Luka 1 - Nouveau Testament en Guidar

¹ Ɗəf gakdak Tewfilu: Ɗii diiɗa agayaŋgək wəver zigeɗ məs dəɗaŋ awalaŋgmə.

² Averinik an məs məpprəm sə zet məs dulenin zigeɗis də hereti daga wətəŋ neti, məpsiti tive narban wənnani.

³ Vi vaski naw nulak lewi naw tam nəsok zuwa wəkayan wənnan pak daga wətəŋ nani vi nərban sukgən də mabərki ziti, ɗəf gakdak Tewfilu.

⁴ Nəɗɗa na vi kəsən gən gesiŋ an məs mərbanəŋka də an məs kəpprəmə.

Maslay arbanək uwa na Zaŋ

⁵ Yaŋ pay Herodə asan məlĩ a Zude, ɗəf maɓɓan tay məs dələv* na Maŋgəlva, iya nan na Zakari, suwalaŋ ngaɓa net məs dəlveŋge Abiya. Iya nat ɗak nan na Elizabet, hilfit may Aron daya net məs dəlveŋge na Maŋgəlva.

⁶ Sulegit pak ɗii təstəssəŋ aba Maŋgəlva. Tahəŋ wəsbanən wən məs Ɗəfdaya aɗiyə də ma henziŋ nan pak lewlewi.

⁷ Amma dərəhaŋ muzliya ɓa, vi Elizabet ndarzlayək tə, ndəɗaŋ sulegit pak agalaŋka.

⁸ Pay mbərən Zakari tayəɗɗa wəza na məs dələv* nan aba Maŋgəlva, vi pay na wəza na ngaɓa neti.

⁹ Məs dəlveŋge asərəkaŋgək uɗakən wəza də piɗe nabalan aketi. Pay nani, abətək aka Zakari dəɗɗa gən wəza naw zla tursan aba Ɗəfdaya aka təki naw zla tursan adəv gəla metiŋ naw zuliya*.

¹⁰ Daga adawzla tursan, ɗii tahəŋ wəzuliyaŋ appaka.

¹¹ Yas ləŋ, Zakari awlak maslay dəki adawzla tursan dəka van dəzəŋ ziwe.

¹² Adan awla vaska, ageslneke, maɗulan azlərwika.

¹³ Amma maslay apsən na: Kəgeslne ɓa, Zakari, vi Maŋgəlva apprəmək wəzuli noko. Ɗak nok Elizabet watuwə wina, kelvan gən na Zaŋ.

¹⁴ Zuk wannek sawɓa, ɗii wanekenən zit di'is pay nawa wiyən nani.

¹⁵ Vi wasan ɗəf metiŋ aba Ɗəfdaya. Assə na mbazla net wəleŋɗe ɓa, walla mbazla maɓɓan məbay ɗəf ɓa. Waknahək də Əmpəs na Maŋgəlva daga sədəvət mani.

¹⁶ Wamilgit Israyelɗe diiɗa aza Maŋgəlva Ɗəfdaya neti.

¹⁷ Watoŋ aba Ɗəfdaya də sembe na məs kleŋ Eliyas, vi kawsleret kirin dit migilti, wakpeŋget ɗii meɓɓet dəsbanən gən Maŋgəlva, wən an məɗiyən pak wazaɓani vi wəzzo na Ɗəfdaya.

¹⁸ Amma yaŋ Zakari apsən maslay na: Mbarmbari nədawsəŋgən na wagəɗ gesiŋ di? Vi naw nəgalək səkay, ɗak naw bo wəzva nat diiɗayi.

¹⁹ Maslay azlan sənək na: Əntə Gabriyel aba Maŋgəlva nədawsawa vi kawgəɗ sən wəza. Ndən də slənwa, nəpel suk gən labara neneke.

²⁰ Amma kətaf wən məs dəgil sə mawəŋ ɓa, an pay nan agapka wənnəŋ wasan gesiŋ. Vi vaski wakəkpaŋ goryom, kəɓap na wəpel ɓa ha gap pay net zigeɗis adaɗɗaŋ.

²¹ Pay nan bo ɗii tahəŋ wəganən Zakari. Agətaŋgək vi wəliya nan adəv gəla metiŋ naw zuliya*.

²² Yaŋ agili dəɓap wəpel sit ɓa, asənənka awələk sokene adəv gəla metiŋ naw zuliya. Aslanək van wəgəɗ sit zəzaya, amma dəɓap kawpel ɓa.

²³ Yaŋ pay na wəza na Zakari agrak sədəv gəla metiŋ naw zuliya, ambat keŋgili annanda.

²⁴ Dərɓagan wəvoŋ suɗike, Elizabet ɗak nan təɗiyək daway, təɗɗamanək gap təla sle.

²⁵ Təmna: Awla an məs Ɗəfdaya agəɗ suwa. Atorik wil nat ndarzlayək sərawa.

Maslay arbanək uwa na Zezu

²⁶ Yaŋ də təla ma sləreni, Maŋgəlva aslənək maslay nan Gabriyel awalaŋ gəla məs adawyaŋ na Nazaret aka dələv na Galile.

²⁷ Aslənək azat waŋ gbuɓɓo, akən məs ɗəf adawyaŋ Zozef adaw kaya, gabet may Davit. Iya nat waŋ vatə Mari.

²⁸ Maslay adek azata, apsət na: Nəsɗokuko, nok kərahək mbəlembəle na Maŋgəlva. Ɗəfdaya tay disi.

²⁹ Wəsɗa nan akgrəŋgatək Mari, təɗumko va wənah mbari kandi.

³⁰ Maslay apsət na: Geslne aduk ɓa Mari, vi nok kərahək mbəlembəle na Maŋgəlva.

³¹ Wakəɗi daway, wakuwə wiyən mizilin, kəlvan gən na Zezu.

³² Wakpaŋ daya, kaw yani na Wətən Maŋgəlva* an dəday pakə. Maŋgəlva Ɗəfdaya waɗi ka məlĩya, va aɗi dəhən an Davitti.

³³ Wazəm məlĩ aket Israyelɗe ha faɗə, məlĩ nan agrak na ɓa.

³⁴ Mari təpsən na: Mbarmbari adaɗɗa vaskan yaŋ naw bo nəsən ɗəf mizilin ɓaŋ di?

³⁵ Maslay apsət na: Əmpəs Salala* wadekoko, sembe na Maŋgəlva an dəday pak wadekok va zeŋgille. Vi vaski wiyən məs kəl dawa, kaw yani na salala* gəm Wətən Maŋgəlva*.

³⁶ Elizabet mamndayoko dədawaytə, ko vi təgalə, may adawnahaŋ na ndarzlayək tə, amma kəkaŋ dədawaytə təla slire.

³⁷ Zəga tay məs na gbakan Maŋgəlva ɓa.

³⁸ Mari təmna: Balamək na Ɗəfdaya nani, dəgəɗ azaw va kənahə. Yaŋ maslay appata ambat səzata.

Mari təmbatək anat Elizabet da

³⁹ Dəpaske'e ləŋgə, Mari təsilke təmbatək də kakara awalaŋ gəla nak gərəm aka dələv na Zude.

⁴⁰ Tutoŋ keŋgil ana Zakari da, təsɗatək Elizabet.

⁴¹ Səza Elizabet təpprəm wəsɗa nat Mari, wiyən atəŋgək wəɓla adəvta. Makrat Elizabet aknahək də Əmpəs Salala,

⁴² yaŋ tənah dayadaya: Maŋgəlva aɗɗak zəzay akok daykiyit gil pakə, zəzay nan tay aka wiyən məs kəl dawaŋka.

⁴³ Naw nawa nan kan ma Ɗəfdaya naw təde gən annaw daŋ di?

⁴⁴ Vi səza nəpprəm wəsɗa noko, wiyən aɓələk sədəvu də wənneken zəni.

⁴⁵ Wakpaŋ zəzay azoko vi kətafək an Ɗəfdaya anah suko, wagəɗ va anahə.

Gəlya nat Mari

⁴⁶ Mari təmna: Say nəgakdakan Ɗəfdaya,

⁴⁷ makraw aknahək də nenek na Maŋgəlva, məzu koh guwa.

⁴⁸ Aŋgələk ulət balamək nan məs aw gakdakatən ɓa. Vaski daga kakaŋ ɗii pak wənahaŋ suwənna də zəzay na Maŋgəlva kənani,

⁴⁹ vi Maŋgəlva məs də sembe aɗɗe suwək zigeɗ məs dədayaŋgə. Iya nan salalayi*,

⁵⁰ ula saha nan wasan aket məzu geslne'eŋ sənənni ha faɗə.

⁵¹ Aɗɗek wəzeɗe diiɗa də sembe na vanni, andolik məzu gakdakanən zit də wəɗum net pakə.

⁵² Aprigitik milyeŋge səka mazaŋga neti, aɗiyik en məs adaw gissetin a disiŋ.

⁵³ Abetik ɗiiyen də may də zigeɗ moggeti. Arɓihik məs aryeɗi ambataŋgək vet mekeleŋ.

⁵⁴ Abaah sitik Israyelɗe məs məɗɗaŋ sənən wəza,

⁵⁵ vi dəsgət ki an anahsən dəhəm, Abraham na, wapsit kirtin də son gən ha faɗə.

⁵⁶ Mari təsatək dət Elizabet gap təla hoku, yaŋ təmndat eŋgil annat da.

Uwa na Zaŋ məgəɗ baptem

⁵⁷ Adan pay nawa nat Elizabet agapə, tuwək wiyən mizilin.

⁵⁸ Megeŋgiɗta dit hilfiŋgidta apprəmənək na Ɗəfdaya agəɗ sətək mogoni, annekenənək zit dənta.

⁵⁹ Yaŋ wiyən agəɗ wəvoŋ buhul, yaŋ adoŋ wəskələn awra də wəpsən iya, aŋglaŋ wəlvanən na Zakari va iya nafəni.

⁶⁰ Amma man təmna: Awwo vaski ɓa, say iya nan dəsan Zaŋ. Ndəɗaŋ pak agətaŋka.

⁶¹ Aɓɗaŋ na: Ɗəf tay ko taka də iya vas ambet hilfiŋgiɗuk ɓa.

⁶² Yaŋ apeleŋ sənən affən də veti, vi kassohon na iya awani aŋgəl napsən wətən di.

⁶³ Zakari arban sitik dəpsənən gən wəlaŋga na ver akani. Yaŋ avere: Iya nan na Zaŋ. Ɗii pak agətaŋka.

⁶⁴ Daska'a ləŋ Zakari atəŋ wəpele, agakdakanək Maŋgəlva də wəlan dayadaya.

⁶⁵ Megeŋgiɗin pak ageslne'eŋgək sawɓa. Ha dələv na gərəm na Zude pak tay pel nən wennet labareɗeski.

⁶⁶ Məs dəpprəmən wənəs pak tahəŋ wəɗumonən pay pak: Winəŋ mambar adawsan di? Sembe na Ɗəfdaya tay dəndən kpakə.

Kleŋ na Zakari

⁶⁷ Zakari affən wiyən naka makran aknahək də Əmpəs Salala. Agəɗək kleŋ, amna:

⁶⁸ Gakdak aza Maŋgəlva, Ɗəfdaya net Israyelɗe vi apanək zən viyit ɗii nani, akohgitke.

⁶⁹ Agil gənək ɗəf məs nawkoh gəm də sembe, səza gabba məlĩ Davit gawla nani.

⁷⁰ Aŋki məs anah lahəŋ də met məs kleŋɗe en salala*.

⁷¹ Amna wakoh gəm sə vet məzuzel məni, may səvet məɗɗaŋ kotorok namə.

⁷² Arbanək ula saha nan aket dəhiŋgiɗmə, də wəɗumon wən minan daga far an salalaŋka.

⁷³ Vi Maŋgəlva asuway sənək dəhəm Abraham,

⁷⁴ wakoh gəm səvet məzuzel məni də sembe, vi məgəɗ sən gən wəza məza də geslneɓa,

⁷⁵ Vi məsam gən ɗii nan təstəssə hagap wəsva nam pakə.

⁷⁶ Nok bo wətuwa, kaw yuki na məs kleŋ na Maŋgəlva an dəday pakə vi wakəsok aba Ɗəfdaya vi kaw zaɓan tive nani.

⁷⁷ Warban sit ɗii nan na wakohgiti, də wəviyan mambray neti.

⁷⁸ Maŋgəlva nam tay də ula saha adəvən diiɗa, gəm də mogoni, waslən səm wəkasak nan daga sə disiŋ,

⁷⁹ vi də kasak gin ɗiiyen nara guzliyo dit ɗiiyen nara zeŋgille namta, wadaw gən tələm aka tive na zamə.

⁸⁰ Zaŋ aɓayka, maɗulan bo tay diiɗa kana. Asanək awra ha gap pay arban zən abet ɗii na Israyel.