Luka 9 - Nouveau Testament en Guidar

Zezu aslinik gewleɗ nan klaw kiyit sula

¹ Yaŋ Zezu akkelet gewleɗ klaw kiyit sula, apsitik daya də sembe narɓih tuyeŋɗe gəm na mbəl git məs gbəgbaɗe.

² Aslinik wərban wənna məlĩ na Maŋgəlva də wəmbəl git məs gbəgbaɗe.

³ Apsit na: Kədawgəmaŋ zəga vi malaka nokum ɓa, ko zleŋge walla gabal ɓa, ko zəga nawzəma ko deleɗ ɓa, ko naway adawgəm lukut sula ɓa,

⁴ adəv gəla an mətaf kum pak məsoŋ adak ha gap pay nawmbat nokum.

⁵ An ɗii aɓoŋgoŋguk dawtaf kumən awalaŋ gəla nani, məgil suwalaŋ gəla nani, mətu hologodo səza tulkum dəsan gən saydawa azeti.

⁶ Ambataŋka, ambataŋgək awalaŋ gəla temtemi, arbanənək halabara neneke, ambəl gitinik məs gbəgbaɗe.

Attapanək Herodə

⁷ Yaŋ Herodə daya na dəlva, apprəm halabara nani, attapanəka. Vi ɗii meɓɓet aɓɗaŋ na: Zaŋ dəsil səka əmta.

⁸ Ɗii meɓɓet tamə aɓɗaŋ na: Eliyas dəde. Yaŋ əmpa ɗii meɓɓet aɓɗaŋ na: Suweleŋgit məs kleŋɗe en daga farfar dəsil səka əmta.

⁹ Amma Herodə amna: Nətawək ki Zaŋ. As ɗəf naŋgay məs nədapprəm adawpelenən wənnan kpak kəŋ di? Yaŋ akay tive kawla Zezu.

Zezu azəm gitik ɗii uzinere sle

¹⁰ Masləŋɗe amilyoŋko, anahsənənək Zezu an məs aɗɗaŋ pakə. Andek ketirgiti ambataŋgək atəki maɓɓani, kla za walaŋ gəla məs adawyaŋ na Baytisayda.

¹¹ Ɗii pak apprəmənənka, asbanənka. Zezu atefike, apel sitik halabara na məlĩ na Maŋgəlva, ambəl gitik ɗiiyen də wəray naw mbəl gən ziti.

¹² Adan pay go'oy aza wətəpa, gewleɗ klaw kiyit sula nek azaraŋgək amaŋgavani, apsənən na: Anah sit ɗiiyiŋ dəmbataŋ kla aweleŋgit gəleɗe, dərəhaŋ gən zəga nawzəma də təki nafna, vi aŋka awra mənani.

¹³ Zezu apsit na: Munokum məpsit zəga nawzəma. Amma yaŋ azlanən na: Zəga taya vam ɓa, say dupeŋɗe sle gəm kilif sula kaaka'ə. Asna an kəŋgələk na məmbatə, məlbaah gən zəga nawzəm sit ɗiiyiŋ pak kan soko?

¹⁴ Wəŋɗa net ɗii bo uzine sle. Zezu apsit gewleɗ nan na: Mənah sit dəsoŋ kaklaw sle sle.

¹⁵ Aɗɗanənək vaska, asoŋguk pak vaska.

¹⁶ Zezu agimik moŋgosokɗe dit kilif sula neki. Aslanək haran a disiŋ agəɗək soko sən Maŋgəlva vi way vani, yaŋ awɗakani, yaŋ apsit gewleɗ nani vi duɗakanən gən sit ɗiiyi.

¹⁷ Ɗii pak azəmaŋka, abaŋka, yaŋ akkaletin dəmbər git moŋgosokɗe, aknahaŋgək kekelɗe klaw kiyit sula.

Piyer agəɗ saydawa na Zezuwi Messiya*

¹⁸ Yaŋ pay maɓɓani Zezu tay zuli katər gəni. Gewleɗ nan a zoŋguk azani. Assohetike: Mi ɗii adawpeleŋ akawkpak di?

¹⁹ Azlan sənənək na: Ɗii meɓɓet tahəŋ wənahaŋ na Zaŋ məgəɗ baptem kənani, ɗii meɓɓet tahəŋ wənahaŋ na Eliyas kənani, ɗii meɓɓet tamə ɗəffi səmbet məs kleŋɗe en farfarə disil səkəti əmta.

²⁰ Assohetike: Ya nokum, ka nawa kədawɗi wən di? Piyer amna: Əstə Messiya na Maŋgəlva.

Zezu arbanək əmta nan də wəsilya nani

²¹ Yaŋ Zezu aɗi wənnan sit gewleɗ nan də gagay adawnah sənən ɗəf ko taka wənnan ɓa.

²² Yaŋ aməs wənaha dewle Wətən Ɗəf* wazəm saha diiɗa, avet ɗii gugiriɗ dit dayaɗe net məs dəlveŋge na Maŋgəlva, dit məsənaŋ zəga na ma henziŋ wasganən agisbe. Wabayəni amma dərɓaga wəvoŋ hoku wasil sətəki əmta də zeŋgilleni.

²³ Yaŋ anah sit ɗii pakə. An ɗəf aŋgələk wəsbawa, say dəpan wəɗum vi ki zəni, də slan wəlaŋga məzliwrihe nan pay pakə, dəsbaw gəni.

²⁴ Vi ko naway dəŋgəl əkoh gən zeŋgilleni wazani. Amma məs dəzan zeŋgillen vi wənnawa, wakoh gəni.

²⁵ An ɗəf arəhək duniya pakə, amma azannək zeŋgilleni, walla adayək ki zəga pak mi altər sən di?

²⁶ Vi vaski an wil adanənək ɗəf suwa walla vi wəpel wənnawa, Wətən Ɗəf wagəɗ sən zəga na wil pay adazan də gakdak nani gəm gakdak na Affəni, gəm gakdak net maslayɗe en salala*.

²⁷ Gesiŋ nədawnah sukum ɗii meɓɓet suwalaŋkum amtaŋ na ɓa say an awlanənək məlĩ na Maŋgəlva.

Zezu akpaŋganək zəni

²⁸ Yaŋ wuvoŋ dədopoɗo dərɓaga apel labareɗeski, agəmək Piyer də Zaŋ gəm Zak apeŋgək aka gərəm vi kawzuliya daka.

²⁹ Adan adawzuliya haran akpaŋka, lukut nan akpaŋgək babar ndasl, awiɗke.

³⁰ Go'ləŋ ɗii sula tahəŋ wəpeleŋ dəndən may Moyissi də Eliyas.

³¹ Arbanənək gakdak na disiŋ, apeleŋgək aka wənna wəza nan va adagrak də wəmta nan a Zerusalem.

³² Piyer dit ɗiiyen dəndən pak aleŋgeŋgək diiɗa sawɓa, amma adan afɗaahaŋ, awlanənək gakdak na Zezu dit zel sula məs dəsoŋ dəndən.

³³ Gala ɗiiyeŋ sula adadoŋ səza Zezu Piyer apsən na: Mərbə zəga mogoni məsamgən aŋka. Appam məzaɓ zlereɗe hoku, taka viko, taka vi Moyis, taka əmpa vi Eliyas dəsən məs adawpel ɓa.

³⁴ Adan adawpelin vaska, ernene adek wəsiritti. Gewleɗ nan ageslne'eŋke adan awlanən aguloŋ adəv ernene.

³⁵ Wəla adek sədəv ernene naka, amna: Aŋki Wətuwa an məs nəweli, məpprəm mani.

³⁶ Adan wəla nak apeli, dulaŋ ɗəf maɓɓan ɓa, say Zezu katər gəni. Daga pay dəpaska'a ləŋ gewleɗ assuwaŋgək ɓata ɓata'ə, də nahaŋ sənən ko ɗəf taka an məs awlaŋ ɓa.

Va Zezu ambəlgən wiyən mitemin

³⁷ Adan aprikeŋ səka gərma vit pumpum nani, ɗii diiɗa azoŋko, almaŋgək də Zezu.

³⁸ Ɗəf aŋgəzlək vamvəl aweleŋgit ɗiiyi, amna: Mərbə zəga nəkamokuko, wiyən naw yana, ndəni taka, ndəni meɗegewe nawa.

³⁹ Tuya tay wərmani, ndən ləŋ gəm wənzla vamvəlla, wəɓlan də sembe gəm wəgil gən masla amani, tay zəm gən saha. Wəɓəta na say də tattuwãha, dərɓaga an azəm gənək saha.

⁴⁰ Nəkametik gewleɗ noko dərɓahanən gəni, amma dəɓapən wərɓəhən ɓa.

⁴¹ Zezu azlanək na: Awlet kana munokum məs wətaf nokum tay diiɗa ɓa, məs mambrayɗe, pay gbəgbari nənzi də munokum kpak di? Aŋga nan namagaŋ wəɓəs sukum di? Aki wətuk van ɗa.

⁴² Adan adazani, tuya aslbaka, aɓlanək də sembe. Amma Zezu aɗiyək wənnan sən tuya, ambəl gənək wiyən naka, amndaganək aza affəni.

⁴³ Ɗii pak agətaŋgək aka sembe na Maŋgəlva. Adan ɗii pak agətaŋgək aka an məs Zezu agəɗə, apsit gewleɗ nan na:

Zezu arbanək wəmta nan ma sula'ən də wəsilya sətəki əmta

⁴⁴ Məpprəm lewlewi, an məs nədawnah sukum kakaŋka. Wapsənən Wətən Ɗəf avet ɗiiyi.

⁴⁵ Amma gewleɗ nan dəpprəmən gabba wənnan ɓa, wənnan akpaŋgək azet məɗama vi adapprəmnən ɓa. Geslne adek dassohon aka wənnani.

Naway nawsan daya di?

⁴⁶ Yaŋ gewleɗ adassohonən zit na naway nawsan daya di?

⁴⁷ Zezu asənək wəɗum na makreti, aslanək wiyən muzliya aziwginik aweleŋti,

⁴⁸ apsit na: Ko naway dətaf wiyən muzliya də iya nawa: Anaw atafə. Ko naway dətafwa ana ɗəf də slənu atafə, ɗəffan muzliya nambokum pakə, ndəni daya.

Ɗəffan məs dəzeləm ɓa ɗəf nami

⁴⁹ Yaŋ Zaŋ anahsən Zezu na: Mərbə zəga, mulak ɗəf tayərɓəh tuyeŋɗe də iya noko. Amma mətakəka, vi tay də mənam ɓa.

⁵⁰ Zezu azlan sənəka: Kədawtakənən ɓa, ko naway an tay də kire nokum ɓa, ɗəf nokumi.

Ɗii na Samariya dəŋgəmaŋ wətaf Zezu ɓa

⁵¹ Adan pay nawmbat a disiŋ go'oy, yaŋ aɗum nawmbat a Zerusalem.

⁵² Aslinik mesliŋɗe nan abani. Ambataŋka, atoŋgoŋguk awalaŋ gəla net Samariyeɗi vi kawzaɓan təki naw teh nani.

⁵³ Dətafnən ɓa vi aŋgələk wəmbat a Zerusalem.

⁵⁴ Adan Zak də Zaŋ awlanən vaska, aɓɗaŋ na: Ɗəfdaya wakəŋger məs soh gən offo dəpri gən sə disiŋ dəzet gən sa?

⁵⁵ Amma Zezu akpaŋganək harani, ahayetike, amna: Kəsəŋgən na əmpəs awani azokum di ɓa.

⁵⁶ Wətən Ɗəf* dəde vi kawzan zeŋgillet ɗii ɓa, amma ade na vi kawkoh gən zeŋgilleti. Yaŋ ambataŋ awalaŋ gəla maɓɓani.

Ɗii məs dəŋglaŋ wəsbanən Zezu

⁵⁷ Yaŋ adadoŋ aka tive, ɗəf taka apsəna: Wanəsboko ko aŋga kəmbat di pakə.

⁵⁸ Zezu azlan sənək na: Balwayɗe tahəŋ də vovɗe, biŋgeɗ tahəŋ dit gəleɗe. Amma Wətən Ɗəffa* tay də təki naw voŋ na feten zən ɓa.

⁵⁹ Apsən ɗəf maɓɓan na: Asbawa. Ɗəf nan apsən na: Məsən zəga apəl su tive ndaw wəndək əbba tagay.

⁶⁰ Zezu apsənna: Appet ɗii mimtit də ndikin mimtit neti, amma nok dok kərban Wən Nenek na məlĩ na Maŋgəlva.

⁶¹ Ɗəf maɓɓan bo apsəna: Wanəsboko Ɗəfdaya, amma apəl su tive nəmbat wənah sit ɗii nanaw da na naw nəmbatək kana.

⁶² Zezu apsən na: Ko naway dəɗi van aka bardaw, yaŋ adawla dirɓe, atər na wəray aza məlĩ na Maŋgəlva ɓa.