Matiye 10 - Nouveau Testament en Guidar

Masləŋɗe klaw kiyit sula

¹ Zezu ayek gewleɗ nan klaw kiyit sula, azoŋko zani. Apsitik sembe narɓə tuyeŋɗe na mbəlgit məs gbəgbaɗe gəm na mbəlgit məs dəmbərsiti.

² Iya net masləŋɗe klaw kiyit sula van yeŋki. Simoŋ məs adawyaŋ na Piyer, gəm məlmən Andre, Zak məlmən Zaŋ kirtin Zebede.

³ Filip gəm Bartolomi gəm Tomas gəm Matiye, mətaf zomorgol, Zak wətən Alfa, gəm Tadde.

⁴ Gəm Simoŋ an naweleŋgit ɗii məs dədaw ngəlaŋ wəgil gitin ɗii net səka balam, gəm Zudas Iskariyot, məs dəzəm ki Zezu.

Wəza net Masləŋɗe

⁵ Zezu aslinik gewleɗ klaw kiyit sula neki, aɗi sitik wənna: Kədadoŋ atəki net əlfaɗe meɓɓet ɓa, kədadoŋ azet Samariyeɗ ɓa'e.

⁶ Amma məduwaŋ azet Israyelɗe məs tahəŋ məzet va timeŋgiɗi.

⁷ Mərban sit Məlĩ na Maŋgəlva, go'oy aza ərban zəni.

⁸ Məmbəlgit məs gbəgbaɗe, məsilgit ɗii məmtiti, məmbəlgit məskokoleɗi, mərɓih tuyeŋɗe. Mekeleŋ kərəhəni, məpsit mekeleŋ tamə.

⁹ Kədawkaŋ meleŋge avokum ɓa walla təbəs net suleyɗe ɓa, walla deleɗ a ziba nokum ɓa.

¹⁰ Kədawkaŋ zəga adəv gabal nawzəm aka tive ɓa, walla lukut sula ɓa, kədawgəmaŋ hensekɗe ɓa, walla sulegere ɓa. Vi məgəɗ wəza agapək narəh zəga nawzəm nani.

¹¹ An kəgapaŋgək awlaŋ gəla metiŋ walla awalaŋ gəla muzliya, məkay ɗəf an na tafkum annanda, məsuwaŋ annanda ha gap wəmbat nokum.

¹² An munokum tatə toŋgoŋ adəv gəla nani mənahsit ɗii na dak na: Zam anokumda.

¹³ An ɗii nadəv gəla nan atafkumənko, as na agapaŋgək narəh zam vani, amma an dətafkumən annet da ɓa, mətoŋ də zam nokum.

¹⁴ An kətoŋgoŋko adəv gəla walla awalaŋ gəla, aɓoŋgoŋgək daw tafkuməni walla dapprəm wən nokum, məgil suwalaŋ gəla nani, məttu' hologudum səza tulkum.

¹⁵ Gesiŋ nədawnah sukum pay wəgrak dəlva, kita net waday ki kita net ɗii na Sodoma də Gomorra.

Wəzəm saha an dədazani

¹⁶ Yaŋ, əntatə slən kum va timeŋgiɗ aweleŋgit kərɗe munya. Vi vaski məsoŋ də kuket va dohoŋɗe, məza mbrayen akokum ɓa va məŋgərwiɗe.

¹⁷ Amma məga zukum, vi wakukumən aba kita wavərkumən adəv gəla nawpel wənneti.

¹⁸ Wakukumən abet ɗii gugiriɗe dit məlyeŋge vi wənnawa, vi kəɗɗanən gən saydawa nokum abeti də abet ɗiiyen məza Yahudiyenɗeŋ ɓa.

¹⁹ Payan adaw kukumən aba kita, kədaɗumoŋ an kəl peleŋ sitin ɓa walla kuket an kəl nahsitin ɓa. Wəpel an kəl pelsitini wade amokum dəpaska.

²⁰ Wəpel nan ade na səzokum ɓa, amma Əmpəs na Affən dədawpelin amokum.

²¹ Ɗii wapsitin milmiŋgiɗit vi kawbayti, affiŋgiɗit kirin bo vas adaɗɗaŋ. Kirin wasilyoŋ aket migilti, vi kawbeyti.

²² Ɗii namba dələv pak wazelkuməni viwa. Amma ɗəf an dədawgan ha aza wagraka wakohu.

²³ An armaŋgək mama azokum awalaŋ gəla aŋka, məduwaŋ awalaŋ gəla mbərən. Gesiŋ nədawnah sukum: Kəkgrakən na walaŋ gəla net Israyelɗe pak wəmbat adak dabəŋ ki wəziya na Wətən ɗəf ɓa.

²⁴ Məzuyagan zəga aday na ki məzərbansən ɓa, məgəɗ wəza aday na ki daya nan ɓa.

²⁵ An məzuyagan zəga agapək wəsən na məzuyagansəni, an məgəɗ wəza agapək gakdak na daya nani məkki. Ya an məyani affən gəla na Belzebul, asna ɗii neŋgil ananda adayaŋ na ki as də əray ɓa sa?

Naway an dəslə na geslne sən di?

²⁶ Kədaw geslne'eŋ sit ɗii ɓa. Wən məɗamma pak wapasə an məɗamman pak kawsənənni.

²⁷ An məs nədawnah sukum ara guzli pakə, mərban amaheret ɗii pakə. An məs nədawnah sukum məɗamma pak məgil gən apaka.

²⁸ Kədaw geslne'eŋ sitin məzu bayyən gəɓa zukum ɓa, amma aɓapənna wəbay zeŋgille zukum ɓa. Amma məgeslne'sən Maŋgəlva məs nawzan gəɓa zukum də zeŋgillokum pak aka offo məza, amtə na ɓa.

²⁹ Kaw vilti biŋgeɗ sula aka suley, taka ɓa sa? Amma tay dədaw bəta ko səmbret ko taka ɓa say an Maŋgəlva dəŋgələ.

³⁰ Nokum bo denɗeke na gəɓa zukum məŋɗeti taka taka pakə.

³¹ Vi vaski kədaw geslne'eŋ ɓa, kədayaŋgək kiyit biŋgeɗ də sləma.

Wəɗɗa saydawa aka Zezu də wəzelni

³² Ko naway dənah wənnawa abet ɗiiyi, wanənah wənnan tam aba Affu na disiŋ.

³³ Amma məs dənah wənnaw abet ɗii ɓa, nənah na wənnan aba Affu na disiŋ ɓa'a tamə.

Zam mi ɓa say kafahi

³⁴ Kədaɗumoŋ na zam nəki adəv dəlva ɓa. Nəde vi kaw ki zam adəv dələv ɓa, amma nəde na vi kawki kafahi nəde.

³⁵ Nəde na, vi kawɗakan wiyən də affəni waŋ dət mata, ɗak dət atəta.

³⁶ Ɗii na dəv gəla na ɗəffa wazel nəni.

³⁷ Ɗəf an dəŋglu affəni, walla mani daykiwa nan dəgap nawsan də in ɓa.

³⁸ Ko naway an dəgəm wəlaŋga məzliwrihe nan dəsbaw gən ɓa dəgap ɗəf naw ɓa.

³⁹ Ɗəffan dəŋgəl wəkoho gən zeŋgilleni nan wazani. Amma ɗəffan dəzan zeŋgillen viwa nan warəha.

Riba

⁴⁰ Ko naway dətafkum ataf wəka, məs dətafwa, atafək ɗəf an də slənwa.

⁴¹ Ko naway dətaf məs kleŋ vi asan məs kleŋ na Maŋgəlva warah riba va məs kleŋ. Ko naway dətaf məgəɗ goŋga vi goŋga nani, warah riba va məgəɗ goŋga.

⁴² Gesiŋ nədawnah sukum: Ko naway dəpsən iŋkile zazay sən muzliya nambet gewleɗ nawiŋki, vi asan gawla nawa, nan warah riba.