Luka 22 - Nouveau Testament en Guidar

Kuket narma Zezu

¹ Yaŋ pay nawzləra dit dupeŋɗe məza woɗo ɓa, məs adawyaŋ na Paska* go'oy wəzani.

² Ɗii gugiriɗ net məs dəlveŋge dit məsənaŋ zəga na ma henziŋ akayaŋgək kuket nawbay Zezu, amma tahəŋ wə geslne'eŋ sitin ɗiiyi.

Zuda azəmək ki Zezu

³ Yaŋ Satan atoŋ amakra Zuda məs adawyaŋ na Iskariyot, məs suweleŋgit gewleɗ klaw kiyit sula.

⁴ Zuda ambatka, aslerik dit ɗii gugiriɗ net məs delveŋge gəm dit ɗii gugiriɗ net sozeɗ məgaŋ gəla metiŋ naw zuliya*, aka wənna kuket narma Zezu.

⁵ Annekenənək ziti, aslereŋgək kapsən deleɗi.

⁶ Dərɓaga wəsler neti, Zuda akayək tive narma Zezu də haɗama ɗii adaw sənən ɓa.

Wəzaɓan zəga nawzəm na Paska*

⁷ Pay wəzləra net dupeŋɗe məza wuɗo ɓa, məs nawtaw wəla məsgəla na Paska.

⁸ Zezu aslənək Piyer də Zaŋ, apsit na: Mədoŋ məzaɓan zəga nawzəm na Paska, məzəm gəni.

⁹ Assohnənka: Aŋga kəŋgəl məzaɓan gən zəga nawzəm vandi?

¹⁰ Azlansitike məpprəma, an kətoŋgoŋguk awalaŋ gəla metiŋ, wakəlmaŋ də ɗəf dazan sə məlpa də hinziw akani. Məsban ha eŋgil an adawtoŋ pakə,

¹¹ mənah səna: Mərbə zəga amna ngay gəla nawzəm way na Paska naw dit gewleɗ naw di?

¹² Warban sukum gəla metiŋgin, məɓayən, dit zigeɗ pak məzaɓet adəvən, məzeɓet zigeɗ pak adaka.

¹³ Adoŋko, arəhənək zigeɗ pak va Zezu anahsiti, azaɓanənək dupeŋɗe na Paska.

Way an salala*

¹⁴ Adan pay nan agəɗə, Zezu atəŋgək wəzəm dit masləŋɗe.

¹⁵ Apsit na: Nəŋgələk nəzəm gən way na Paska* də munokum sawɓa nəzəm gən saha dərɓagani.

¹⁶ Intatə nah sukum nəzəm na ɗaah ɓa ha say an məɗama nan arbanək zən adəv məlĩ na Maŋgəlva.

¹⁷ Agimik mbel nani, asokonək Maŋgəlva, amna: Məgim mbeliŋki muɗeketi awalaŋ zukum,

¹⁸ ya əntatə nah sukum abeska nəsə na ɗaah mbazla net wəleŋɗe ɓa say an məlĩ na Maŋgəlva adeke.

¹⁹ Dərɓagani agəmək dupeŋ, asokonək Maŋgəlva, arɗanəka, apsitike amna: Aŋki gəɓa zuwa [məpsən vikum, məɗɗa vi kəɗumonən gən wənnawa.

²⁰ Vaski bo agəm zəga naw saa dərɓaga dupeŋ, apsitike, amna: Zəga naw saaŋka ndəni winan wən meleketeni, an məs Maŋgəlva aɗi də mbel nawa, məs dənzoŋ vikum.]

²¹ Amma yaŋ, ɗəf nawzəm Kiyu tay zəm də in aŋka.

²² Wagəɗə Wətən Ɗəf* wamtə va Maŋgəlva a zaɓanni, amma wakpaŋ bonoy aza ɗəf dəl zəm kiyən.

²³ Atəŋgaŋgək wəssohon ziti, naway səmbet naɗɗan kandi.

Naway nawsan daya di?

²⁴ Yaŋ wəbay ma agəɗ awalaŋ zit mesliŋɗe aka wənna naway naw san daya di.

²⁵ Zezu apsit na: Milyeŋge net ɗii də məza zəm məlĩ neti, dit migil sembe aŋglaŋ ɗii diyenən gən na məɗɗaŋ wəza mogoni.

²⁶ Amma nokum, vaski ɓa, say an dəgəs suwalaŋkum ndəni dədawsan daya, daya bo dəsan məgəɗ wəza.

²⁷ Yo naway daya di, məs dəsan wəzəm sa, walla məgəɗ sən wəza? Məs dəsan wəzəməŋki ɓa sa? Vi vaski əntatə awalaŋ kum va məgəɗ wəza.

²⁸ Munokum tat də in pay pak adəv wəsla nawa.

²⁹ Nəɗi sukumək məlĩya va Affu aɗi suwa.

³⁰ Wakə zəmaŋ, wakə saaŋ atəki naw saa zəga naw adəv məlĩ nawa, wakəsoŋ aket mazeŋgeɗ na məlĩya, wakə tawaŋ kita aket ma əlfa net Israyelɗe klaw kiyit sula.

Zezu də Piyer

³¹ Ɗəfdaya amna: Simoŋ, Simoŋ apprəma, Satan assohuk sembe kaɓlokum, kaw seŋgerkum va adaw seŋgereŋ haya, vi kawɗeket keselme də haya.

³² Amma nəkkamək viko, vi wətaf nok adagrak ɓa. Pay kəl tubiya wakisɓet milmiŋgiɗko.

³³ Piyer apsən na: Daya, əntatə zaɓan zu nawmbat disi, ko a daŋgay, ko ha atəki namta.

³⁴ Zezu apsən Piyer na: Intatə nah suko ha gap gəmnda dəɓəl əhəm paah man taka ɓa wakə nah na kəsənu ɓa təl hoku.

Gabal net deleɗi, zəga nawzəm aka tive, gəm kafahi

³⁵ Yaŋ Zezu apsit na: Pay nəslən kum məza deleɗ ɓa məza zəga nawzəm aka tive ɓa, məza hensek ɓa, zəga tay də pəl sukum sa? Aɓɗaŋ na ko suɗike də pəl səm ɓa.

³⁶ Apsit na: Amma kakaŋ na vaski ɓa. Ɗəffan dit deleɗi di gime, ɗəf də zəga nawzəm aka tive də gəma. Ɗəf məs tay də kafahi ɓa, də vəl lukut nani dəlbaah gən kafahi.

³⁷ Nədawnah sukum na vi an məverin akaw na say dəsan gən gesiŋ: Məŋɗani aweleŋgit məɗɗaŋ mambraya. Vi an məverin akaw pak tayə zani.

³⁸ Aɓɗaŋ na: Ɗəfdaya, kafahiɗ yeŋ sula. Apsit na: Məkki.

Zezu azuliyək a Gesemane

³⁹ Adan Zezu agili, ambatək aka gərəm na hereme va an asərəkə. Gewleɗ nan asbanənka.

⁴⁰ Yaŋ agap atəki nani, apsit na: Məkkaman Maŋgəlva vi kədawtoŋgoŋ adəv wərak ɓa.

⁴¹ Yaŋ ambat səzet faraɗa nan va wəskan kuna, akdukuk takparani, azulika amna:

⁴² Əbba, an kəŋgəlka azar gən bonoy naw saaŋ səzawa, amma an məs nəŋgəl adaɗɗa ɓa, say an kəŋgələ.

⁴³ [Yaŋ maslay sə disiŋ arban zən azani vi kasɓani.

⁴⁴ Adan wəɗum assanək sawɓa, azuliyək də sembe, hanza nan akpaŋgək va mbel məzimaŋ aka dəlva fuŋ.]

⁴⁵ Dərɓaga azuliyə, asilke, adek azet gewleɗi, arihik məleŋgti vi zit sirippi.

⁴⁶ Apsit na: Vi mi kəleŋgeŋ di? Məsili, məkaman Maŋgəlva vi kədawtoŋgoŋ adəv mambraya.

Va armanən Zezu

⁴⁷ Adan Zezu adawpel tagay ɗii azoŋko. Zuda məs naweleŋgit gewleɗ klaw kiyit sula akiyike. Azarək aza Zezu aɓeke akani (va ɗii net adaɗɗaŋ).

⁴⁸ Zezu apsən na: Zuda də wəɓe akani kəl zəm ki Wətən Ɗəf* sa?

⁴⁹ Adan məzəsoŋ də Zezu awlanən məs dədaŋgla wəɗɗa, aɓɗaŋ na: Ɗəfdaya məbil də kafahi naməŋ sa?

⁵⁰ Ɗəf taka səmbet abələk gawla na daya net məs dəlveŋge, atawək sləman dəka van dəzəŋ.

⁵¹ Amma Zezu amna: Məppani məkə. Arəŋ gənək sləma ɗəf naka anzaɗ sənka.

⁵² Ɗərɓagani Zezu anah sitik ɗii gugiriɗ net məs dəlveŋge dit ɗii dayaɗe net məgaŋ gəla metiŋ naw zuliya*, dit ɗii gugiriɗ dəzoŋ wərma nəni: Kəzoŋ də kafahiɗi dit zleŋɗe, vi kawrəmu va məvoŋ tive sa?

⁵³ Intatə də munokum pay pak adəv gəla naw zuliya kərəm wən ɓa. Amma aŋki pay nokum də sembe na guzliyo.

Va Piyer anah na dəsən Zezu ɓa

⁵⁴ Yaŋ dərɓaga arman Zezu, akanənək eŋgil ana daya net məs dəlveŋgeda, Piyer asbanək faraɗa.

⁵⁵ Armanənək offo adaŋla daka, asoŋguk amani. Piyer bo asanək awaleŋti.

⁵⁶ Waŋ goruk, məgəɗ wəza adəv gəla nani tulak taya maŋgava offo, harat akan sek tulaka, təmna: Ɗəffəŋ pak asanək də Zezu.

⁵⁷ Piyer azelenik wənnani, amna: Nəsən ɗəffəs ɓa wakə.

⁵⁸ Dərɓagan suɗike ɗəf maɓɓan awlaka, amna: Nok bo istat dit ɗii veti. Amna: Kaya ɗəffa, əntat aret ɓa.

⁵⁹ Dərɓagan va ler taka ɗəf maɓɓan asənəka, amna: Nəsənəka, ɗəffəŋ asanək dəni, vi məs Galileyi.

⁶⁰ Piyer azlanəka: Ɗəffa nəsən an va kədawnah ɓa. Daga dəgrak wəpel ɓa gəmnda ahəmka.

⁶¹ Ɗəfdaya akpaŋganək harani awlak Piyer. Yaŋ aɗumon wən məs Ɗəfdaya anahsən laŋ nak na: Daga gəmnda dəɓəl həm paah man taka ɓa wakə nah na nəsənuk ɓa təl hoku.

⁶² Piyer agilke, ahəmək dit sin en tuwãh diiɗa.

Anahaŋgək wən azani də wərgani

⁶³ Yaŋ ɗiiyen məs dərmanən Zezu anahaŋgək wən azani, arganənka.

⁶⁴ Azəɗaŋgək zəga akani, assohonənka: Asəna naway dərguk di?

⁶⁵ Anahaŋgək wən azan də wən temtemi.

Zezu taya ba kita

⁶⁶ Adan təki adaŋgə, ɗii gugiriɗ net Yahudiyenɗe dit dayaɗe net məs dəlveŋge gəm məsənaŋ zəga na ma henziŋ, akkalaŋka, akiyənək Zezu aba wəsler an metiŋgin neti.

⁶⁷ Aɓɗaŋ na: An əstə Messiya* anah səmə. Zezu azlansitike: An nənah sukumək na: Kətafənən na ɓa.

⁶⁸ An nəssohokumək bo kəzlanən na ɓa.

⁶⁹ Abeŋka Wətən Ɗəf* wasan aka va dəzəŋ na Maŋgəlva məs də sembe.

⁷⁰ Ndəɗaŋ pak aɓɗaŋ na: Nok na Wətən Maŋgəlva* kənan sa? Azlan sitike vaski.

⁷¹ Yaŋ aɓɗaŋ na: Wəray nam tay nassoh saydawa əmpa sa? Mənam sən kiyəm məpprəmək səmani.