Luka 17 - Nouveau Testament en Guidar

Mambray

¹ Yaŋ Zezu apsit gewleɗ nan na: Tay məs dədawgul ɗii adəv mambray pay pakə. Amma bonoy aza ɗəffan dədawki mambray vani.

² Ɗəɗaah sən an minan səni gərəm metiŋgin awlani, məsgani aret iŋkile kpukpumɗe ki an adawrakan muzliya taka səmbet kirni.

³ Məga zukum. An məlmuk agəɗək mbrayen, anahsən də maɗula. An atubika, aviyan səni.

⁴ An agəɗ sukuk mbrayen təl buhul pay taka, tayəzan azok təl buhul nan pakə, tay nah na nəɗɗiyək marava Aviyan səni.

Wətafa

⁵ Yaŋ masləŋɗe apsənən Ɗəfdaya na: Apsəm meŋgesl wətafa.

⁶ Ɗəfdaya bo amna: An munokum tat də wətaf ko suɗike va zemve na sita, wakənah sənən korvoŋ: Apətə, ampə aret iŋkile, waɓe sukum.

Wəza na ɗəf məgəɗ wəza

⁷ Naway səmbokum də məgəɗ wəza nan məzənsee walla məzutaɗa na zəga mamaya, an adek sə gulyo wanah səna: Azar aŋ go'o, azəmə di?

⁸ Anah na ɓa amma wanah sən dərəŋ na: Azaɓan su zəga nawzəma, agəm lukut na wəza noko, agəɗ su wəza an əntatə zəma, əntatə saa, dərɓagan tamə, wakə zəmə wakə sə.

⁹ Wagəɗ sən soko sən gawlaŋ vi aɗɗa sən məs an aŋgələŋ sa?

¹⁰ Vaski nokum van adawsan sukum, an kəɗɗanənək an məs Maŋgəlva aɗi sukum pak mənah na: Mənam ɗarkəŋ məɗɗaŋ wəza mənani, nam məɗɗak an dəslə səm naɗɗa.

Zezu ambəl gitik məs kokoleɗ klaw

¹¹ Zezu ambatək a Zerusalem atoŋguk dəkawalaŋ Samariya də Galile.

¹² Yaŋ atoŋ awalaŋ gəla maɓɓani, məs kokoleɗ klaw azoŋko, almaŋgək dəndən. Aziweŋgik faraɗa.

¹³ Anzlaŋgək vamvəl daya daya, aɓɗaŋ na: Zezu mərbə zəga aw awəl saha akamə.

¹⁴ Yaŋ awle apsit na: Mədoŋ mərban zukum azet məs dəlveŋge. Adan adadoŋ adaka, ambəlaŋka.

¹⁵ Ɗəf taka səmbeti, adan awla na ambəlka, amilke, tay gakdakan Maŋgəlva də wəlan daya daya.

¹⁶ Aɓegənək mirbisin aka dəlva fuŋ azuliyək amba təl Zezu, agəɗ sənək soko. Ɗəf nan məSamariyayi.

¹⁷ Zezu assohonko: Ya ɗii klaw pak dəmbəlaŋ ɓa sa? Ya ngahəŋ ɗii meɓɓet vaytakiŋ di?

¹⁸ Tay məs dəɗum wəmilnyan nawgəɗ sən soko sən Maŋgəlva ɓa sa, say malakaŋ kaka sa?

¹⁹ Yaŋ apsən na: Asili, doko, wətaf nok akoh gukuko.

Wəziya na məlĩ na Maŋgəlva

²⁰ Farisiyenɗe* assohonənək Zezu: Dewɗe məlĩ na Maŋgəlva adazan di? Azlan sitik na: Məlĩ na Maŋgəlva adena də ulan ɓa.

²¹ Anahaŋ na tayaŋka, walla taya ada ɓa. Vi vaski məsəna məlĩ na Maŋgəlva tayawalaŋ kum.

²² Apsit gewleɗ nan na: Pay wade, akəŋglaŋ ula pay taka səmba pay na Wətən Ɗəffa*, amma kulanən na ɓa.

²³ Wanah sukumən na tayaŋka, taya da. Kədadoŋ adak ɓa, kəda nzoŋ adak ɓa.

²⁴ Va buwən adawwiɗ a disiŋ daga sə maŋgava ha amaŋgava maɓɓani, vaski bo wəziya na Wətən Ɗəf adawsanni.

²⁵ Amma dabəŋ nani say dəzəm gən saha diiɗa, ɗii dəɓoŋgoŋ sənən gəni dəsganən gəni.

²⁶ An məs dəgəɗ pay na Nuwa, vas adaɗɗa pay na Wətən Ɗəffa.

²⁷ Ɗii tahəŋ wəzəmaŋ, wəsaŋ, wəkayaŋ gili wəpsit kirtit sit ɗii kagili, ha gap pay Nuwa atoŋ adəv bəlay, iŋkile məs dənsləŋgaŋ azoŋko, azetinik pakə.

²⁸ An məs dəgəɗ pay na Lot, vas adaɗɗa: Ɗii tahəŋ wəzəmaŋ, tahəŋ wəsaaŋ, tahəŋ wəlbahaŋ, tahəŋ wəvələni, wəslgaŋ, wərkaŋ gəleɗe.

²⁹ Amma pay Lot agil sə Sodoma, offo aziyək sə disiŋ va muhurən, azetik dembirgit pakə.

³⁰ Vas adawsan pay na Wətən Ɗəf adarban zəni.

³¹ Pay nani ɗəf məs naka balak adawprike wəgəm zigeɗ sədəv gəla nan ɓa. Ɗəf an na gulyo adaw milyan dirɓe ɓa.

³² Məɗumon wənat ga Lot.

³³ Ɗəffan dəkayan wəkoh gən zeŋgilleni, wazani, amma ɗəffan dəzanni wakoho gəni.

³⁴ Intatə nah sukum: Dəfəɗ nani ɗii sula wavoŋgoŋ aka hargaŋgu taka, kaw gəmi taka mbək taka.

³⁵ Gil sula wasəraŋ aka buwən taka, kaw gəmi taka, mbək taka.

³⁶ [Ɗii wasoŋ sula agulyo, kaw gəmi taka, mbək taka.]

³⁷ Gewleɗ nan apsənən na: Aŋga as adaɗɗa kandi Ɗəfdaya? Zezu azlansitike: A təki mogugoy asani adaki mogdokɗe adakalaŋ.