Markus 3 - Nouveau Testament en Guidar

Ɗəf məs van məmtəni

¹ Yaŋ Zezu agul adəv gəla nawpel wənnet Yahudiyenɗe əmpa. Ɗəf məs van məmtən taya daka.

² Ɗii meɓɓet tahəŋ adak ulanən Zezu də kuket neti, kuzuŋ wambəl gən ɗəffəŋ pay naffet* na kawəliyən.

³ Zezu ayak ɗəf məs van məmtən naka, apsən na: Asili, aziw aweleŋgit ɗii pakə.

⁴ Yaŋ assohet ɗii yen dədawlanəni: Mi ma henziŋ nam apsəm tive naɗɗan pay naffet di? Wəɗɗa mogon sa, walla wəɗɗa mbrayen? Wəkoho gən zeŋgille ɗəf sa, walla wəzani? Amma dəzlanən ɓa.

⁵ Zezu awlek na gədəfən nawda, makra ɓəɓəl net asanəka. Yaŋ anahsən ɗəf məs van məmtən naka: Appar voko. Apparək vani. Van abəlka.

⁶ Farisiyenɗe* ambataŋka, akkalaŋgək dit ɗii na Herodə, aslerinik meti vi kawbay Zezu.

Ɗii dəzoŋ aza Zezu ama pe'e

⁷ Yaŋ Zezu ambat dit gewleɗ nan kla ma pe'e na Galile. Ɗii diiɗa asbanənka daga sə Galile gəm sə Zude,

⁸ gəm sə Zerusalem, gəm səka dələv na Idumaya, daga səbal sən məlpa na Zordan, gəm səka dələv na maŋgava Tirus də Sidon. Ɗii pak azoŋguk azani, vi apprəmənək labara na wəza nan ɗaahə.

⁹ Zezu anah sitik gewleɗ nan də kayaŋ sənən gən bəlay, vi ɗii adawhaslanən ɓa, vi ɗii net diiɗahəŋ sawɓa.

¹⁰ Vi daga laŋka ambəlgitik ɗii diiɗa, vi vaski məs gbəgbaɗe pak akkalaŋgək azani vi kawrəŋ gəni.

¹¹ Ɗii məs də əmpəs mbrayen aketi, adan awlanən Zezu asbəraŋgək abani, aɗiyaŋgək geŋgere: Əstə Wətən Maŋgəlva*.

¹² Zezu ahayetik ɗii mitemit də sembe, vi adarbanən ɓa.

Va Zezu awel masləŋɗe klaw kiyit sula

¹³ Yaŋ Zezu ateŋ aka gərma, ayek ɗii məs aŋgələ dəzoŋ gən azani.

¹⁴ Awelik klaw kiyit sula, ayek na masləŋɗe. Vi dəsoŋ gən dəni, kawslinit wəpel wənna Maŋgəlva.

¹⁵ Zezu apsitik sembe narɓahan əmpəs mbrayen.

¹⁶ Klaw kiyit sula məs Zezu awel nek yeŋki: Simoŋ (Zezu apsənək iya na Piyer),

¹⁷ Zak wətən Zebede də Zaŋ an məlməni. (Zezu apsitik iya na Bonerges va wənah na ɗii məs dəgulyoŋ va hay na buna.)

¹⁸ Andre, Filip, Bartolomi, Matiye, Tomas, Zak wətən Alfa, Tadde, Simoŋ na Kanana,

¹⁹ gəm Zudas Iskariyot məs dəzəm ki Zezu azet məzuzelini.

Zəga tay dəsapan Zezu də Satan ɓa

²⁰ Zezu amilik eŋgili. Ɗii akkalaŋgək azan diiɗa əmpa, ha Zezu dit gewleɗ nan dərəhaŋ təki nawzəm way ɓa.

²¹ Adan hilfiŋgiɗin apprəmənən vaska, azoŋguk wəɓelin, vi ɗii tahəŋ wənahaŋ na: Mitemini.

²² Məsənaŋ zəga na ma henziŋ azoŋguk daga sə Zerusalem aɓɗaŋ na: Tay də Belzebul akani. Ɗii meɓɓet aɓɗaŋ na: Məlĩ net tuyeŋɗe dəpsən sembe narɓihti.

²³ Zezu ayek ɗii azani apel sitik də wən məkpaŋga. Amna: Mbarmbar Satan adawɓap wərbahan Satan di?

²⁴ An məlĩ awdakək temtem na, məlĩ nan asana ɓa.

²⁵ An ɗii na daŋgla taka awslereŋ ɓa, asna daŋgla nan asanna mogon ɓa.

²⁶ Vaski bo an Satan asilik aka zəni asna məlĩ nan wawɗakə aziw na ɓa, asna sembe nan bo wagrakə.

²⁷ Ɗəf aɓapna wətoŋ eŋgil ana ɗəf guromda kawhal zigeɗ nan ɓa, say an aɓrukuk ɗəf gurom tagay dəndegin zigeɗ nani.

²⁸ Gesiŋ nədawnah sukum: Ɗii warəhaŋ wəviyan mambray net pak də wəpel mbrayen məs adawpeleŋ.

²⁹ Amma ɗəf dədawpel mbrayen aka Əmpəs Salala* arah na wəviyan mambray nan ɓa ha faɗə, mambray nan wasan ha faɗə.

³⁰ Zezu anah vasna vi ɗii meɓɓet anahaŋgək na: Zezu tay də əmpəs mbrayen akani.

Milmiŋgiɗin Zezu dət mani

³¹ Yaŋ ma Zezu dit milmiŋgiɗin azoŋgu. Aziweŋgək appaka, aslənaŋgək azan wəyani.

³² Ɗii diiɗa tahəŋ ɗew ɗew amaŋgavani. Apsənən na: Mok dit milmiŋgiduk tahəŋ wəkoyokəni.

³³ Azlan sitik na: Nawattə əmma di? Mədəŋgaŋ milmiŋgiɗu di?

³⁴ Awlek ɗii yen dəkdahaŋ kiyən amaŋgavani amna: Əŋkiŋ may əmma dit milmiŋgiɗwa.

³⁵ Ɗəf məs dədaɗɗa wəŋgla na Maŋgəlva ndəni məlmuwa gəm məlmu məguluŋgəta dət əmma.