Luka 21 - Nouveau Testament en Guidar

Va guluk na gəbay məs sahaŋ təpsən zəga sən Maŋgəlva

¹ Yaŋ Zezu aslan harani, awlek məs aryeɗ tahəŋ wəɗiyaŋ deleɗ adəv akoti net deleɗi.

² Awlətək guluk na gəbay məs sahaŋkə, təsgək koɓo sula tamə.

³ Yaŋ anah na: Gesiŋ nədawnah sukum: Guluk məs sahaŋ kəŋkə, təɗiyək day kiyit ɗii pakə.

⁴ Vi neti aɗiyaŋgək suɗike səza arya net an diiɗa, amma guluk kəŋkə, ko vi təsat məzuraykə, təɗiyək arya nat pak an məs təl zəm dəndən.

Zezu arbanək va adaɓzluwən gəla metiŋ naw zuliya*

⁵ Yaŋ ɗii meɓɓet adawpeleŋ wənna gəla metiŋ naw zuliya, va mə bay sən gawla dit kuneŋge gəm dit zigeɗ məɗiyit sən Maŋgəlva. Zezu amna:

⁶ Pay maɓɓan wade, an məs kulaŋgəŋ pak waɓəzlə, kuwən apəl na aka kuwən maɓɓan ɓa.

An dədazan dabəŋ ki wagrak dəlva

⁷ Assohonənka: Ɗəfdaya dewɗe zigeɗis adaɗɗaŋ di? Mi narban na zigeɗis go'oŋ aza wəɗɗaŋ di?

⁸ Zezu azlanka: Məzi zukum, vi al mbəɗokumən dərwa ɓa. Vi ɗii diiɗa wazoŋ də iya nawa, wanahaŋ na: Əntə Messiya* pay nan go'oy. Kədasbetin ɓa.

⁹ An kəpprəmənək wənnalpa wəɓoŋ net ɗiiyi. Kədaw geslne'eŋ ɓa, vi say zigeɗis dəzoŋ gən dabəŋ, amma wəgrak dələv tay go'ləŋ ɓa.

¹⁰ Yaŋ apsit na: Ɗii meɓɓet wagayaŋ dit ɗii meɓɓeti, məlĩ maɓɓan wakayaŋ məlĩ maɓɓani.

¹¹ Dəlva fuŋ waɓəl diiɗa gəm gbəgbaɗe waɗɗaŋ diiɗa də maaya wagəɗ a təki temtemi. Sə disiŋ adazoŋ zigeɗ na gəttaketi dit sokeneɗ diiɗa dədaɗɗaŋ.

¹² Amma daga dəɓəlaŋ ɓa, warum kuməni wazəm gukumən saha, wakukumən abet ɗiiyen dayaɗe net gəleɗe nawpel wənnet Yahuɗiyenɗe, was gokumən a daŋgay, wakukumən abet milyeŋge dit ɗii gugiriɗ na dəlva, vi wənnawa.

¹³ Zigeɗis pak wazoŋ sukuməni vi kapsukum tive naɗɗa saydawa akawa.

¹⁴ Mərma wənnan a mokrokum, kəda ɗumoŋ va kədawkohoŋ ɓa.

¹⁵ Vi wanəpsukum mokum də maɗula, ha məzu zel kumən aɓapaŋ na wəbayaŋ ma də munokum ɓa də wə day kikum ɓa.

¹⁶ Ya ko migil kum ɗit milmiŋgiɗ kum gəm hilfiŋgiɗ kum gəm bayneŋgiɗ kum wazəmən kikum, wabeyin ɗii meɓɓet diiɗa suwalaŋkum.

¹⁷ Ɗii namba dələv pak wazelkuməni viwa.

¹⁸ Amma ko muhur kikum taka azə naɓa.

¹⁹ Də wəsok zukum wakukoh gitin zeŋgillekum.

Va məzla Zerusalem

²⁰ An kuleninik ɗii naw gay akaraŋgək ki Zerusalem, asna məsən kana wənnawzlan go'oy.

²¹ Pay nani ɗiiyen na Zude dənzoŋ aket gərmeŋge, ɗiiyen na Zerusalem bo dəgilyoŋ, ɗiiyen nawra adamndoŋ awalaŋ gəla ɓa.

²² Dəpas wakpaŋ pay na bonoy vi kagrak an məverin.

²³ Midi bonoy azet gil dədawayɗe dit məzu waɗɗaŋ pay nani. Vi wəzəm saha də wəda gədəv na Maŋgəlva wasan aket ɗiiyiŋki.

²⁴ Kaw beyti də kafahi, kawketi a daŋgay anet ɗii da pakə. Ɗii melekeɗ watafən Zerusalem hagap pay an net adagraka.

Wəziya na Wətən Ɗəffa*

²⁵ Zəga tay dəgil narban ara paya, ara təla ara ngərzla. Aka dəlva fuŋ bo geslne wasan azet ɗiiyi, ha asənən na an adaɗɗaŋ ɓa, wageslne'eŋ vi ɓaɓəlma məlpa dit vovolumɗe net iŋkile.

²⁶ Ɗii wamtaŋ vi geslne məs dəldazan aka dəlva, vi gakdakɗe na disiŋ waɓlaŋ.

²⁷ Pay nani wawlanən Wətən Ɗəf dazan aka slay buwən a disiŋ də sembe də gakdak nani.

²⁸ An zigeɗ atəŋgaŋgək wəzoŋ, mula lewlewi, məsla zukum, vi wəkoh nokum go'oy.

Wən məkpaŋga də sukoyo

²⁹ Zezu apel sitik wən məkpaŋga: Mula sukoyo dit wəleŋɗe pakə.

³⁰ An kulanənək andəfka kəsənənək na mənzi go'oy.

³¹ Vaski, an kulanənək zigeɗiski, məsən kanna məlĩ na Maŋgəlva go'oy.

³² Gesiŋ nədawnah sukum: Ɗiiyən mederet kakaŋka amtaŋ na zam sa zigeɗis dəɗaŋgən ɓa.

³³ Disiŋ də dəlva fuŋ pak wagrakaŋ, amma wəpel naw agrak na ɓa.

Məga zukum

³⁴ Məga zukum vi mokrokum adaɗum də wənna wəzəm ɓa, də wənna saa ɓa, də ula zəga na duniya ɓa, vi pay nan adazan akokum, mədəgbirzike ɓa.

³⁵ Vi wade aka dəlva fuŋ pak va zəva.

³⁶ Vi vaski məfɗaahə, məzuli pay pakə, vi kərəhaŋ gən sembe nawkoh səmet zigeɗ dədazoŋgis pakə, kə ziwəŋgin aba Wətən Ɗəffa.

³⁷ Kapaya Zezu tayərban zəga adəv gəla metiŋ naw zuliya* dəfəɗ bo tay voŋ aka gərəm məs adawyaŋ na gərəm na hereme.

³⁸ Də mompumo ɗii pak tay mbataŋ azan adəv gəla metiŋ naw zuliya vi kapprəm wən səmani.