Luka 15 - Nouveau Testament en Guidar

Wən məkpaŋga na time məzani

¹ Yaŋ duwanɗe dit məɗɗaŋ mambray diiɗa azaraŋgək aza Zezu kapprəm wəpel nani.

² Farisiyenɗe* dit məsənaŋ zəga na ma henziŋ aɗɗaŋgək wərwər, aɓɗaŋ na: Ɗəffaŋka tay taf məɗɗaŋ mambraya, tay zəm dənɗaŋ.

³ Amma yaŋ apel sit wən məkpaŋga:

⁴ Naway səmbokum an tay dit timeŋgiɗ səkat na, an azək taka na, apet na kaklaw vaytak kiyit vaytak awra, vi kadaw kayan məs dəzə dərah gən ɓa di?

⁵ An arəhəka waslan ama wəlani də wən neken zəni,

⁶ waki eŋgili, waye bayneŋgiɗin dit megeŋgiɗin, wanah sit na: Məneken zukum də ina, vi nərahək time naw məs dəzə naka.

⁷ Intatə nah sukum, vaski nenek adaɗɗa a disiŋ an məs mambray atubika adayək ki kaklaw vaytak kiyit vaytak en təstəssə tahəŋ də wəray naw tubi ɓa.

Sulay na təbəs məzani

⁸ Walla an guluk tat də sulayɗe na təbəs klaw, an taka azəka təsɗana offo adəv pitirla kaw faɗan gədəv gəla ɓa sa, təkayan na zət soksok vi tərah gən ɓa sa?

⁹ An tərahək na, watiye bayneŋgiɗta dit megeŋgiɗta wa tənah sit na: Məneken zukum də ina, vi nərahək sulay naw məs dəzə naka.

¹⁰ Intatə nah sukum, vaski bo maslayɗe na Maŋgəlva ada nekenən zit an məs mambray taka atubika.

Wən məkpaŋga də wiyən məzani

¹¹ Yaŋ Zezu anah əmpa na: Ɗəf maɓɓan tay dit kirtin sula.

¹² An muzliya apsən affən na: Apsu hara arya naw an nədawzəm gəla. Affən awɗakan sitik arya nani:

¹³ Dərɓagan wəvoŋ suɗike, wiyən nak akkalanək arya nan pakə, ambatək aka dələv faraɗa. Azanək arya nan də wənna polkoyo ɗarə.

¹⁴ Yaŋ agrak pakə, yaŋ maay metiŋgin agəɗ aka dələv nani, atəŋgək wənnan wən tattuwãha.

¹⁵ Yaŋ ambat wətoŋ wəɗɗa wəza ana ɗəf taka da səmbet ɗii na dələv nadaka. Ɗəf nan apsənək wəza naw taɗ vedemɗe.

¹⁶ Aŋgələk wəzəma kawba dit uwa net wəleŋɗe məs vedemɗe adawzəmaŋ, amma ɗəf tay dədapsən ɓa.

¹⁷ Yaŋ atəŋ wəɗum aka wəsuwa nani, amna: Məɗɗaŋ wəza na affu bo tahəŋ də zəga nawzəm diiɗa aɓapaŋ na wəgrakən ɓa, in tatəmta də maaya.

¹⁸ Wanəsili, wanəmndaw aza affuwa, wanənah sənna: Affuwa nəgəɗək mbrayen aza Maŋgəlva, gəm azoko,

¹⁹ əntat naw saw ka wətuk əmpa ɓa. Aɗiyu va ɗəf məs nambet ɗii məɗɗaŋ wəza noko.

²⁰ Asilke amndanək ana affən da. Daga səka faraɗa affən awlaka, awələk saha akani. Anzanka, aɓeke akani, də uwaɗ mamba galini va ɗii net adaɗɗaŋ.

²¹ Wiyən apsən na: Ebba, nəggəɗək mambray aza Maŋgəlva də azok pakə, əntat naw saw ka wətuk əmpa ɓa.

²² Amma affən apsit gewleɗ nan na: Məkisu lukut na sləma, məgul səni, məgul sən ndama aka vani, məkpa sən henseki.

²³ Məki ngari məkərən, mətaw wəlani, məzəm səmə məneken səm zəmə,

²⁴ vi wiyən məs dəmtə kəta naka amma asilke, məzani laŋka amma mərahni. Atəŋgaŋgək wənneken ziti.

²⁵ Pay nani wiyən an daya taya gulyo. Yaŋ adaw milyani, go'oy də gəla, apprəmək wəsmaya də wəskəla.

²⁶ Ayək ɗəf taka səmbet gewleɗi, assohon an dəgəɗə.

²⁷ Gawla nak apsən na: Məlmuk də mili, affuk ataw sənək wəla ngari məkərən, vi arəhək zamə.

²⁸ Yaŋ wiyən an daya nak gədəvən adəka, aɓoŋguk datoŋ eŋgili. Affən agilke akkamanək dətoŋ gəni.

²⁹ Amma azlan sənək affəni: Awla wəsva diiɗa nədawgəɗ suk wəza. Nətoŋ ɗaah ki wən məs kəɗi abaw ɓa, amma kəvay ɗaah porsok ɓa, vi nəneken gən zu dit bayneŋgiɗu ɓa.

³⁰ Amma yaŋ wətuk, məs dəzan arya nok də polkoyo, adan ade na yaŋ kətawsən wəla ngari məkərən.

³¹ Affən apsən na: Wətuwa, istat də in pay pakə, zəga naw pak noki.

³² Aslək mə parə gən zəmə, məneken gən zəmə, vi mulmukuŋka, amtək kəta asilke, azək kəta, ya mərahni.