Luka 19 - Nouveau Testament en Guidar

Zezu də Zase

¹ Yaŋ Zezu agul a Zeriko, atoŋ kla awalaŋ gəla.

² Yaŋ ɗəf məs arya iya nan na Zase, daya net duwanɗe taya daka.

³ Akayək tive kawla naway Zezu di, amma dəɓap kawlan ɓa vi maŋgərzlayi.

⁴ Anzanək abe, apeŋgək aka korvoŋ vi kawlani, vi Zezu dədak al toŋgo.

⁵ Adan Zezu agap amba korvoŋ, aslanək haran, apsən na: Zase agəm zuko apriki, vi dəpaŋ zu annekək nadaw eŋgil anok da.

⁶ Zase nak agəmək zən apirike, atafək də zən neki.

⁷ Adan ɗii awlanən vaska, aɗɗaŋgək wərwərə, aɓɗaŋ na: Yaŋ ambat wəsan eŋgil ana məs mambray da.

⁸ Amma Zase aziwik aba Ɗəfdaya, amna: Ɗəfdaya wanuɗakan arya naw daka daka dit məzurayɗe. An ɗəf tay məs nəgəm zəga nan də vurum bo wanəmnda gan sən təl poɗo.

⁹ Zezu apsən na: Wə koh atoŋguk eŋgiləŋ dəpaŋka, vi nan bo wətən Abrahammi.

¹⁰ Wətən Ɗəf* ade na vi kawkayani, kaw koh gən an dəzə.

Wən məkpaŋga də sulay na meleŋge

¹¹ Ɗii apprəmənək wəpel na Zezu, azet na məlĩ na Maŋgəlva go'oy nazani vi tay go'o naw gap a Zerusalem. Vini anah sit wən məkpaŋga maɓɓani.

¹² Amma ɗəf məs zemvit ɗii gakdakɗe ambatək aka dələv faraɗa kaw kay məlĩ adaka, kaw milyani.

¹³ Ayek ɗii klaw səmbet gewleɗ nani apsitik sulay na meleŋge taka taka, apsit na: Məgəɗ terere dəndən hagap pay naza nawa.

¹⁴ Amma ɗii nan azel nənka, asləŋgaŋgək masləŋɗə dərɓagani vi dənahaŋ gən na: Məŋglu na ɗəffəs ka məlĩ nam ɓa.

¹⁵ Adan aɗinən ka məlĩya, adek aka dələv nani. Ayek gewleɗ nan məs apsit sulayɗe vi kawsən an məs arəhaŋ də terere.

¹⁶ An dabəŋ adeke amna: Daya nawa sulayɗe nek awaŋgək klaw aketi.

¹⁷ Daya nan apsən na: Lawi, gawla mogok kənani kəgəɗək wəza aka tələn də zəga suɗike, asok məlĩ aket walaŋ gəleɗe gugiriɗ klaw.

¹⁸ Ma sula'ən adeke, amna: Daya nawa sulayɗe nok awaŋgək aket sle.

¹⁹ Apsən na: Nok bo azəm məlĩ aka walaŋ gəleɗe gugiriɗ sle.

²⁰ Ɗəf maɓɓan bo adeke, amna: Daya nawa sulay nok yaŋka, nətərək adəv kesekese.

²¹ Naw geslne aduwək suko, nəsənəka ɗəf tattuwãh kənani, wakə gəm zəga ko kəɗi zəga ɓa, wakəbələ ko kəslgə ɓa.

²² Daya nan apsən na: Wanətaw kita akok də wəpel na moko, gawla mbrayen. Kəsənək ɗəf tattuwãh nani, wanəgəm zəga ko nəɗi zəga ɓa, wanəbələ ko nəslgə ɓa.

²³ Vi mi kəɗi su sulayɗe naw abaŋ ɓadi, kəta nəmilik na nirih na də riba ɓa sa?

²⁴ Məmoh sulay vani, məpsən ɗəffan dit sulayɗe klaw neki.

²⁵ Apsənən na: Ɗəfdaya, tay dit sulayɗe klaw.

²⁶ Nənah sukumko, kapsəni ɗəffan də zəga, amma ɗəffan tay də zəga ɓa an navan suɗike kaw gəməni.

²⁷ Məzuzel wən dəŋglaŋ nəzəm gən məlĩ aket ɓa, məkiye, məbey abawəŋka.

Zezu atoŋguk a Zerusalem

²⁸ Dərɓaga wəpeliska Zezu taya bet ɗiiyi, ambatək a Zerusalem.

²⁹ Adan agap go'o də Baytifage də Baytaniya, amaŋgava gərəm na hereme, Zezu asliŋgik gewleɗ nan sula, apsit na:

³⁰ Mədoŋ awalaŋ gəla ana bokum ndaka. An kə guluŋko, wakərəh tən bəlatək nat koruk tat minata məs ɗəf dəpeŋ ɗaah akat ɓa. Məpəlta, məkita.

³¹ An ɗəf assohokumək na kami kədawpəltən di na, mənah səna: Wəray Ɗəfdaya taya zata.

³² Masləŋɗe ambataŋka, arəhənək zigeɗ vet pak va Zezu anahsiti.

³³ Yaŋ apəltən korku, migilit koruk apsitin na: Vi mi kədawpəltən koruk di?

³⁴ Azlanənək na: Wəray Ɗəfdaya taya zata.

³⁵ Akitənək koruk sən Zezu, abasənək lukutɗe net akata apaŋ gənənək Zezu akata.

³⁶ Adan atəŋ wəmbata ɗii abasənək lukutɗe net aka tive.

³⁷ Adan azar aza Zerusalem dəka tive məs dədawprike səka gərəm na hereme, gewleɗ pak zit anneke, atəŋgaŋgək wəɗi ki Maŋgəlva, də wəlet daya daya, vi sokeneɗ məs awlaŋ pakə.

³⁸ Aɓɗaŋ na: Zezay aka məlĩ məs dəde də iya na Ɗəfdaya, zam a disiŋ gakdak aza Maŋgəlva an də day pakə.

³⁹ Farisiyenɗe* meɓɓet naweleŋgit ɗiiyi apsənən Zezu na: Mərbə zəga, anah sit gewleɗ nokuŋ dəɓətaŋ.

⁴⁰ Zezu azlanəka: Intat nah sukum, an aɓətaŋka, kuneŋgeŋ waɗiyaŋ geŋgere.

Zezu ahəm gənək Zerusalem

⁴¹ Adan Zezu azar amaŋgava walaŋ gəla metiŋ, awlaka, ahəm gənəka.

⁴² Amna: Va kəsənək nok van bo, awani zam nok pay nan di? Amma kakaŋka məɗamayi ama horoko kulana ɓa.

⁴³ Pay wade akoko, məzuzel kun wakdahaŋ kiko də gəbay ziti, wampanən moko, wahãslkun kəla təki pakə.

⁴⁴ Wazokuni, is dit kirtuk pakə. Appaŋ sukun na ko kuwən aka kuwən maɓɓan ɓa, vi kəsən pay məs Maŋgəlva ade wəbaah suk ɓa.

Zezu adəv gəla metiŋ naw zuliya*

⁴⁵ Zezu aguluk adəv gəla metiŋ naw zuliya, atəŋgək wərɓih məɗɗaŋ terere,

⁴⁶ apsit na: Məpprəma va an məverin laŋka: Gəla naw na gəla na zuliyi, amma kəɗɗanənək ka bətəŋ net məvoŋgoŋ tive.

⁴⁷ Tay wərban wən pay pak adəv gəla metiŋ naw zuliya. Ɗii gugiriɗ net mes dəlveŋge dit məsənaŋ zəga na ma henziŋ gəm ɗii tek tek naweleŋgiti. Akayaŋgək tive nawbayni.

⁴⁸ Amma aw sənən va adarmanən ɓa, vi ɗii pak tahəŋ wəgayaŋ də wəpprəm wəpel nani.