Luka 5 - Nouveau Testament en Guidar

Gewleɗ məs Zezu ayə dabəŋ

¹ Pay maɓɓani Zezu tay ziwe ama busgum na pe'e na Galile, ɗii bo tahəŋ wə haslanən ziti vi kapprəm wəpel na Maŋgəlva.

² Awlek bəlayɗe sula ama busgum net mərmaŋ kilif agulyoŋ sidivti, tahəŋ wəskoɓɓin zəveɗe neti.

³ Zezu atoŋguk adəv bəlay an taka bəlay na Simoŋgi. Akkamanək dəzar gənə gən bəlay van suɗike səza ma busgum. Zezu asanək adəv bəlay, atəŋgək wəpel sit ɗiiyi.

⁴ Adan agrak wəpel nani, apsən Simoŋ na: Aka bəlay aret iŋkile kpukpumɗe, asna is dit məɗɗaŋ wəza noko, kəsgetin gən zəveɗe nokum, wa kərmaŋ kilfi.

⁵ Simoŋ azlan sənək na: Məsən zəga, kim məvoŋ na dəfɗəŋ akaɗɗa wəza aret iŋkile mərah zəga ɓa, amma adan əstə kənahə, wanəsget zəveɗe.

⁶ Asgetinik zəveɗe, armaŋgək kilif diiɗa, ha zəveɗe atəŋgaŋgək wəŋgaraŋ.

⁷ Ayeninik bayneŋgiɗit nadəv bəlay maɓɓan vi dəzoŋ gən wəbaahsiti. Azoŋko, aknahənək bəlay sulegit pak dit kilfi, ha bəlayɗe atəŋgaŋgək wətəpa aret iŋkile.

⁸ Adan Simoŋ Piyer awla vaska, akdukuk takpran aba Zezu, azuli sənəka, amna: Ader səzawa, Ɗəfdaya, naw də mambray nani.

⁹ Simoŋ agətka, ɗiiyen dədaɗɗaŋ wəza dəndən pak agətaŋka vi kilfiŋ armaŋ diiɗeŋki.

¹⁰ Vaski bo may Zak də Zaŋ kirtin Zebede məzə ɗaŋ wəza də Simoŋ agətaŋgə. Amma Zezu apsən Simoŋ na kədaw geslne ɓa wakəsok məkay ɗiiyi.

¹¹ Akeninik bəlayɗe net ama busgum, apetinik zigeɗ pak asbanənək Zezu.

Zezu ambəl gənək məs kokolo

¹² Daga Zezu adawsan awalaŋ gəla maɓɓani, məs kokolo adeke. Adan awla Zezu, azuli sənəka, akkamanəka, amna: Məsən zəga, an kəŋgəlka akəɓap əmbəl guwa,

¹³ Zezu atələk vani, arəŋ gənəka, apsən na: Nəŋgəlka, say ambələ. Go'ləŋ kokolo apanək ɗəf vani.

¹⁴ Zezu abayək mani: Kədawnah sən ɗəf ɓa, amma dok kərban zuk aza məs dələv* na Maŋgəlva, vasna wapsən zəga sən Maŋgəlva va Moyis aɗɗi wənnani, vi wərban sit ɗii pak na kəmbəlka.

¹⁵ Də as pak wənna Zezu tay ɓaya, atrayək aweleŋgit ɗiiyi də wəmbat abe abe. Ɗii diiɗa azoŋko zani vi kapprəm wəpel nani, də wəmbəl git səka gbəgba' neti.

¹⁶ Amma Zezu agilke, ambatək awra katər gəni vi kawzuliya.

Zezu ambəl gənək məs gbəgba' məɗeŋgreŋ

¹⁷ Yaŋ pay mbərən Zezu tay pel wənna. Farisiyenɗe* dit məsənaŋ zəga na ma henziŋ tahəŋ gurom gurom amaŋgavani, daga suweleŋgit gileɗe naka dələv na Galile azoŋgu, daga sə Zude may sə Zerusalem. Sembe na Ɗəfdaya tay də Zezu na mbəl git məs gbəgbaɗe.

¹⁸ Ɗii akinənək ɗəf maɓɓan də gbəgba' məɗəŋgreŋ, aslanənək də zəga naw voŋ nani, akayaŋgək tive nawtoŋ gən aza Zezu, vi kaw voŋ gən abani.

¹⁹ Amma adan awlenin ɗii diiɗa awsənən təki nawtoŋ gən ɓa. Vi vaski apeŋgeŋ dəndən aka gəla, abətən ki gəla, aprik gənən dədak də hargaŋgu neki duwaleŋgit ɗii ha atəki Zezu asani.

²⁰ Adan Zezu awla wətaf neti, apsən məs gbəgba' na: Baynawa mambray nok avika.

²¹ Məsənaŋ zəga na ma henziŋ dit Farisiyenɗe* atəŋgaŋgək wəɗumoŋ: Aŋ ɗəf naŋgay yaŋ di, məpel mbrayen aka Maŋgəlva vaŋkəŋ di? Naway məviyan mambray an Maŋgəlvayi ɓa di?

²² Zezu asənək wəɗum neti apsit na: Vi mi kədaw yanən zukum də wəɗum vas kəŋ di?

²³ Awani məza tay tuwãh ɓa di? Wə nah na mambray nok avika sa, walla wənah na: Asili, doko sa?

²⁴ Amma nəŋgəl vi kəsənən gən na Wətən Ɗəf* tay də sembe aka dələv na viyan mambraya. Yaŋ apel sən məs gbəgba' məɗeŋgreŋ naka: Intatə nah suko: Asili, agəm zəga naw voŋ noko, doko ŋgil anok da.

²⁵ Məs gbəgba' nak asilik go'ləŋ keret ɗii pakə, agəmək zəga naw voŋ məs avoŋ akan naka ambatək eŋgil annanda tay ɗi ki Maŋgəlva.

²⁶ Ɗii agətaŋka, agakdakanənək Maŋgəlva, geslne edeke, aɓɗaŋ na: Dəpaŋ məwələk sokeneɗi.

Va Zezu aya Lewi

²⁷ Yaŋ dərɓaga aska, Zezu agilke, awlak duwan mətaf zəga, iya nan na Lewi, tay tuŋgo adəv gəla nawtaf zəga. Zezu apsən na: Asbawa.

²⁸ Lewi asilke apetik zigeɗ pak asbanəka.

²⁹ Lewi aɗɗak zəga nawzəm diiɗa ayak Zezu, eŋgil annanda. Mətafaŋ zəga meɓɓet diiɗa azəmaŋgək dənɗaŋ.

³⁰ Dətaf makret Farisiyenɗe* dit məsənaŋ zəga na ma henziŋ ɓa, vini anah sitin gewleɗ nan na: Vi mi kədawzəmaŋ dit mətafaŋ zəga may məɗɗaŋ mambray pakəŋ di?

³¹ Zezu apsit na: Ɗiiyen də zam wəray tay naŋglu zloktor ɓa, say məs gbəgbaɗe.

³² Nəde vi kaw keyet ɗiiyen təstəssi ɓa, amma vi kawye ɗiiyen də mambray də tubiyaŋ gəni.

Wəssoh aka wənna see' meme

³³ Yaŋ ɗii azoŋ wənah sənən Zezu na: Gewleɗ na Zaŋ tahəŋ wə see'eŋ meme dit gewleɗ net Farisiyen paku, amma ya vi mi gewleɗ nok ada zəmaŋ adawsaaŋ asbanən wənnan ndən ɓadi?

³⁴ Zezu apsit na: Muɗumon ɗa, munokum tat də sembe nawtak ɗii miyet atəki wəɓel dawzəm sa? Agəɗ na ɓa sam.

³⁵ Amma pay maɓɓan wade məzu ɓelit waŋ kaw gəmni sə waleŋti, asna pay nani adawsee'eŋ meme.

³⁶ Zezu anah sitik wən məkpaŋga əmpa, amna: Ɗəf tay naw ngar gabaga meleketen kaw ɗisən məsvan dəndən ɓa, vasna waŋgar gabaga meleketeni, vi gabaga meleketen asapna də gabaga məsvan ɓa.

³⁷ Ɗəf tay naw zi mbazla məza məhəsən ɓa adəv kenekene məsvan ɓa, vasna mbazla waŋgar kenekene məsvan daw həsa wambat afuŋ kenekene bo warayə.

³⁸ Amma aslək na, wəzi mbazla məza dəhəs ɓa adəv kenekene meleketeni.

³⁹ Ya an ɗəf asək mbazla məhəsən, yaŋ aŋgəl wəsa məza məhəsən ɓa, wanah na an məhəsən nek dayki məza məhəsən ɓa.