Roma 7 - Nouveau Testament en Guidar

Wərban wənnan də wəɗi gulku

¹ Milmiŋgiɗwa, kəsənənək an nəŋgəl ənah sukum səkay, vi kəsənənək ma henziŋ. Ma henziŋ bo nan tay zəm məlĩ aka ɗəf pay asan madaran kaaka'ə.

² Va guluk namba zile, wənna ma henziŋ aynatək aza zilta pay adaw san egge tagay. An zilit amtəka, nat təppələk səza ma henziŋ nani.

³ Vi wənəski an təgəmək zil mbərən daga dəɓəl əmta ɓa, kawyəti na, məgəd mana'a. Amma an zilit amtəka, wənna ma henziŋ na zilit tayakat əmpa ɓa, an təgəmək ɗəf mbərən na nan təgəɗ mana'a əmpa ɓa.

⁴ Vaski bo də munokum milmiŋgiɗwa, kəmtaŋgək də Krestu. Vaski məmtukum kənanaŋ klaza ma henziŋ. Kakaŋ na, na ɗəf mbərən kənanaŋ ɓa, ɗəf məs dəsil səkəti əmta kənanaŋ. Kakaŋ na wakəɓapaŋ wətər wəray sən Maŋgəlva də wəza nokum.

⁵ Gala mədasban wəɗum na gəɓa zəmə, əsim zəga adayək ki zəmə, agulmək adəv mambraya. Ma henziŋ asil gənək əsim zəga azamə, yaŋ mədaɗɗa an naw kisəm əmta.

⁶ Amma kakaŋ na mərəhək kiyəm səza ma henziŋ, məmtəm mənan aza ma henziŋ məs dinamə. Vini kana, məsbana Maŋgəlva də tive an məsvan lahəŋ ɓa, də wənna ma henziŋ məvernəŋ ɓa. Mənam tatəsban Maŋgəlva kakaŋ kan də tive meleketeni ndəni də əmpəs nani.

Mambray də ma henziŋ

⁷ Mbar mədawnah kan di? Ma henziŋ na mbərayni sa? Tay vas ɓa! Amma va ma henziŋ dənah na kədaw sim zəga ɓana, əsim zəga azəm gəm na saha ɓa.

⁸ Ma henziŋ dəsil gən əsim zəga azaw ko midi pakə. Va ma henziŋ tay ɓana, mambray wamtə kəta.

⁹ Lahəŋ na madaraw nan kəta, daga nəɓəl wəsən ma henziŋ tagay ɓa. Adan ma henziŋ ade, yaŋ mambray atəŋ wəmbəla.

¹⁰ Yaŋ naw nəmtəka, ma henziŋ ade bo vi karban tive nawkohyi, amma yaŋ akisu əmta.

¹¹ Yaŋ mambray agəɗ wəza də ma henziŋ naka, vi kawrakawa, yaŋ abayu də ma henziŋ naka.

¹² Gesiŋ ma henziŋ səza Maŋgəlva ade, ma henziŋ nan salalayi aslək sawɓa, mogoni sawɓa.

¹³ Ya yas vaski na zəga mogon wakisu əmta sa? Tay vas ɓa sam! Vasna mambrayi dəgəɗ wəza də zəga mogonəŋka, ha ndəni kay baywa, vi mambray dərban gən zən na mambrayi gesiŋ. Vi wənna ma henziŋgi, mambray arah tive narban daraw nan pakə.

Ɗəf məs mambray aday kini

¹⁴ Məsənək gesiŋ ma henziŋ səza Maŋgəlva ade, amma nawa, ɗəf mədaku nani, balam na mambray nani.

¹⁵ Nawsən an nədaɗɗa ɓa, naɗɗa an nəŋgəl ɓa, amma say an məs nəzelli nədaɗɗa.

¹⁶ An nəŋglu an nədaɗɗa ɓa, asna nəsənək na ma henziŋ mogoni.

¹⁷ Vasna əntə nədaɗɗan sən kiyu ɓa, amma mambray anna makraw dədaɗɗani.

¹⁸ Nəsənka zəga mogon tay zaw ɓa, əntatə gaya ka nəgəɗ gən mogoni, amma naw ɓapən ɓa.

¹⁹ Naɓapəɗɗa mogon məs nəŋgələŋ ɓa, say mambray an məs nəzeli.

²⁰ An əntatəɗɗa zəga an nəzeli, asna əntə nədaɗɗan də əŋgla naw ɓa, mambray ana dəvu dədaɗɗani.

²¹ Aŋki tive na wəza naw va adawdawa: An nəŋgələk wəɗɗa mogoni, say mbrayen nədaɗɗa kaaka'ə.

²² Makraw neki də ma henziŋ na Maŋgəlva sawɓa, amma gəɓa zu tayəsban ma henziŋ maɓɓani.

²³ Ma henziŋ nan tay gay də ma henziŋ an maɗulaw aŋgələ, yaŋ kan akpaŋgaw balam na mambraya, yaŋ kan ma henziŋ na mambray aska wəlla gəɓa zuwa.

^24-25 Maɗulaw aŋgluwək ma henziŋ na Maŋgəlva, amma wəza naw tayəsban ma henziŋ na mambraya. Midi haya, na saha nani! Zəga tay dəpəl su əmpa ɓa, say əmta. Naway nawgilgu sədəv wəzəm saha nawəŋ di? Soko sən Maŋgəlva vi zəzay na Zezu Krestu, Ɗəfdaya namə.