Filipi 4 - Nouveau Testament en Guidar

Mənneken səm zəm də Ɗəfdaya

¹ Munokum milmiŋgiɗu bayneŋgiɗwa, vi vaski məsap vas də Ɗəfdaya, əntatə ɗum na məsa ulukum sawɓa, munokumtə wənnek nawa, munokumtə mətər kiya nawa.

² Əntatə kamet may Ewodiya dət Siŋtike də slereŋ awalaŋ zit dəsoŋ də maɗulet va ɗak dət məlməta məs dətafən Ɗəfdaya.

³ Ya nok bo is məzəɗɗa wəza də inkəŋkə, əntatə kamoko: Abaahsit gil məzəɗɗaŋ wəza na Wən Nenek də inəŋki gəm Kelemaŋ dit ɗii dambərgit məɗɗaŋ wəza də ina, iya net tayadəv ɗerewel na zeŋgille.

⁴ Mənneken zukum də Ɗəfdaya, əntatə nah sukum əmpa mənneken zukum.

⁵ Mogon nokum dərban sit ɗii na Ɗəfdaya go'oy wəzani.

⁶ Kədazlgaŋ sləma aka zəga maɓɓan ɓa, amma mərban wəray nokum pak aza Maŋgəlva də wəzuliya də wəkkama də wəgəɗsən soko bo.

⁷ Zam na Maŋgəlva dədayki zəga pak məs ɗəf adawɓap wəsəna, dəga makrokum də əmpəs nokum adəv Zezu Krestu.

⁸ Milmiŋgiɗwa, aŋki məs dəmbərə: Məzi zukum aza an mogoni, məs dəgap naw gakdakani, zəga an də goŋga məs dəslə, məs salala*, məs dəgap naŋgla də wə gakdakani.

⁹ Məɗɗa an məs kəppremaŋ sə maw də an məs nərbə sukum də wəpel nawa də wədaw nawa. Maŋgəlva məs dədapsəm zam dəsan də munokum.

Pol tayəɗɗa soko sit Filipiyenɗe vi zəga məs apsənənni

¹⁰ Nənekenək zuw diiɗa kakaŋka, de wəsap nam adəv Ɗəfdaya, vi kərəhaŋgək sembe na baah su əmpa. Ko daga lahəŋ bo munokum tatə ɗumoŋ akawa, amma kərəhaŋ tive narban ɓa.

¹¹ Nənah vas na vi wənna saha nawi ɓa. Vi əntatə yagan wəsaw zu nek də ana vawa.

¹² Wanəɓap wəsaw adəv saha ko adəv wəba, nəyaganək wəsawa va nəŋgələ ko aŋga pak də tattuwãha, nəsənka ko adəv wəba, ko adəv maya, ko adəv saha.

¹³ Wanəɓəs ko mi dəgəɗ di pakə, vi Krestu wavay sembe.

¹⁴ Amma kəɗɗaŋgək mogon də wəbaah su kakaŋ adəv wən tattuwãh nawa.

¹⁵ Munokum ɗii na Filipi, kəsənənək lewlewi, pay nətəŋ wəpel Wən Neneke, səza nəgil sə Makedoniya, kretiyenɗe tahəŋ də sapaŋ də nakkal zəga də wətaf zəga nan ɓa, say munokum kaaka'ə.

¹⁶ Pay nəsaw a Tesaloniki, kəslən suwənək zəga na baah suwa, təl takayi kaka ɓa.

¹⁷ Kəda ɗumoŋ na sulayɗe nokum nədaw kayeti ɓa, nəŋgəl na arya nokum dənzlər gən va wənah na ətaf nokum də tər gən wəraya.

¹⁸ Nərehək zəga məs kəslənən Epafroditus dəndən. Adayək ki wəray naw sawɓa. Tay va wəvəl məs də məŋ gənən neki. Maŋgəlva waneken zən dəndən, watafa.

¹⁹ Maŋgəlva naw dətər sukum wəray nokum pakə, də gakdak nan metiŋgini, məs na dəv Zezu Krestu.

²⁰ Gakdak na Maŋgəlva Affəni ha faɗə. Amin.

Wəsɗa

²¹ Məsɗet ɗii na Maŋgəlva pakə də iya na Zezu Krestu. Milmiŋgiɗəm məs dəsasoŋ də in asɗokumənka.

²² Kretiyenɗe nahəŋ pak asɗokumənka, gəm milmiŋgiɗəm məzəɗɗaŋ wəza də məlĩ na Roma.

²³ Mbəlembəle na Ɗəfdaya nam Zezu Krestu dəsan də munokum pakə.