Roma 1 - Nouveau Testament en Guidar

Wəsɗa

¹ Letərəŋka Pol məs dəsan balam na Zezu Krestu wi dəver azet kretiyenɗe na Roma. Maŋgəlva ayuwəka, aɗiwək ka masləŋ nani, awelwəka ka nərban gən Labara Nenek nani.

² Vi Maŋgəlva anəhək wənna Labara Nenek nan də met məs kleŋɗe daga farə, adəv ɗerewel nani, wakohgit ɗiiyi va məŋɗan wənnan adəv ɗerewel an salala*.

^3-4 Kakaŋ na aɗɗak wəkoh nak də Wətəni, ndəni Zezu Krestu Ɗəfdaya namə. Muwani Zezu Krestu adəv ma əlfa na məlĩ Davitti. Amma Əmpəs Salala* na Maŋgəlva arbanək wənnan appaka ta'ə, ndəni Wətən Maŋgəlva*, daga pay asil gən suweleŋgit ɗii mimtit də sembe nani.

⁵ Vi wənnani, Maŋgəlva avay tive nəkpaŋ gən masləŋ nani, vi nəka gən Labara Nenek nan sit ɗii namba dələv pakə, dətafən gəni, dəpprəmən gən ma Maŋgəlva də wə gakdakan iya na Krestu.

⁶ Nokum bo, aweleŋgit ɗii məs Maŋgəlva ayə dəsoŋ gən ka ɗii na Krestu kənanaŋ.

⁷ Nəsɗo kumko munokum ɗii na Maŋgəlva a Roma pakə, ayukumko ka kəsoŋ gən ɗii nani. Maŋgəlva Affəmə də Ɗəfdaya namə də Ɗəfdaya nam Zezu Krestu dəpsukumən mbəlembəle də zam neti.

Pol tayəɗum nadawla kretiyenɗe a Roma

⁸ Vi zəzay na Zezu Krestu, əntatəɗɗa soko sən Maŋgəlva naw vikum pakə, ko aŋga a duniya pak ɗii tay pelin wənna taf nokum.

⁹ Pay məs nədawzuli sən Maŋgəlva pakə, əntatəɗumon wən nokum. Wən nan gesiŋgi, Maŋgəlvayi naɗɗa saydawa akawa, əntatə gəɗ sən wəza də makraw taka, ndəni wərban Labara Nenek na Wətəni.

¹⁰ Pay pak əntatə kaman Maŋgəlva də zaɓan suwə gən wənna mbat naw anokumda, an aŋgerke.

¹¹ Mawaka ulukum sawɓa, vi kawɗakan zəga məs əmpəs na Maŋgəlva avay suwa. Vaski nəŋgəl wəsɓokum.

¹² Vas kana, məsɓan səm zəm də wətaf namə, ina anəsɓokum də ətaf nawa, munokum bo, wakəsɓawən də wətaf nokum.

¹³ Milmiŋgiɗwa, nəŋgəl kəsənən gən na, təl ɓəɓɓay nəkay tive naw mbat anokumda, amma ha kakaŋka Maŋgəlva dəvay su tive tagay ɓa. Nəŋgəl na nərah gən ɗii naw tubi anokumda, va nərah anet ɗii da aka dələv maɓɓani.

¹⁴ Aŋ wəza nawi, dewle nəka gən wənnan azet məsənaŋ zəga, dit ɗii məs dəsənaŋ zəga ɓa.

¹⁵ Vini nəkay tive narban sukum Labara Nenek na Maŋgəlva, munokum ɗii na Roma tamə.

Sembe na Labara Neneke

¹⁶ Wil aduwənna darban Labara Nenek na Maŋgəlva ɓa, vi sembe na Maŋgəlva taya dəvən. Labara nan waɓap wəkoh git ɗii məs dətafən pakə, anet Yahudiyenɗe adawkoh git dabəŋ, asna ɗii məza Grekɗe ɓa kana.

¹⁷ Vi də Labara Nenek vani Maŋgəlva arbana də wətafi ɗəf adawsan təstəs abani, daga wətəŋ nani, ha gap wəgrak nani: Va məverin adəv ɗerewel anah na: Say də wətafi ɗəf adawsan təstəs aba Maŋgəlva, ɗəf nan wasan də zeŋgille vi ətaf nani.

Ɗii pak məɗɗaŋ mambrayəŋ

¹⁸ Əda gədəv na Maŋgəlva arbanək zən daga sə disiŋ, gədəvən adək aka mambray də ɗarɗar an məs ɗii adaɗɗaŋ pakə, dəsbanən an Maŋgəlva aŋgəl ɓa. Mambray net aɗamanək goŋga na Maŋgəlva.

¹⁹ Maŋgəlva atawək kita aketi, vi an məs ɗəf adawɓap wəsən Maŋgəlva pak ama hereti appaka ta'ə. Vi Maŋgəlvayi dəvan dərbansiti.

²⁰ Gesiŋ ɗəf tay dədawɓap ula Maŋgəlva ɓa, amma daga azəməɗ dəlva, sembe nani dəkpak nan pak arban sitik ɗii də wəza nani. Vi wənnani ɗii tahəŋ də tive nawnah na məsən ɓaɓa.

²¹ Asənənək Maŋgəlva, amma də gakdakanən va an dəslə ɓa, dəɗɗaŋ sənən soko ɓa. Vi wənnani kana, wəɗum net akpaŋgək dərwa, makret mbrayeni aknahək də guzliyo.

²² Yaŋ adaw kaɓaŋ, azet na asənaŋgək zega, amma akpaŋgaŋgək dərweŋge.

²³ Dəngereŋ wəzuliyaŋ kaw gakdakan Maŋgəlva məs amta ɓaɓa nɗəɗaŋ dal əzuli sit fotoɗe net ɗii mimtiti, dit biŋgeɗi, dit zigeɗ mamayeɗi, gəm zigeɗ məkroketi.

²⁴ Vini Maŋgəlva apet dəsbanən gən wəɗum na makreti, dəray gənən gən zit də wəza na wil net məs adaɗɗaŋ awalaŋ ziti.

²⁵ Akpaŋganənək goŋga na Maŋgəlva ka tepelke, azuliyaŋ sənənək zəga məs Maŋgəlva agəɗe, də wəgəɗ sən wəza apanənək ɗəf məs dəɗɗa zəga van dərəŋ, aslək wəgakdakan anan ha faɗə. Amin.

²⁶ Vini Maŋgəlva apet adəv wəsim zəga na wil netiŋka. Gil net bo, akpaŋganənək wəvoŋ an dəslə, də an məs dəslə aza ɗəf ɓa.

²⁷ Vaski bo, zel apanən wəvoŋ dit gili, say əvoŋ dit zel tusso, vaski kan adaɗɗanən zəga na wil nani. Warəhaŋ kita va an dəslə aza mambray net an adaɗɗaŋ.

²⁸ Adan dəŋglaŋ wəsən Maŋgəlva ɓa. Vini Maŋgəlva apet dəɗɗanən gən wəɗum mbrayen neti, dəɗɗanən gən an məza tay lew ɓa.

²⁹ Tahəŋ wətafən wən naɗɗa wəza mambray ko muwandi pak pay pakə, aknəhaŋgək də wəsim zəga temtemi, də wəɗɗa zəga nzeɗi də kotoroku, tay bayaŋ gəbaya, tay gayaŋ dit ɗiiyi, məɗɗaŋ vuruməŋ də uwa tepelke.

³⁰ Tay peleŋ wənnasiya aza ziti, tay zelin Maŋgəlva. Məkayaŋ mamaŋ, məzuɗiyən ki zitiŋ, məzu gakadakanən zitiŋ ɗarə. Pay pak tay kayaŋ tive meleketen naɗɗa mambraya. Apprəmən met migilit ɓa.

³¹ Tahəŋ də əɗum mogon ɓa, aslgaŋ sləma aka wən məs aynaŋ ɓa, əŋgla taya zet ɓa, awlaŋ saha aket ɗii ɓa.

³² Asənənək kita na Maŋgəlva gesiŋ, ɗii məɗɗaŋ zev wəza vas pak kita net say əbeyti. Də as pak tayəɗɗanən wəza nan vaska'a. An məs dəray day van əmpa na, yaŋ kadaw ɗiyən kiyit məɗɗaŋ zev wəza vas pakə.