Matiye 26 - Nouveau Testament en Guidar

Kuket narma Zezu

¹ Adan Zezu agrak wəpel nan pakə. Apsit gewleɗ nan na:

² Kəsənənək na apələk pay sula wəzləra na Paska* wagəɗə. Warmanən Wətən Ɗəffa* kakpa'ən akawəlaŋga məzliwrihe.

³ Ɗii gugiriɗ net məs dəlveŋge dit ɗii gugiriɗ net Yahudiyenɗe akkalaŋka ana Kayafasda ɗəf metiŋ net məs dəlveŋge.

⁴ Aslerinik meti vi karma Zezu məɗamma, kawbayni.

⁵ Amma aɓɗaŋ na: Mədarman pay wəzləra ɓa, vi ɗii wasilginən wənna.

Guluk təmanək mel aka Zezu

⁶ Yaŋ Zezu asan a Baytaniya eŋgil ana Simoŋ da, məskokolo.

⁷ Ɗak tədek azani də bəbər na mel tursan wəlbah nan tuwãh diiɗa. Təmanək aka Zezu daga asan kawzəma.

⁸ Adan gewleɗ nan awlətəni gədivit adəka, aɓɗaŋ na: Vi mi wəray gən vaŋdi ma dawtər di?

⁹ Kəta kaw vəlni deleɗ diiɗa kapsit məs sahaŋɗe ɓa sa.

¹⁰ Amma adan Zezu asən an məs adawpeleŋ: Apsitna, vi mi kədawzəm gətən saha nat ɗakəŋ di? An məs təgəɗ suwəŋ mogoni.

¹¹ Vi məs sahaŋɗe wasoŋ də munokum ha faɗə, amma nawa nəsaw na də munokum ha faɗ ɓa.

¹² Təmanək tursan azawa, təman suna, vi na ndəkwa.

¹³ Gesiŋ nədawnah sukum: Atəki adawpelin Wən Nenek a duniya pakə, kawpelin ni an məs ɗak kəŋ təgəɗəŋ ka, vi kaɗumon wənnata.

Zudas azəmək ki Zezu

¹⁴ Yaŋ suweleŋgit gewleɗ nan klaw kiyit sula neki, taka məs iya nan na Zuda Iskariyot, ambatka zet ɗii gugiriɗ net məs dəlveŋge.

¹⁵ Apsit na: Mi kədawvayaŋ an nərban sukumək kuket narman di? Anɗet sənənək suleyɗe na təbəs kaklaw hoku, apsinənke.

¹⁶ Daga dəpaski Zudas atəŋ wəkayan kuket narma Zezu məza tuwã ɓa.

Zezu tay zəm way na Paska* dit gewleɗ nani

¹⁷ Payan dabəŋ na wəzləra net dupeŋɗe məza wuɗo ɓa, gewleɗ na Zezu azoŋko, assohonənka: Aŋga kəŋgəl məzaɓan gən zəga nawzəm na Paska di?

¹⁸ Amna: Məduwaŋ awalaŋ gəla aza wisnena, mənah sən na: Məsən zəga amna: Pay naw agapka, wanəɗɗa wəzləra na Paska dit gewleɗ naw anokda.

¹⁹ Gewleɗ aɗɗanənək va an Zezu aɗisiti, adanənək way nawəzləra na Paska.

²⁰ Yaŋ moskoy agəɗə asanək dit gewleɗ nan klaw kiyit sula atəki nawzəma.

²¹ Adan adawzəmaŋ, amna: Ɗəf taka sumbokum wazəm kiwa.

²² Atapetik gewleɗ nani, assohonənək də mabərki ziti: Əntə soko Ɗəfdaya?

²³ Zezu azlanka amna: Ɗəf dədawgul van adəv hĩlu taka də innəŋka, ndəni dədawzəm kiwa.

²⁴ Wətən Ɗəf*, wamtə va məver wənnani. Amma bonoy warəh ɗəffan dədawzəm ki Wətən Ɗəffa. Ɗəf nan ɗəɗaah va muwani ɓa.

²⁵ Zuda məs dəzəm kiyən assohonəka: Əntə soko Ɗəfdaya? Zezu zlan sənəka: Vaski, əstə.

Way an salala*

²⁶ Adan adawzəmaŋ, Zezu agəmək dupeŋ, agəɗək soko sən Maŋgəlva, arɗanəka, apsitik gewleɗ nani, apsit na: Məgəma, məzəma, aŋki gəɓa zuwa.

²⁷ Agəmtək həloŋ na biya net wəleŋɗe, agəɗək soko sən Maŋgəlva apsitike, amna: Məse sədəvət pakə.

²⁸ Vi eŋki mbel zuwəŋ ndəɗaŋgəŋ tive nawsleret ɗii də Maŋgəlva azoŋguk viyit ɗii diiɗa, mbel nawsleret ɗii də Maŋgəlvaŋgə.

²⁹ Əntatə nah sukum abeska, nəsəna ɗaah biya net wəleŋɗe ɓa, say pay nədawsaa meleketen adəv məlĩ na Affuwa.

³⁰ Yaŋ ayaŋ gəlya nawzləra ambataŋ aka gərəm na hereme.

Zezu də Piyer

³¹ Zezu apsit gewleɗ nan na: Dəfɗəŋka munokum pak wakəpawəni, vi məverni laŋka: Wabayən məzutaɗa, timeŋgiɗ watrayaŋ.

³² Amma pay nədawsilyaw sətəki əmta wanəmbat dabəŋ kikum a Galile.

³³ Piyer apsən na: Ko ɗii pak dəpokuni, naw kam nəpok na ɓa sam.

³⁴ Zezu azlan sənəka: Gesiŋ nədawnah suko, dəfɗəŋka, ha gap gəmnda adawhəm man paa taka wakənah na, kəsənu ɓa təl hoku.

³⁵ Piyer amna: Ko də dewle wanəmtə di'isi, nənah na vas ɓa. Vaski gewleɗ anahaŋ pakə.

Zezu tay zuli a Gesemene

³⁶ Adan Zezu ade dənɗaŋ aki məs adawyaŋ na Gesemene. Apsit gewleɗ nan na: Məsoŋ aŋka, nəmbat əzuliya.

³⁷ Agəmək Piyer, dit kirtin Zebede sula, atəŋgək wəsən wəzəm saha a makran sawɓa.

³⁸ Yaŋ apsit na: Makraw asawəka ha tayəŋgəla wəbaywa. Məsuwaŋ aŋka, məga də ina.

³⁹ Ambatək abe suɗike, asanka akak mirbisin a fuŋgu, azuliyək vaska, amna: Aw Əbba va wagəɗ na, azargət həloŋ na bonoy kəŋ səzawa. Amma də as pak adaɗɗa va nəŋgəl ɓa, say va an kəŋgələ.

⁴⁰ Amilik əmpa azet gewleɗ hoku neki, arihik məleŋti. Apsən Piyer na: Kəɓapən na wəgan də'in ko ler taka ɓa sa?

⁴¹ Munokum pakə, məga məzuliyə vi kədawguloŋ adəv wərak ɓa. Əmpəs na ɗəf aŋgələk vaska, amma gəɓa zən mədakni.

⁴² Abitik ma sula'ən, azuliyək vaskəmpa: Əbba an agəɗ na kappat həloŋ na bonoy kəŋ tətoŋ gən kappaw ɓa, asna say nəsaa gən bonoy nani, əŋgla nok dəgəɗ gəni.

⁴³ Aməka zet gewleɗ nan əmpa, arihik məleŋti, dəɓap əganən ɓa.

⁴⁴ Apetike, ambat kəmpa, azuliyək va an dabəŋ naka.

⁴⁵ Adan ade azet gewleɗ nani apsit na: Məzuleŋgeŋ, munokum tatə fet sa? Yaŋ pay agapka, kapsəni Wətən Ɗəf* avet məs mambrayɗe.

⁴⁶ Məsili, mədamə. Awla ɗəf nawzəm kiyu yaŋ agapka.

Va armanən Zezu

⁴⁷ Daga Zezu dəɓəl wəgrak wəpel nan ɓa, Zuda an taka səmbet gewleɗ klaw kiyit sula adeke. Ɗii diiɗa azoŋguk dəndən, dit kafahiɗe gəm zleŋɗe. Ɗii gugiriɗ net məs dəlveŋge, dit ɗii məzuslereŋ net Yahudiyenɗe dəsliŋgini.

⁴⁸ Zuda məs dəzəm ki Zezu apsitik kukete, amna: Ɗəffan nədasɗan va baynawa, ndəniyi, mərma.

⁴⁹ Zuda adek də kakara aza Zezu ləŋgə, apsən na: Usɗoko məsən zəga, aɓeke zani arəŋ gənək baran də mani.

⁵⁰ Zezu apsən na: Baynawa aɗɗa an dəkikuŋka. Yaŋ ɗii azoŋ, asapaŋ aka Zezu, armanəni.

⁵¹ Yaŋ ɗəf taka səmbet məzəsba nən Zezu aptuwək kafahi nani, abələk gawla na daya net məs dəlveŋge atawək sləmani.

⁵² Yaŋ Zezu apsən na: Agul kafahi nok a gəlani, vi ɗii məgəmaŋ kafahi də kafahi adawzaŋ.

⁵³ Walla kəsən na wanəɓap wəkaman Affuwa, də baah suwə gəni, dəslin su gən ngaɓa net, maslayɗe gap klaw kiyit sula ɓa sa?

⁵⁴ Amma an vaski ɓa na mbari an ɗerewel anah adawsan goŋga di? Vi ɗerewel amna dəgəɗ gən vaska.

⁵⁵ Zezu apsit na: Kəzoŋ də kafahiɗe dit zleŋɗe, vi kawrəmu va məvoŋ tive sa? Pay pak əntat də munokum, əntatə pel sukum adəv gəla metiŋ naw zuliya* kərəmwən ɓa.

⁵⁶ Amma as pak agəɗ na vi wənnet məs kleŋɗe na dəv ɗerewel dəsan gən gesiŋ. Yaŋ gewleɗ pak apanənka, anzuwanka.

Zezu taya ba kita

⁵⁷ Ɗii məs dərmanən Zezu akanənək ana Kayafas da daya net məs dəlveŋge dit məsənaŋ zəga na ma henziŋ na Maŋgəlva, gəm ɗii gugiriɗe na dəlva akalaŋka.

⁵⁸ Amma Piyer asbanək Zezu daga sə faraɗa, ha ana ɗəf daya net məs dəlveŋge da. Atoŋko daŋgla, asanək dit məzu gaŋ, vi kawla an dədaɗɗa pakə.

⁵⁹ Yaŋ ɗii gugiriɗ net məs dəlveŋge, dit məzu slereŋ na dələv pakə, akayaŋgək saydawa na tepelke aka Zezu vi kawbayən.

⁶⁰ Amma dərəhaŋ ɓa, ko dit ɗii diiɗa aɗɗaŋ saydawa na tepelke akani. Yaŋ ɗii sula azoŋgu,

⁶¹ aɓɗaŋ na: Ɗəffəŋka amna: Wanəɓzlu gəla metiŋ naw zuliya* wanərka pay hoku.

⁶² Ɗəf daya net məs dəlveŋge asilke, apsən Zezu na: Kəzlana ko wən taka ɓa sa? Madaw nahaŋ akokuŋ di?

⁶³ Amma Zezu ɓatɓati dəzlan ko wən taka ɓa. Yaŋ ɗəf daya net məs dəlveŋge apsən na: Əntat əssohoko də iya na Maŋgəlva an madaran, anah səmə an əstə Messiya* Wətən Maŋgəlva*.

⁶⁴ Zezu apsəna: Vaski. Amma wanənah sukum abeŋka akulanən Wətən Ɗəf* dawsan aka va dəzəŋ na Maŋgəlva məs də gakdaka, akulanən daw mə'a aka slay buwən a disiŋ.

⁶⁵ Yaŋ daya net məs dəlveŋge aŋgar lukutɗe nani, amna: Apelik mbrayen aka Maŋgəlva. Kam məŋglu saydeweɗ meɓɓet di? Kakaŋ bo kəpprəmənək mbrayen an apel aka Maŋgəlva.

⁶⁶ Mbar kənahaŋ di? Aɓɗaŋ na: Agəɗək mbrayen gala nawbayən akani.

⁶⁷ Yaŋ atəf sənən mefɗe rani, aslkər nənka, ɗii meɓɓet arganənka,

⁶⁸ aɓɗaŋ na: Asəna an Messiya* kənani naway dərguk di? An məs kleŋ kənani.

Va Piyer anah na dəsən Zezu ɓa

⁶⁹ Piyer asanək addak adaŋgla, waŋ goruk na daya net məs dəlveŋge tənah sənka: Nok bo istat də Zezu ɗəf na Galileŋka.

⁷⁰ Piyer azelenik wənnan abet ɗii pakə, amna: Nəsən va kədaŋgla wənah ɓa.

⁷¹ Adan agil amba guɗuku, guluk maɓɓat tulaka, təpsit ɗii nadak na: Ɗəffəŋka mataki də Zezu na Nazaretəŋka.

⁷² Piyer azelenik wən nan əmpa dəwəsuwaya: Nəsən ɗəfəs ɓa.

⁷³ Wənziya suɗike ɗii məs nadak azaraŋgək aza Piyer apsənən na: Gesiŋ nok bo ɗəf nambet kənani, vi hərzlumuk dərboko.

⁷⁴ Yaŋ Piyer atəŋ wənah na: Maŋgəlva dəzawa an wən nədawa, naw suway, nəsən ɗəfəs ɓa. Yaŋ ləŋ bazlay ahəmə.

⁷⁵ Piyer aɗumonək an məs Zezu anahsən na: Gəmnda paa man taka wakəgesl'ne na kəsənu ɓa təl hoku. Agilke paka ahəmək dəsin sawɓa.