva.

¹⁵ Vasna wən tay kədaw təŋgən wəker aba Maŋgəlva sən əmpa ɓa, vi əmpəs məs apsukuməŋ dəkpaŋgokum balemɗe nan ɓa, amma say ka kirtin akpaŋgokum. Əmpəs nan tay san adəv kum. Vi wənnəski, mənah səm sən Maŋgəlva na, Affəmə!

¹⁶ Yaŋ Əmpəs na Maŋgəlva adawnah sən əmpəs nam na, nam kirtin Maŋgəlva mənan gesiŋ.

¹⁷ Ya an kirtin mənan na, asna wamərah zəga an məs məzaɓan sit kirtini, zəga məs apsən Krestu wəŋ bo, wapsəmə. Vi an mərahək hara bonoy na Krestu məs azəm saha, asna wamərah haran nam səza gakdak nani.

Gakdak məs dədazani

¹⁸ Nəɗumək wənna wəzəm saha nam adəv duniya an kakaŋkəŋka. Ya gesiŋ kaw slani wənnan də gakdak məs Maŋgəlva adaɗum narban səməŋ ɓa.

¹⁹ Vi zəga məs Maŋgəlva agəɗ pakə, tay pay məs Maŋgəlva adarban sit kirtin də gakdaka.

²⁰ Maŋgəlva apanək duniya pak dəzə gəni, amma vi mambray nani ɓa. Maŋgəlva asgan adəv kita na, vi mambray net ɗiiyi.

²¹ Də as pak Maŋgəlva apsənək tive sən duniya dəga gən wənna əman kiyən səka balam nawzan zəni, dəsap gən dit kirtin adəv wərah kiti də gakdaka.

²² Məsənka, kakaŋ zlaŋ na duniya tayənɗəsa tay zəm saha va ɗak məzuwa.

²³ Duniyayi kaaka ɓa, amma də mənam kirtin əmpəs na Maŋgəlva məs wəvəl nan dabəŋ, mənam tatənɗəsa. Mamaka əŋgla kaw sam də Maŋgəlva va kirtini, amamək səza wəzzan gəɓa zamə.

²⁴ Wəkoh nam tay ta'a kana, amma də wəgani hara kana. Amma an mula gən zəga nan təmsa aza harami na, asna zəga məs mədaga ka mərah gənəŋka, wəɗum nawga zəga an də goŋgay ɓa. Naway dədawnah na kuzuŋ aka zəga məs adawla də haran di?

²⁵ Amma an mənam tatə gan mərah gən zəga nan məza mənam təmsa ulan tagay ɓa, asna mənam tatə gan də wəɓəsən.

²⁶ Əmpəs na Maŋgəlva tay baah səmə, vi mədakəm mənani. Məsən wəzuli sən Maŋgəlva va an də slə ɓa. Əmpəs sən kiyən tay zuli sən Maŋgəlva vimə, də ma net ɗiiyi ɓa.

²⁷ Maŋgəlva məzu kayan makret ɗiiyi, asənək məs əmpəs adaw kayani. Vi Əmpəs na Maŋgəlva tay zuli viyit ɗii na Maŋgəlva va an Maŋgəlva aŋgələ.

²⁸ Məsənka an ɗəf aŋgluwək Maŋgəlva, asna zəga məs Maŋgəlva agəɗ pak wasan zəga mogon azani, an məs Maŋgəlva aɗum sən də əŋgla nani.

²⁹ Daga far lahəŋki Maŋgəlva asinik ɗii nan məs awel pakə, vi dərəhaŋ gən wəkoh vana Wətəni, vi Krestu bo dəsan gən tizi abet milmiŋgiɗin diiɗa.

³⁰ Ɗiiyen məs Maŋgəlva aynan wənnan viyit far pak ayeke, akpaŋgetik təstəs abani atoŋgitik adəv gakdak nani.

Əŋgla na Maŋgəlva metiŋgini

³¹ Kakaŋ na, mi dəmbər səm nawpel əmpa di? An Maŋgəlva tay də mənam na, naway nawzelem əmpa di?

³² Dərma van aka Wətən ɓa, amma appanək amtək agəlam pakə, ya yas vaski na, apsəm na zəga pak dəndən ɓa sa?

³³ Naway nawzəm kiyit ɗiiyen Maŋgəlva awel di? Ɗəf tay ɓa, vi Maŋgəlva arbetik na, ɗii təstəssəŋ abani.

³⁴ Ɗəf tay naw ɓap uwiliyit ɓa. Vi Krestu amtək viti. An dəday ki askəmpa na, asilik səkəti əmta, tay tuŋgo akava dəzəŋ na Maŋgəlva, tay kaman Maŋgəlva vimə.

³⁵ Ya an vaski na, naway naɓap uɗakam də əŋgla na Krestu di? Bonoy sa, wən tattuwãh sa, wərma mama sa, may sa, saha sa, wən mbrayen sa, walla əmta, sa?

³⁶ Va wən məverin adəv ɗerewel anah na: Aka wən noki məsɓət huruɓu, ama əmta, yaŋ adawləmən va timeŋgiɗ məs adawkaŋ atəki nawtaw wəleti.

³⁷ Amma adəv Zəgas pak na, waməday kiyən gesiŋ də wəbaah na Krestu məs dəŋgələmə.

³⁸ Nəsənək gesiŋ, zəga tay nawɗakam də əŋgla nan ɓa, ko əmta, ko zeŋgille, ko maslayɗe, ko sembeɗ meɓɓet temme, ko wənziya an kakaŋka, ko wənziya an dədazani,

³⁹ ko, sembeɗ na disiŋ walla sembeɗ namba dəlva fuŋ, Maŋgəlva arban səmək əŋgla nan də Zezu Krestu Ɗəfdaya namə. Vi wənnani gesiŋ zəga tayaka dəlvəŋ dədawɓap uɗakam də əŋgla na Maŋgəlva ɓa.