Markus 9 - Nouveau Testament en Guidar

¹ Zezu anah sit əmpa na: Intatə nah sukum gesiŋ, ɗii meɓɓet tahəŋ aŋka amtaŋ na ɓa sam say an awlanənək məlĩ na Maŋgəlva dazan də sembe nani.

Zezu akpaŋganək zəni

² Dərɓaga wuvoŋ slire, Zezu agəmək Piyer də Zak gəm Zaŋ, akek aka gərəm zezeke, ndəɗaŋ katirgiti. Gəɓa zən akpaŋgək ama hereti.

³ Lukut nan awiɗke babar ndasl, ko ɗəf tay aka dələv na ɓap uwiɗen lukut va nan ɓa.

⁴ Yaŋ gewleɗ nan hoku nek awlanən Eliyas də Moyis, tahəŋ wəpel də Zezu.

⁵ Piyer apsən Zezu na: Mərbə zəga, mogoni məsam gən aŋka. Apam məzaɓ zlereɗe hoku, taka viko, taka vi Moyis, taka əmpa vi Eliyas.

⁶ Piyer dəsən məs adawpel ɓa, vi ndəni dit gewleɗ pak ageslne'eŋgək sawɓa.

⁷ Ernene adeke asəritike, apprəmənək wəla wəpel sit daga sədəv ernene naka: Aŋki Wətuwa an məs nəŋgələ, məpprəm mani.

⁸ Go'ləŋ gewleɗ awlaŋgək amaŋgaveti, dulaŋ ɗəf ɓa say Zezu katər gəni gəm ndəɗaŋ.

⁹ Adan adaprikeŋ səka gərma, Zezu abayək meti: Kədawnahaŋ sənən ɗəf zəga məs kulaŋ ɓa, say an Wətən Ɗəf* asilik sətəki əmta də zeŋgilleni.

¹⁰ Asbanənək wənnani, Amma assohonənək ma ziti: Mi wəsilya sətəki əmta di?

¹¹ Yaŋ assohonən Zezu: Vi mi məsənaŋ zəga na ma henziŋ adawnahaŋ na say Eliyas dəde gən dabəŋ tagay di?

¹² Azlansitike: Gesiŋ Eliyas wade dabəŋ, dəzaɓet gən zigeɗ pakə, yaŋ vaski na vi mi ɗerewel adawnah na dewle Wətən Ɗəf wasə bonoy diiɗa, ɗii wazelini di?

¹³ Naw əntatə nah sukum: Eliyas adek səkay, ɗii bo aɗɗaŋ sənənək an aŋglaŋ, va an ɗerewel anah akani.

Va Zezu ambəl gən wiyən mitemin

¹⁴ Adan agapaŋ azet gewleɗ meɓɓeti, awleninik ɗii diiɗa akdahaŋgək kiyit karkar. Yaŋ məsənaŋ zəga na ma henziŋ adawbayaŋ ma dənɗaŋ.

¹⁵ Adan ɗii awlanən Zezu, ageɗ sitik gərəŋ sawɓa, anzoŋguk azani vi kasɗani.

¹⁶ Zezu assohotik gewleɗ nani: Mi kədawbayaŋ ma dənɗaŋ di?

¹⁷ Ɗəf taka suweleŋgit ɗii məkkelit anah sənəka: Mərbə zəga, nəki sukuk wətuwa. Tay də witem akani, aɓap wəpel ɓa.

¹⁸ Ko aŋga ambat pak witem tayərmani, tayəslbani afuŋ. Tayəɗɗa maslsla mani tayəmpran slayni, zən pak suroksurok. Nəkemetik gewleɗ noko dərɓahən gən witem nani, amma dəɓapənən ɓa.

¹⁹ Zezu anahsitike: Munokum məs kətafaŋ ɓa. Pay gbəgbari nənzi də munokum kpak di? Aŋga nan namagaŋ wəɓəs sukum di? Məkkisuwa.

²⁰ Akisənənək wiyən naka. Adan witem awla Zezu, aɓlanəka aslbak fuŋ, akəɗəŋləŋka aɗɗak maslsla mani.

²¹ Zezu assohonək affəni: Daga dewɗe adaɗɗan vaŋkəŋ di? Yaŋ affən amna: Daga səka muzliya nani.

²² Witem təl ɓəɓɓay adaslban aka offo aret iŋkile pakə vi kaw bayən. Amma an wakəɓap na, kamə awəl saha akamə abaah səmə.

²³ Zezu azlan sənəka: Vimi kənah na, an wakəɓəsa di? Amma zəga pak tay tuwãh aza ɗəf məs dətaf ɓa.

²⁴ Go'ləŋgə affən wiyən aɗiyək geŋgere: Nətafəka, abaah suwa, amma tattuwãh taya zaw də wətafən.

²⁵ Adan Zezu awle ɗii diiɗa adazoŋ azeti, yaŋ anahsən witem na: Is witem mətak ɗəf dapprəma gəm daw pele, əntatə nah suko: Agil səka winəŋka, kədawgul ɗaah akan əmpa ɓa.

²⁶ Witem aɗiyək geŋgere, asərwəɗəka, agilik səkani. Yaŋ asan va məmtəni: Ɗii məs dulanən pak anahaŋgək na: Amtəka.

²⁷ Amma Zezu asil gənək wina aziwke.

²⁸ Adan Zezu atoŋ eŋgili, gewleɗ nan azoŋguk azani assohonənək katər gəni: Vi mi nam məɓap wərɓəhən ɓa di?

²⁹ Zezu azlansitike zemvin arɓəh ɗar ɗar ɓa say də wəzuliya.

Zezu arbanək wəmta nan ma sula'ən də wəsilya sətəki əmta

³⁰ Adoŋguk sədaka atoŋgoŋguk kəla ka dələv na Galile. Zezu dəŋgəl ko ɗəf taka də səŋ gən aki asan ɓa.

³¹ Vi arban sitik gewleɗ nani apsit na: Wətən Ɗəf* wambat avet ɗiiyi, wabayini, amma dərɓaga wuvoŋ hoku wasil sətəki əmta.

³² Gewleɗ nan dəpprəmən wənnan kotak ɓa, amma ageslne'eŋgək dassohoni.

Naway nawsan daya di?

³³ Yaŋ agapaŋ a Kafarnahum, adan aguloŋ eŋgili, Zezu assohetik gewleɗ nani: Aka wən mi kədawbayaŋ ma aka tive di?

³⁴ Amma aɓətaŋka, vi aka tive a abayaŋgək ma na naway daya aweleŋgit di?

³⁵ Zezu asənka, ayek gewleɗ klaw kiyit sula neki, apsit na: An ɗəf aŋgələk wəsan daya say dəmndagan zən dərɓeget ɗii pakə, dəɗɗa sit gən wəza pakə.

³⁶ Yaŋ Zezu agəm wiyən muzliya, aziwginik aweleŋti. Aslanək vani apsit gewleɗ nan na:

³⁷ Ɗəf an dəŋglu wiyən muzliya va aŋyaŋka də iya nawa, annaw aŋgələ. Ɗəffan dəŋgəluwa, annaw aŋgəl katərgu ɓa, amma ɗəf an dəslənu aŋgələ.

Ɗəffan məs dəzeləm ɓa ɗəf nami

³⁸ Yaŋ Zaŋ anahsən Zezu na: Mərbə zəga, mulak ɗəf tayərɓəh tuyeŋɗe də wəya noko. Amma mətakəka, vi tay də mənam ɓa.

³⁹ Amma Zezu azlansitike: Kədawtakənən ɓa. Ɗəf an dəgəɗ sokene də iya nawa, aɓap na wəɗɗa mbrayen azaw ɓa.

⁴⁰ Vi ko naway məs awzeləm ɓa ɗəf nami.

⁴¹ Ɗəf an dəpsukum iŋkile suɗike vi iya nawa vi ɗii na Krestu kənanaŋ, fəkat ɗəf nan warəh riba nani.

Wəmzlagən ɗəffa

⁴² Ɗəf məs dəmzla gən wiyən səmbet məs dətafaŋ ɗəɗaah wəlawsən gərəm metiŋgin awlani, kasgan a pe'e.

⁴³ Vi vaski an vok amzla gukuk adəv mbrayen, atawa. Ɗəɗaah wərəh zeŋgillok dəvok mərslan ki wugul aka offo məza amta ɓa dəvok sula gəni.

⁴⁴ [Adak na tentewilgeɗ net amtaŋ ɓa offo nan bo amta ɓa'a.]

⁴⁵ Walla an tuluk agulkuk adəv mambraya, atawa. Ɗəɗaah wərəh zeŋgillok də tuluk vədal ki wəmbat aka offo məza amta ɓa də tuluk sula gəni.

⁴⁶ [Adak na tentewilgeɗ net amtaŋ ɓa offo nan bo amta ɓa'a.]

⁴⁷ Vaski bo an horok akukuk wəɗɗa mambraya, akdaha, ɗəɗaah wərəh zeŋgillok də horok taka ki wəmbat aka offo məza agrak ɓa də horok sula gəni.

⁴⁸ Adak na tentewil geɗ net amtaŋ ɓa offo nan amta ɓa'a.

⁴⁹ Fəkat ko naway pak kawslanni də offo.

⁵⁰ Bəttu zəga mogoni: Amma an lelem na bəttu agraka, mbarmbar lelem nan adawsan ampa di? Məsoŋ də bəttu azokum, məsoŋ də zam awalaŋ zukum.