Markus 1 - Nouveau Testament en Guidar

Va Zaŋ məgəɗ baptem adarban wənna

¹ Apprəma va halabara nenek məs dəgəɗ aka Zezu Krestu Wətən Maŋgəlva*,

² atəŋgək va məverin adəv ɗerewel na məs kleŋ Ezayi: Apprəma va Maŋgəlva anahə: Əntatə slən masləŋ naw aboko, də zaɓan gən tive viko.

³ Ɗəf tay wənzla vamvəl awra: Məzaɓan tive vi Ɗəfdaya, məɗɗa sən tive dəsoŋ gən sarara.

⁴ Vaski, Zaŋ arban zən awra, tayəɗɗa baptem, tay nah wənna Maŋgəlva sit ɗiiyi. Amna: Mətubiyə mətaf baptem vi Maŋgəlva də viyan sukum gən mambray nokum.

⁵ Ɗii naka dələv na Zude pakə, dit ɗii nawalaŋ gəla na Zerusalem pak azoŋguk aza Zaŋ, vi kapprəm wəpel nani, yaŋ arbanən mambray neti. Aɗɗa sitik baptem a məlpa na Zordan.

⁶ Zaŋ aguluk lukut məɗɗan də denɗeke na zlogomo, aynanək dədakən də kətu, zəga nawzəm nan bo heyɗeŋɗe də ammama nawra.

⁷ Anah sitik ɗiiyi: Ɗəf tay na zan dərɓagawa sembe nan daykiwa: Nəgap ko naw ɓe nawpel helege net hensek nan ɓa.

⁸ Naw əntatə gəɗ sukum baptem dit iŋkile, amma nani wəgəɗ sukum baptem də Əmpəs Salala*.

Wəɗɗa baptem sən Zezu

⁹ Dəpaska Zezu adek daga sə Nazaret dələv na Galile, aza Zaŋ aɗɗa sənək baptem a məlpa na Zordan.

¹⁰ Adan Zezu agil siret iŋkile, awlak disiŋ akolko, Əmpəs apirikik akani va mukuɗuŋgulo.

¹¹ Wəla adek sə disiŋ amna: Əstə Wətu an na makrawa, əntatə neken zu di'is sawɓa.

Wərak na Zezu

¹² Go'ləŋgə əmpəs akak Zezu awra.

¹³ Wəvoŋ kaklaw poɗo awra, Satan tay rakani. Zezu tay dit sliwɗe nawra, maslayɗe bo tahəŋ wəɗɗaŋ sənən wəza.

Va Zezu aye mərmaŋ kilif poɗo

¹⁴ Dərɓaga məsgan Zaŋ məgəɗ baptem a daŋgay, Zezu adek a Galile, apelək Wən Nenek na Maŋgəlva sit ɗiiyi.

¹⁵ Amna: Pay agapka, məlĩ na Maŋgəlva go'oyi, məkpaŋgan wədaw nokum, mətaf Wən Neneke.

¹⁶ Adan Zezu tayaka tive namaŋgava pe'e na Galile, awlak Simoŋ də məlmən an Andre, tahəŋ wərmaŋ kilif a pe'e wəsgetin zəveɗe aret iŋkile disge.

¹⁷ Zezu apsit na: Məsbawa wanəkpaŋgokum məkayaŋ ɗiiyi.

¹⁸ Go'ləŋ apetinik zəveɗe neti, asbanənka.

¹⁹ Adan ambat abe suɗike, awlak Zak wətən Zebede, də Zaŋ an məlməni, tahəŋ adəv bəlay wəzaɓetin zəveɗe neti.

²⁰ Go'ləŋgə ayeke, apanənək affit Zebede dit məɗɗaŋ wəza nani, asbanənək Zezu.

Ɗəf məs witem adawzəm gən saha

²¹ Yaŋ Zezu dit gewleɗ nan aguloŋ awalaŋ gəla na Kafarnahum. Adan pay naffet* agapə, Zezu aguluk adəv gəla nawpel wənnet Yahudiyenɗe, arban sitik wənna.

²² Ɗii məs dəpprəmən wərba nan pak agətaŋgək akan sawɓa, vi dərban vanet məsənaŋ zəga na ma henziŋ ɓa, amma arbanək va ɗəf məs də sembe.

²³ Vaski bo pay nani, ɗəf mitemin adek adəv gəla nawpel wənnet Yahudiyenɗe.

²⁴ Ahayka, is Zezu na Nazaret məssok də mənam di? Kədek vi kawzəm gəm saha sa? Nəsənkuko, əstə ɗəffan Salala* na Maŋgəlva an məs aslənnə.

²⁵ Zezu abayək gagay sən witem naka. Apsənna: Aɓətə, agil səkani.

²⁶ Witem aɓlanək ɗəf nak də sembe, yaŋ aŋgəsl vamvəl daya daya, witem apprəmək ma Zezu agilik səka ɗəf naka.

²⁷ Ɗii pak agətaŋka, assohonənək ma ziti aɓɗaŋ na: Aŋ miyaŋ di? Zev wərba meleketen vaŋkəŋ di? Vi də sembeyi Zezu adawnah sit witemɗe, yaŋ adapprəmən mani.

²⁸ Go'ləŋgə halabara nan atrayək ko aŋga pak aka dələv na Galile.

Zezu ambəl gitik məs gbəgbaɗe diiɗa

²⁹ Səza agulyoŋ sədəv gəla nawpel wənnet Yahudiyenɗe, go'ləŋ a ambataŋgək ana Simoŋ da də Andre dit may Zak gəm Zaŋ.

³⁰ Attən Simoŋ tat ɗuffo də gbəgba' na gamba, adan Zezu ade, anah sənənək wənna gbəgba' nata.

³¹ Zezu azarək azata, armak vata, asilgətəka. Gamba appatəka təmbəlka, tədah sitik waya.

³² Adan moskoy agəɗə, pay bo atəpka, ɗii akininik ɗii məs gbəgbaɗe dit ɗii mitemti pak aza Zezu.

³³ Ɗii nawalaŋ gəla nan akkalaŋgək a memeŋle na gəla nani.

³⁴ Zezu ambəl gitik məs gbəgbaɗe temtem diiɗa, arɓehetik witemɗe səket ɗii mitemit pakə, dəpet witemɗe dəpeleŋ gən ko mi akan ɓa, vi asənənka.

Zezu tay mbat malaka vi kawpel wənna Maŋgəlva

³⁵ Pumpum nani Zezu alvəɗək də mompum pumu, ambatək amapoho katər gəni, azuliyək adaka.

³⁶ Simoŋ dit məzəsbanəni akayanənka.

³⁷ Adan arəhəni, apsənən na: Ɗii pak tahəŋ wəkoyokəni.

³⁸ Amma Zezu apsit na: Mədamsa awalaŋ gəleɗe'eŋ gu' eŋki. Kawpel Wən Nenek adaka, vini nəde.

³⁹ Yaŋ ambat awalaŋ gəla na Galile pakə, apelik adəv gəla nawpel wənnet Yahudiyenɗe, arɓehetik witemɗe səket ɗiiyi.

Zezu ambəl gənək məs kokolo

⁴⁰ Yaŋ ɗəf məs kokolo ade aza Zezu, yaŋ akduk takpar afuŋ aba Zezu, akamani: Aw an kəŋgəlka akəɓap kəmbəl guwa.

⁴¹ Zezu awələk saha akani, atələk vani, arəŋ gənəka, apsən na: Nəŋgəlka say ambələ.

⁴² Go'ləŋ kokolo apanək ɗəf vani.

⁴³ Zezu alhanəka, abayək mani.

⁴⁴ Apsən na: Apprəma kədawnah sən ɗəf ɓa. Amma dokkərban zuk aza məs dələv* na Maŋgəlva, vasna wapsən zəga sən Maŋgəlva va Moyis aɗi wənnani, vi wərban sit ɗii pak na kəmbəlka.

⁴⁵ Amma yaŋ ambatə, atrayanək wənnan ko aŋga. Apelik labara nani, ko Zezu dərah wətoŋ awalaŋ gəla kerekere ɓa, vini asan ma poho awara. Ɗii azoŋguk azani daga ko səŋga pakə.