Roma 14 - Nouveau Testament en Guidar

Kədaw taw kita aka məlmuk ɓa

¹ Ɗəffan tay də wətaf nan də sembe ɓa, mərma awaloŋkum, amma kədaw zelenən wəɗum nan ɓa.

² Kuzuŋ ɗəf maɓɓan wətaf nan apsənək tive nawzəm zev zəga pakə. Amma ɗəffan məs wətaf nan tay də sembe ɓa, tayazəm teɓ gaslamba kaaka'ə.

³ Məzu zəm zev zəga pak adaw zelen məzu zəm teɓ gaslamba kaaka ɓa'a, məzu zəm gaslamba kaaka bo adaw zelen ɗəf aŋ ɓa, vi sulegit pak Maŋgəlva atafike.

⁴ Ya naway nawtaw kita aka məgəɗ wəza na ɗəf maɓɓan di? Say daya nan kaaka dədawnah na mogoni walla tay mogon ɓa. Gesiŋ waziw ɓəlɓələ. Vi Ɗəfdaya tay də sembe narma vani.

⁵ Ɗəf maɓɓan tay ɗum na, pay vanaŋka, ndən dayki payas də gakdaka ɗəf maɓɓan tay ɗum na, pay pak daka dakayi. Ko naway dərma zən də wəsən nani dəsbani.

⁶ An ɗəf maɓɓan aɗiyək ki pay maɓɓan dayki pay maɓɓanəska, adaɗɗa vasna kaw gakdakan Ɗəfdayayi, ɗəf məzəm zev zəga pak kaw gakdakan Ɗəfdayayi aŋgələ. Tayəɗɗa soko sən Maŋgəlva vi waya. Vaski bo də ɗəf məs awzəm zəv zəga pak ɓa, tay wəgakdakan Ɗəfdaya, tayəɗɗa soko sən Maŋgəlva vi waya.

⁷ Ɗəf tay ko taka məs dəsan madaran sən kiyən ɓa, ɗəf tay dədamta sən kiyən ɓa'a.

⁸ An mənam tat madaramə, vi kaw gakdakan Ɗəfdaya məsam madaramə. An məmtək bo, vi kaw gakdakan Ɗəfdaya məmtə. Nan mənani, ko an madaram mənani, ko an məmtəka.

⁹ Krestu amtəka, asilik səkəti əmta madarani, vi kawsan Ɗəfdaya net ɗii məmtiti dit ɗii maderet pakə.

¹⁰ Ya nok na vimi kədawtaw kita aka məlmuk di? Vimi dədawzelen di? Mənam pak aməmbat aba Maŋgəlva vi dətaw gən kita akamə.

¹¹ Vi Ɗerewel na Maŋgəlva anahək na: Gesiŋ nulek ɗii pak tahəŋ wəkdukun matakperet abawa, ko naway wanah də wəlan dayadaya na əntə Maŋgəlva. Vaski Ɗəfdaya anahə.

¹² Pay nani, ko naway wazlan sən Maŋgəlva də wənah an agəɗ sən kiyən.

Kədasbər gən məlmuk ɓa

¹³ Ya say məppan səm wənna taw kita aka zəmə. Say məsok səm zəm medaɗɗa zəga an nawtoŋ gən məlməm adəv mambray ɓa.

¹⁴ Də wəsap məs məsap də Zezu Krestu Ɗəfdaya, nəsənək lewlewi, zəga tay mbrayen sən kiyən ɓa, say an ɗəf awlak va mbrayen, asna zəga nan wasan mbrayen azani.

¹⁵ An kuguluk məlmuk adəv wəɗumo, vi wənna way məs kədaw zəma, asna nok kəsban əŋgla ɓa. Kədapan way məs kədaw zəməŋ dəzan gən məlmuk məs Krestu amtə vinəŋ ɓa.

¹⁶ Ɗəf adawpel mbrayen aka zəga məs mədawla mogonəŋ ɓa.

¹⁷ Wən na məlĩ na Maŋgəlva na, wənnan tay də wənna zəga nawzəma də zəga naw saa ɓa, amma nan say wəsuwa də goŋga gəm wəsuwa də təstəssə də Maŋgəlva də zamə də wəsuwa neki, məs Əmpəs Salala apsəni.

¹⁸ Ɗəf məs dəgəɗ sən wəza sən Krestu də tive nani, wanek zə Maŋgəlva də zit ɗii pakə.

¹⁹ Vi vaski məsok səm zəmə məsam gən zamə, məbaah səm sən zəmə.

²⁰ Kədawray gənən wəza na Maŋgəlva vi wənna way ɓa. Way pak mogoni, amma ɗəf adaɗɗa kuzuŋ aka way nan ɓa, an agəɗək na asna way nan waray gəni.

²¹ An vaski na ɗəɗaah kədaw zəmaŋ slu ɓa, kədaw saaŋ mbazla ɓa, kədaɗɗaŋ zev zəga maɓɓan nasbər gən məlmukum maɓɓan adəv mambray ɓa.

²² Mərma an məs kətafaŋ aka wənnəska, aka walaŋ zukum də Maŋgəlva. Mogoni aza ɗəf məs maɗulan aziwi, an wəɗum na makran də hayan ɓa.

²³ Amma an ɗəf agəɗək kuzuŋ aka way nani Maŋgəlva wataw kita akani, vi maɗulan də ziw aka wətaf nan ɓa. An ɗəf dəɗɗa zəga nan də wətaf ɓa wakpaŋ mambray azani.