Filipi 2 - Nouveau Testament en Guidar

Krestu azelenək zəni Maŋgəlva aɗiyək kini

¹ An ɗəf asɓokumək də iya na Krestu, an apel sukumək də əŋgla wakətafən sa? Munokum tatə gakdakanən wəsap məs Əmpəs na Maŋgəlva asapaməŋ sa? Munokum tatəŋgluwən zukum sa? Munokum tatulaŋ saha aka zukum sa?

² An tay vas na, məneken su zuwa vi kəsoŋ gən maɗula taka, wəŋgla taka, makra taka, wəɗum taka.

³ Ko mi adaɗɗa də wəgay ɓa, walla də wekaɓ ɓa, amma də wəɓegən ki zukum də ula ɗii meɓɓet day kiko.

⁴ Ɗəf adaɗɗa an natər anan kaka ɓa, amma an natər sit ɗii meɓɓeti.

⁵ Məsoŋ də wəɗum taka azokum, məs dəde səza Zezu Krestu:

⁶ Nan bo zən va Maŋgəlvayi, amma də as pak dəɗum nawsla kiyən də Maŋgəlva ɓa, as zəga naw mohhi kəta.

⁷ Agəsanək zəni, agəmək wəsuwa na balam, adeke, agilik va ɗiiyi. Yaŋ arban zən bo va ɗəffa.

⁸ Gesiŋ, aɓegənək kini, apprəmək ma Maŋgəlva, ha atəki əmta, ha amtək aka wəlaŋga məzliwrihe.

⁹ Vini bo Maŋgəlva aslan a disiŋ ki zəga pakə, apsənək iya na sləma dayki iya pakə.

¹⁰ Vi an məyani iya na Zezu, dewle zəga məs məzəməɗən pakə, ana disiŋ də ana fuŋ də ana təki net ɗii mimtiti, wakdukun takpret abani.

¹¹ Ndəɗaŋ pak waɗɗaŋ saydawa na Zezu Krestu Ɗəfdaya, gakdak na Maŋgəlva Affəni.

Wəkasak a duniya

¹² Bayneŋgiɗwa, pay nəsaw anokumda na, munokum tatəpprəmən mawa pay pakə. Ya adan kakaŋ faraɗa nan də munokum, məpprəm mawa. Məɗɗa wəza nawkoh nokum də geslne də wəkkere.

¹³ Vi Maŋgəlvayi sən kiyən dədafɗaahan wəŋgla nan amakrokum, də wəpsukum sembe naɗɗa wəza nani, armak wənan vi ka koh gukum.

¹⁴ Adəv wəza nokum kəɗɗaŋ wərwər aka Maŋgəlva ɓa, kəɗɗaŋ kuzuŋ aka aŋgla nan ɓa.

¹⁵ Vi kəsoŋ gən salala* məza də mambray azokum ɓa, kirtin Maŋgəlva, məza də mambray azokum ɓa, aweleŋgit ɗii na duniya ɗəɗerɗe mes mbreyit naka dəlviŋki. Kəkasakaŋ gən aweleŋgit va ngərzleɗi.

¹⁶ Mərma wənna koh nokum vi nəɗɗi gən kikum pay naziya na Zezu Krestu. Vi wəza nawa, də wəzəm saha nawa, tay ɗar mekeleŋ ɓa.

¹⁷ Ya an zəŋgiləw taya zokum va mbel na sazlaga ka meŋgeslin aka wətaf nokum aba Maŋgəlva, an vini gesiŋ na zu anneki wanəsapan wənek nokum.

¹⁸ Vaski nokum bo makrokum waneki, zukum wasan nek də ina.

Timote də Epafroditus

¹⁹ Intatə ɗum də Ɗəfdaya Zezu, wanəɓap wəslən Timote azokum abe suɗike, an nəpprəmək labara nokum makraw wafeti.

²⁰ Vi əntat də ɗəf maɓɓan məs maɗulan dəsler də ina, məs naɗum aka wən nokum zən soksok va Timote ɓa.

²¹ Vi ɗii pak takəŋ wəgayaŋ aka wəza na gəba ziti kaaka'ə, məza aka ana Zezu Krestu ɓa.

²² Kəsənənka va an Timote agəɗə, aɗɗak va wiyən adaɗɗa wəza sən affəni, vaski agəɗ su wəza vi Wən Neneke.

²³ Nəɗumək naw slənən go'u, an nəsənək gabba zuwa.

²⁴ Amma əntatə ɗumo də Ɗəfdaya, abe suɗike na, wanəmbat ulukum in sən kiwa.

²⁵ Nulak na, aslək nəmil gənə gən Epafroditus azokum, dəni mədaɗɗa wəza ndəni dədaw gay də in tamə, ndəni məs kəslənaŋ, dəki su zəga məs kəbaah suwəni atər suwək wəray nawa.

²⁶ Vi aŋgələk ulukum pakə, arəkək sawɓa va kəpprəmənən na gbəgba' armaka.

²⁷ Vaski gesiŋ gbəgba' armak sawɓa ha kayəmta, amma Maŋgəlva awələk saha akani, akani awəl saha kaka ɓa, amma də in pakə. Vi wəɗum naw adawsan diiɗa ɓa.

²⁸ Vini nagəm zu nəsləna, vi an kulanənka, zukum wasan neki, wəɗum naw bo asana diiɗa əmpa ɓa.

²⁹ Vi vaski mətaf də zukum neki vi Ɗəfdaya, məgakdeket ɗiiyen va ndən nəska.

³⁰ Yaŋ akay əmta vi wəza na Krestu. Akay wəbay zəni dawki zəga məs kabaahaŋ suwəni məs kəɓapənən na wəkiyən dəvokum ɓa.